အသည်းပြည်တည်ခြင်းအကြောင်း သိကောင်းစရာ

          ရပ်ကွက်ထဲက လူကြီးတစ်ယောက် ဖျားပြီး အသားတွေ ဝါလာတာကို ပေါ့ပေါ့ဆဆနေမိတာ ဟော ... သိပ်မကြာပါဘူး ဆုံးသွားပါရော။ ရင်ခွဲစစ်ဆေးကြည့်တော့မှ အသည်းပြည်တည်တာတဲ့လေ။ ဒါဆို အသည်းမှာရော ပြည်တည်နိုင်သလား၊ အသည်းပြည်တည်ခြင်းက ဒီလောက်တောင် ဆိုးရွားသလားဆိုတာ သိချင်ကြပါလိမ့်မယ်။

          အသည်းပြည်တည်ခြင်းဆိုတာ အသည်းတစ်နေရာတွင် ပြည်အိတ်ဖြစ်ပေါ်နေခြင်းကို ဆိုလိုပြီး အလျင်အမြန် မကုသပါက နောက်ဆက်တွဲ ဆိုးကျိုးများစွာကို ဖြစ်ပေါ်စေပါလိမ့်မယ်။

●        ဘက်တီးရီးယား၊ မှိုနဲ့ ကပ်ပါးပိုးများ ဝင်ရောက်ရာကနေ ဖြစ်ပေါ်နိုင်ပါတယ်။

●        ထိုပိုးများဟာ ဝမ်းဗိုက်တွင်းရှိ အခြားသော ကလီဇာများကနေတစ်ဆင့် သွေးကြောထဲသို့ ရောက်ရှိပြီး ထိုကတစ်ဆင့် အသည်းကို ဝင်ရောက်ခြင်း ဖြစ်ပါတယ်။

●        အသည်းကို ထိခိုက်ဒဏ်ရာရခြင်းနဲ့ ခွဲစိတ်ခြင်းများ ပြုလုပ်ပြီးနောက်လည်း ဖြစ်ပေါ်နိုင်ပါတယ်။

>>    ရောဂါလက္ခဏာများ

          ပိုးဝင်ခြင်းဖြစ်ပေါ်ပြီး ၂ ပတ်မှ ၄ ပတ်အကြာတွင် အောက်ပါလက္ခဏာများကို တွေ့ရပါတယ်။

●        ချမ်းတုန်ဖျားခြင်း

●        မအီမသာဖြစ်ခြင်း

●        ဗိုက်ညာဘက်ခြမ်းအပေါ်တွင် နာခြင်း

●        ကိုယ်အလေးချိန်ကျခြင်း

●        ပျို့အန်ခြင်း

●        ဝမ်းပျက်ခြင်း၊ ဝမ်းချုပ်ခြင်း သို့မဟုတ် ၂ ခုလုံး တစ်ပြိုင်နက်ဖြစ်ခြင်း

●        ချောင်းဆိုးခြင်း

●        ရင်ဘတ်အောင့်ခြင်း၊ ပခုံးနာခြင်း

●        မျက်စိနဲ့ အရေပြားဝါခြင်း

>>    ကုသနည်း

●        ပိုးသတ်ဆေးများ သောက်ခြင်း / သွေးကြောမှသွင်းခြင်း

●        အသည်းရှိ ပြည်အိတ်မှပြည်များကို အပ်ဖြင့် စုပ်ထုတ်ခြင်း

●        အာထရာဆောင်း၊ စီတီစကင် (CT scan)၊ MRI ရိုက်ခြင်းတို့ဖြင့် အဖြေရှာ ကုသနိုင်ပါတယ်။

>>    နောက်ဆက်တွဲဆိုးကျိုးများ

●        ပြည်အိတ်ပေါက်ခြင်း (အရေးပေါ်အခြေအနေ)

●        အခြားသော အစိတ်အပိုင်းများ (ဗိုက်ခေါင်း၊ အဆုတ်၊ နှလုံး၊ ဦးနှောက်၊ မျက်စိ) သို့ ပိုးများ ပျံ့နှံ့ခြင်း၊ သွေးဆိပ်တက်ခြင်း

●        အသက်သေဆုံးခြင်း

          အသည်းပြည်တည်ခြင်းဟာ အသက်သေဆုံးသည်အထိ ဆိုးကျိုးပေးနိုင်တာမို့ ဖျားခြင်း၊ ဗိုက်ညာဘက်အပေါ်ခြမ်း နာကျင်ခြင်းနဲ့ အသားဝါခြင်းတို့ ဖြစ်ပေါ်ပါက ဂရုတစိုက် ကုသမှု ခံယူသင့်ပါတယ်။

ဂျီပီငှက် (ဆေး/မန်း) (www.drmyanmar.com)