မျက်စိနာတာကို ကာကွယ်ကြမယ်

       ရာသီဥတု အပြောင်းအလဲတွေမှာ မျက်စိနာတာက အဖြစ်များပါတယ်။ မျက်စိနာတာမှာ ဖုန်တွေ၊ သဲတွေကြောင့် ဓာတ်မတည့်လို့ ဖြစ်တာ၊ Virus ကြောင့်ဖြစ်တာ၊ bacteria ကြောင့်ဖြစ်တာ၊ chemical ( ဓာတုပစ္စည်း) တွေနဲ့ ထိတွေ့လို့ဖြစ်တဲ့ မျက်စိနာတာဆိုပြီး ရှိပါတယ်။ မျက်စိနာတာက ကူးလို့လည်း လွယ်၊ ကုဖို့လည်းလွယ်ပေမဲ့ တစ်ခါတလေမှာ ပိုပြီးဆိုးရွားတဲ့ရောဂါမျိုးတွေ ဖြစ်သွားနိုင်တာလည်း ရှိပါတယ်။ ဒါကြောင့် မျက်စိနာပြီဆိုရင် ဆရာဝန်နဲ့ ပြသင့်ပါတယ်။

>>    သူ့ရဲ့ လက္ခဏာတွေကတော့ -
●       မျက်သားအဖြူက ရဲတာ
●       မျက်ရည်ထွက်တာ
●       အဝါရောင် မျက်ဝတ်တွေ ထွက်တာ
●       မျက်လုံးယားတာ၊ အောင့်တာ၊ နာတာ
●       အလင်းရောင်ကို မခံနိုင်တာ
●       အမြင်အာရုံ ဝေဝါးတာတို့ပဲ ဖြစ်ပါတယ်။

>>    ဘယ်လိုတွေ ကာကွယ်ရမလဲ?
♦       အိမ်မှာ တစ်ယောက်ယောက် မျက်စိနာပြီဆိုတာနဲ့ အိပ်ရာခင်းတွေ၊ ခေါင်းအုံးစွပ်တွေ၊ စောင်တွေကို ရေနွေးနဲ့ ပြုတ်ပြီး လျှော်ပါ။ အိမ်ကိုလည်း ပိုးသတ်ဆေးသုံးပြီး သန့်ရှင်းရေး လုပ်ပါ။
♦       တစ်ကိုယ်ရေသုံးပစ္စည်းတွေကို တစ်ဦးတည်း သုံးပါ၊ သူများနဲ့ ရောမသုံးပါနဲ့။
♦       လက်ကို ခဏခဏ ဆေးပါ၊ မျက်နှာ၊ မျက်စိကို လက်နဲ့ ကိုင်တာမျိုး မလုပ်ပါနဲ့။
♦       ကိုယ်ခံအားကောင်းစေတဲ့ အစိမ်းရောင်၊ လိမ္မော်ရောင် ရှိတဲ့ အသီးအရွက်တွေကို စားပေးပါ။
♦       လက်ကိုင်ပဝါအစား တစ်ခါသုံးတစ်ရှူးကိုသာ သုံးပါ၊ စနစ်တကျ စွန့်ပစ်ပါ။
♦       လူထူထပ်တဲ့နေရာတွေ မသွားပါနဲ့၊ မျက်စိနာနေခဲ့ရင် ဖုန်တွေ၊ သဲတွေကြောင့် ပိုဆိုးစေလို့ နေကာမျက်မှန် တပ်ပါ။
♦       မျက်စိအတွက်သုံးတဲ့ အလှပြင်ပစ္စည်းတွေ၊ မျက်ကပ်မှန်တွေကို တစ်ဦးတည်း သုံးပါ၊ သူများနဲ့ ရောမသုံးပါနဲ့။

Htar (www.drmyanmar.com)