နေမကောင်းတိုင်း ပဋိဇီဝဆေး တကယ်ရော လိုရဲ့လား?

          အခန့်မသင့်လို့ နေမကောင်း၊ ဖျားနာကြတဲ့အခါ ပဋိဇီဝဆေး လို/မလို စဉ်းစားကြည့်ကြရအောင်။

          တကယ်တော့ မကြာခဏ ဖြစ်တတ်တဲ့ နှာစေး၊ ချောင်းဆိုး၊ တုပ်ကွေးရောဂါတွေဟာ ဗိုင်းရပ်စ်ပိုးတွေကြောင့် ဖြစ်တာပါတဲ့။ ရုတ်တရက် ဖျားပြီ၊ နှာစေးပြီ၊ ညောင်းပြီဆိုရင်  ပဋိဇီဝဆေးသောက်ဖို့ လိုတယ်ချည်း ဒက်ထိ မယူဆလိုက်ပါနဲ့။ ရေ ကောင်းကောင်းသောက်ပြီး အနားယူလိုက်ရင် မြန်မကြာ ပျောက်ကင်းသွားတတ်တဲ့ရောဂါတွေပါ။

>>    ပဋိဇီဝဆေးဆိုတာ ဘာလဲ?

          အဓိက,က ဘက်တီးရီးယားပိုးကို သတ်ပေးတာပါ။ ဒါဆို အအေးမိ နှာစေးတာတွေက ဗိုင်းရပ်စ်တွေကြောင့် အဖြစ်များနေလေတော့ ရောဂါနဲ့ဆေး တခြားစီ ဖြစ်မနေဘူးလား။

>>    ဒါဆို ဗိုင်းရပ်စ်အတွက် ဆေးသောက်ဖို့ို လိုသလား?

          များသောအားဖြင့် မလိုအပ်ပါဘူး။ ဗိုင်းရပ်ပိုးဟာ သူ့အလိုလို ဖယ်ခွာသွားတတ်ပြီး အချိန်တန်ရင် ပျောက်ကင်းသက်သာလေ့ ရှိပါတယ်။

>>    ပဋိဇီဝဆေးတွေ မလိုဘဲသောက်ရင် ဘာဖြစ်မလဲ?

●        ဆေးယဉ်ပါးရောဂါ ရပါမယ်။ ထစ်ခနဲဆို ကောက်သောက်လိုက်ရင်း ကိုယ်ထဲက ရောဂါပိုး အနည်းအကျဉ်းဟာ ဆေးကို ယဉ်သွားပြီး နောက်တစ်ကြိမ် ဆေးမတိုးတော့ပါဘူး။

●        ခန္ဓာကိုယ်ရဲ့ ပုံမှန်အတားအဆီးကို ပျက်စေပါတယ်။ ပဋိဇီဝဆေးတွေဟာ လူ့ခန္ဓာကိုယ်ရဲ့ သဘာဝ အရန်အတား ဘက်တီးရီးယားတွေကို သေစေပြီး ဝမ်းလျှောလာတာ၊ ဝမ်းပျက်လာတာတွေ ဖြစ်တတ်ပါတယ်။

●        ဗိုင်းရပ်စ်ကြောင့်ဖြစ်တဲ့ အရာကို ဘက်တီးရီးယားသတ်ဆေး သွားသောက်တော့ ဆေးရဲ့ဘေးထွက်ဆိုးကျိုး ခံရတာအပြင် ဘာမှကောင်းကျိုးမရှိပါ။

>>    ဒါဆို ဘယ်အချိန် ဆေးသောက်သင့်သလဲ?

●        အဖျား သုံးရက်ထက် ပိုကြာတဲ့အခါ

●        အဖျားကြီး၊ ချမ်းတုန်၊ ဆီးအောင့်တဲ့အခါ

●        ချောင်းဆိုး၊ အဝါရောင်သလိပ် ထွက်တဲ့အခါ

●        နားကိုက်၊ နားပြည်ယိုပြီး ဖျားတဲ့အခါ

●        ရင်ဘတ်အောင့် မောလာတာလိုမျိုး၊ အဆုတ်ရောင်လက္ခဏာတွေ ပေါ်လာတဲ့အခါ

●        ခေါင်းတွေ ထိုးကိုက်ပြီး ခြေ၊ လက် မသယ်ချင် ဖြစ်တဲ့အခါ

          ဒါတွေဆို ဆရာဝန်ပြသပြီး လိုအပ်သလို ပဋိဇီဝဆေး မဖြစ်မနေကူဖို့ လိုအပ်လာပါပြီ။

>>    ဖျားတဲ့အခါ ပဋိဇီဝဆေး မသောက်ခင် ဘာသောက်ရမလဲ? ဘာလုပ်ရမလဲ?

●        ပါရာစီတမော သောက်ပါ။

●        ဗီတာမင်စီ သောက်ပါ။

●        စွပ်ပြုတ်၊ ဆန်ပြုတ်လိုမျိုး ပူနွေးအာဟာရဖြစ်တာ စားသုံးပါ။

●        ရေများများ သောက်ပါ။

●        လုံးဝ အနားယူလိုက်ပါ။

●        လေကောင်းလေသန့်ရဖို့ ပြတင်းပေါက်တွေ ဖွင့်လှစ်ထားပါ။

●        စိတ်ဖိစီးမှုကို တတ်နိုင်သမျှ လျှော့ချပြီး ငြိမ်သက်စွာ နားပါ။

●        ဆားရေနွေးနဲ့ ပလုတ်ကျင်းပါ။

          ဒါလောက်ဆိုရင် သာမန်အဖျား၊ ညောင်းကိုက်တာလောက်တော့ အမြန်ဆုံး သက်သာသွားလေ့ ရှိပါတယ်။ ခန္ဓာကိုယ်ကို တုံ့ပြန်ဖို့ အချိန်ပေးပါ။ ပဋိဇီဝဆေးတွေ သောက်တာ၊ ထိုးတာတွေကို ဆရာဝန် ညွန်ကြားချက်နဲ့သာ သောက်သုံးသင့်ပါကြောင်း အသိပေးလိုက်ပါတယ်နော်။

ဂျီပီငှက် (ဆေး/မန်း) (www.drmyanmar.com)