သွေးလှူပြီးနောက် မိမိကိုယ်ကို ဘယ်လိုဂရုစိုက်ကြမလဲ

>>  သွေးလှူပြီးနောက် ဘယ်လိုအစားအသောက်တွေ စားသောက်ကြမလဲ?
●  တစ်ခါသွေးလှူတိုင်း ခန္ဓာကိုယ်ကနေ သံဓာတ် (၂၀၀-၂၅၀) မီလီဂရမ် ဆုံးရှုံးမှုရှိပါတယ်။ ဒါကြောင့် သွေးလှူပြီးတဲ့အခါ သံဓာတ်ကြွယ်ဝတဲ့ အနီရောင်အသား၊ ပင်လယ်စာ၊ ပဲအမျိုးမျိုး၊ အစိမ်းရင့်ရောင် ဟင်းသီးဟင်းရွက်တွေနဲ့ သံဓာတ်ဖြည့်စွက်ထားတဲ့ အစားအသောက်တွေကို စားသောက်ပေးဖို့ လိုအပ်ပါတယ်။ သံဓာတ်စုပ်ယူမှု အားကောင်းစေဖို့ ဗီတာမင်စီကြွယ်ဝတဲ့ လိမ္မော်သီး၊ ငရုတ်ပွသီး၊ ခရမ်းချဉ်သီး စတာတွေနဲ့ တွဲစားပေးပါ။ သံဓာတ်အားဖြည့်ဆေး သောက်သုံးပေးတာကလည်း သွေးနီဥအသစ်တွေ ဖွဲ့စည်းတည်ဆောက်ဖို့ အကူအညီပေးနိုင်ပါတယ်။
●  သွေးနီဥတည်ဆောက်ဖို့ အကူအညီပေးတဲ့ နောက်ထပ်ဓာတ်တစ်မျိုးကတော့ ဗီတာမင်ဘီပါ။ ဒါကြောင့် သွေးလှူပြီးတဲ့အခါ ဗီတာမင်ဘီကြွယ်ဝတဲ့ အစိမ်းရင့်ရောင် ဟင်းသီးဟင်းရွက်တွေ၊ နို့ထွက်ပစ္စည်းတွေ၊ အသည်း၊ အနီရောင် အသားတွေနဲ့ ဗီတာမင်ဘီ ဖြည့်စွက်ထားတဲ့ အစားအသောက်တွေကို စားသောက်ပေးသင့်ပါတယ်။ ဗီတာမင်ဘီအုပ်စု ပါဝင်တဲ့ ဖြည့်စွက်အားဆေးတွေ သောက်ပေးတာကလည်း အထောက်အကူဖြစ်စေပါတယ်။
●  သွေးလှူတာဟာ ခန္ဓာကိုယ်ထဲက အရည်တွေကို ဖယ်ရှားလိုက်တာကြောင့် အရည်များများသောက်ပေးဖို့ လိုအပ်ပါတယ်။ ရေအပါအဝင် အခြားသော အရည်များဖြစ်တဲ့ စွပ်ပြုတ်၊ ရေနွေးကြမ်း စတာတွေ သောက်ပေးပါ။ အမေရိကန်ကြက်ခြေနီအဖွဲ့က သွေးလှူပြီး (၂၄) နာရီအတွင်းမှာ ပုံမှန်သောက်နေကျထက် ရေဖန်ခွက် (၄) ခွက် ပိုသောက်သင့်တယ်လို့ အကြံပြုထားပါတယ်။