အင်ဆူလင်ကို နည်းလမ်းမှန်ကန်စွာ ထိုးတတ်ဖို့ ...

          ဆီးချိုရောဂါလိုမျိုး အင်ဆူလင်ကို ရေရှည်စွဲပြီးထိုးရတဲ့သူတွေအတွက် အိမ်မှာပဲထိုးတတ်ဖို့ အင်ဆူလင်ထိုးနည်းကို သင်ပြီး အိမ်မှာပဲ ထိုးစေပါတယ်။ အင်ဆူလင်ထိုးနည်းက တခြားဆေးထိုးတာတွေနဲ့ မတူပါဘူး။ ပြီးတော့ ဆေးရဲ့အာနိသင် အပြည့်အဝရဖိုအတွက်ဆိုရင် ဆေးထိုးနည်းမှန်ဖို့ အရေးကြီးပါတယ်။ တစ်ခါတလေတော့လည်း ဘယ်လိုပဲသင်လိုက်သင်လိုက် အချိန်ကြာလာတော့ သူ့ဟာသူ ထိုးချင်သလို ထိုးလာတာတွေလည်း ရှိပါတယ်။

>>    အင်ဆူလင်ထိုးရမယ့်နေရာ

          အင်ဆူလင်ထိုးဖို့ အကောင်းဆုံးနေရာကတော့ ဝမ်းဗိုက်ပါ - ချက်ကနေ အနည်းဆုံး ၂ လက်မအကွာ အမာရွတ်တွေ၊ မှဲ့တွေနဲ့ ဝေးတဲ့နေရာ ဖြစ်ရပါမယ်၊ အဆီများတဲ့နေရာတွေဖြစ်တဲ့ လက်မောင်းအနောက်၊ ပေါင် စတဲ့ နေရာတွေမှာလည်း ထိုးလို့ရပါတယ်၊ အထူးသဖြင့် နေ့တိုင်း အင်ဆူလင်ထိုးနေရရင် နေရာတွေ ပြောင်းပြောင်းပြီး ထိုးပေးပါ။ အကောင်းဆုံးကတော့ နောက်ဆုံး ထိုးထားတဲ့နေရာကနေ အနည်းဆုံး 1 cm (လက်တစ်ချောင်းအကျယ်စာ) လောက် ခွာထိုးပါ။ တစ်နေရာတည်းမှာပဲ အမြဲထိုးနေရင် အရေပြားတစ်သျှူးတွေမှာ အပြောင်းအလဲတွေဖြစ်ပြီးတော့ ဆေးစုပ်ယူမှုပြဿနာတွေ ဖြစ်လာနိုင်ပါတယ်။

          အင်ဆူလင်ထိုးတဲ့နေရာတွေမှာ အဆီဆဲလ်တွေ ကုန်လာတတ်ပါတယ်။ အရေပြားမှာ အဖုလေး ဖောင်းထွက်လာတာက အဲဒီနေရာက အင်ဆူလင်နဲ့ မတည့်လို့ပါ။ ဒီနေရာမှာဆိုရင် အင်ဆူလင်ကို ကောင်းကောင်း မစုပ်ယူနိုင်တဲ့အတွက် ဖောင်းထွက်လာတဲ့နေရာတွေမှာ မထိုးပါနဲ့။

>>    အနာရွတ်

          တစ်နေရာတည်းမှာပဲ ထပ်ခါတလဲလဲထိုးတဲ့အခါမှာ အမာရွတ်တစ်သျှူးတွေ ဖြစ်လာပါတယ်။ အင်ဆူလင်ကို အမာရွတ်တစ်သျှူးတွေကနေတစ်ဆင့် စုပ်မယူနိုင်တဲ့အတွက် ဒီနေရာတွေမှာလည်း မထိုးသင့်ပါဘူး။

>>    အရေပြားလေးကို ဆွဲပြီးထိုးခြင်း

          အင်ဆူလင်ထိုးတဲ့အခါမှာ အရေပြားကို ဆွဲဖို့မလိုပါဘူး။ အရမ်းပိန်တဲ့သူဆိုရင်တော့ ကြွက်သားတွေထိ ဆေးမဝင်သွားအောင် အရေပြားကို ဆွဲထိုးဖို့ လို၊ မလိုဆိုတာကို ဆရာဝန်ကို မေးပါ။

>>    အန္တရာယ်ကင်းစေဖို့ -

          အင်ဆူလင် ထိုးတဲ့အခါတိုင်းမှာ ဒီအချက်လေးတွေကို လိုက်နာပါ။

●        သန့်ရှင်းမှု ရှိပါစေ - အင်ဆူလင်ထဲကို ဘက်တီးရီးယားပိုးတွေ မဝင်စေဖို့ ဆေးထိုးတိုင်း အင်ဆူလင် ဆေးဘူးအဖုံးကို သေချာ သုတ်ပါ (သို့) အရက်ပြန်၊ ဂွမ်းနဲ့ ဖွင့်ပါ။

●        ဆေးထိုးအပ်ထဲက လေတွေ - ဆေးထိုးအပ်ထဲကလေတွေက အန္တရာယ်မရှိပေမယ့် ရှေ့မှာ လေတွေပိတ်နေတော့ အင်ဆူလင်စုပ်တဲ့အခါမှာ ပမာဏမပြည့်ဘဲ ထစ်တာမျိုး ဖြစ်နိုင်ပါတယ်။ အထူးသဖြင့် အမျိုးအစား ၁ ဆီးချိုရောဂါရှိသူတွေအတွက် အင်ဆူလင်ကို ပမာဏပြည့်အောင်ထိုးပေးဖို့ အရေးကြီးပါတယ်။

●        ဆေးထိုးအပ်ထဲမှာ အင်ဆူလင်တွေ စုပ်ထားပြီး ပြန်သုံးခြင်း  - ဒါက အရေပြားပိုးဝင်တာကို ပိုများစေနိုင်ပါတယ်၊ ဆေးထိုးအပ်ထဲက ခြောက်သွေ့နေတဲ့ အင်ဆူလင်တွေက ပမာဏမပြည့် ဖြစ်တတ်ပါတယ်။ ပြီးတော့ ဆေးထိုးအပ်တွေကို ထပ်ခါထပ်ခါ ပြန်သုံးရင် ထိပ်တုံးပြီးတော့ ပိုနာတတ်ပါတယ်။

Dr. Mya Myo Myo Swe (www.drmyanmar.com)