မလွဲမသွေကူးစက်နိုင်ပေမယ့် အိုမီခရွန်မဖြစ်အောင် ဘာကြောင့် အတတ်နိုင်ဆုံး ကာကွယ်သင့်တာလဲ

•  ကိုယ့်မှာ ကျန်းမာရေးပြဿနာတစ်ခုခု ရှိတယ်ဆိုရင် အိုမီခရွန်ကူးစက်တဲ့အခါ ထင်တာထက်ပိုပြီးတော့ ပြင်းထန်နိုင်ပါတယ်။ ကာကွယ်ဆေးထိုးပြီးသားမို့ ရောဂါမပြင်းထန်ဘဲ ဆေးရုံမတက်ရဘူးဆိုရင်တောင် ရက်အနည်းငယ်လောက်တော့ ရောဂါလက္ခဏာအပျော့စားတွေကို ခံစားနေရဦးမှာပါ။ အကယ်၍ ဘာလက္ခဏာမှ မပြရင်တောင် တခြားလူကိုမကူးစက်အောင် သီးသန့်နေရမှာဖြစ်လို့ အလုပ်တွေ၊ စီစဉ်ထားတာတွေ ပျက်ကွက်နိုင်ပါတယ်။

•  ဗိုင်းရပ်စ်ပိုးဟာ လက္ခဏာမပြခင်တည်းက ကူးစက်နိုင်လို့ ရောဂါရှိမှန်းမသိဘဲ လျှောက်သွားနေမိရင် မိသားစု၊ လုပ်ဖော်ကိုင်ဖက်၊ မိတ်ဆွေသူငယ်ချင်းတွေဆီ ရောဂါပိုးဖြန့်ဝေသလို ဖြစ်နိုင်ပါတယ်။ ဒီလိုလူတွေထဲမှာ ရောဂါအခံရှိသူတွေ၊ ကိုယ်ခံအားနည်းသူတွေသာပါခဲ့ရင် ရောဂါပြင်းထန်ပြီး အသက်အန္တရာယ်ရှိတဲ့အထိ ဖြစ်နိုင်ပါတယ်။ ဒါ့အပြင် ကာကွယ်ဆေးထိုးဖို့ အရမ်းငယ်လွန်းတဲ့ ကလေးတွေကိုလည်း ကူးစက်နိုင်ပါသေးတယ်။ ကလေးတွေမှာ ကိုဗစ်ဖြစ်ရင် ပြင်းထန်လေ့မရှိပေမယ့် အနည်းစုကတော့ အဆုတ်ရောင်တာ၊ လေပြွန်ရောင်တာကြောင့် ဆေးရုံတက်ရတဲ့အထိ ဖြစ်နိုင်ပါတယ်။

•  ရောဂါကူးစက်ခံရရင် ကိုယ်ခံအားရပေမယ့် ဒီကိုယ်ခံအားဟာ လပိုင်းလောက်ပဲ ခံတာပါ။ မျိုးကွဲအသစ်ပေါ်လာလို့ဖြစ်စေ၊ ကိုယ်ခံအားပြန်ကျသွားလို့ဖြစ်စေ ရောဂါပြန်ဖြစ်နိုင်ပါတယ်။