သွားကျဉ်နေရင်

1.  အက်ဆစ်ဓာတ်လွန်ကဲတဲ့ အစားအစာတွေကို ရှောင်ရှားပါ
သွားကျဉ်ဝေဒနာခံစားရတဲ့လူတွေဟာ အက်ဆစ်ဓာတ် ပါဝင်မှုနည်းတဲ့ အစားအစာတွေကို ရွေးချယ်သင့်ပါတယ်။ အစားအစာတွေမှာ ပါဝင်တဲ့ အက်ဆစ်ဓာတ်က အပေါ်ယံကြွေလွှာကို တိုက်စားပစ်လိုက်တာကြောင့် သွားကျဉ်တဲ့ဝေဒနာကို ပိုမိုခံစားရနိုင်ပါတယ်။ ဒါကြောင့် အချဉ်ဓာတ်ကဲသော အစားအစာ ဒါမှမဟုတ် အက်ဆစ်ဓာတ်လွန်ကဲတဲ့ အစားအသောက်တွေကို စားသောက်ပြီးပါက မိနစ် 20 အကြာမှာ သွားတိုက်ပေးပါ။ အစာစားပြီးချင်း သွားတိုက်ခြင်းက အက်ဆစ်ဓာတ်ကို ပိုမိုထွက်ရှိစေတာကြောင့် မိနစ် 20 အကြာမှသာ သွားတိုက်ပေးပါ။

2.  သွားကျဉ်ခြင်းအတွက် ရည်ရွယ်ပြီး ထုတ်လုပ်ထားတဲ့ သွားတိုက်ဆေးကိုသာ ရွေးချယ်အသုံးပြုပါ
အခုအခါမှာ သွားကျဉ်တဲ့လူတွေအတွက် ရည်ရွယ်ပြီး ထုတ်လုပ်ထားတဲ့ သွားကျန်းမာရေးနှင့် ဆက်စပ်ပစ္စည်းတွေကို အလွယ်တကူရရှိနေနိုင်ပြီ ဖြစ်ပါတယ်။ ၎င်းပစ္စည်းတွေမှာ ပိုတက်စီယမ်နိုက်ထရိတ် (Potassium nitrate) ပါဝင်တာကြောင့် သွားအပေါ်မှာ အလွှာတစ်ခုကို ဖန်တီးပေးပြီး သွားကျဉ်ခြင်းမဖြစ်အောင် ကာကွယ်ပေးပါတယ်။

3.  ဝေဒနာကို ကြိတ်ခံမနေဘဲ ဆရာဝန်နှင့် တိုင်ပင်ပြသပါ
အချို့သောလူတွေက လေအေးတိုက်ရင်တောင် သွားကျဉ်နေတတ်ပါတယ်။ သွားကျဉ်ခြင်းကို သက်သာစေတဲ့ သွားတိုက်ဆေးနဲ့ မသက်သာဘူးဆိုရင်တော့ ဝေဒနာကို ကြိတ်မခံစားဘဲ သွားဆရာဝန်နှင့်ပြသပါ။