/
news/ကျန်းမာရေး-ဆိုင်ရာဗဟုသုတများ/အဲယားကွန်း၊-ပန်ကာလေကြောင့်-လည်ချောင်းနာ၊-အအေးမိနိုင်သလား

အဲယားကွန်း၊ ပန်ကာလေကြောင့် လည်ချောင်းနာ၊ အအေးမိနိုင်သလား

Category
ကျန်းမာရေး ဆိုင်ရာဗဟုသုတများ

အဲယားကွန်းခန်းထဲမှာ အချိန်ကြာကြာနေမိရင်၊ ဒါမှမဟုတ် ပန်ကာလေကို အချိန်ကြာကြာခံပြီးရင် လည်ချောင်တွေယားပြီး နာလာတာ၊ နှာစေးချောင်းဆိုးတာ၊ နုံးတာတွေကို လူတိုင်းနီးပါး ကြုံဖူးကြမှာပါ။ လူတော်တော်များများကတော့ ဒါကို အဲယားကွန်း၊ ပန်ကာကလာတဲ့လေကြောင့် အအေးမိတာလို့ ယူဆကြပါတယ်။ ဒါပေမဲ့ တကယ်တမ်း ဒီလိုဖြစ်ရတာဟာ အဲယားကွန်း၊ ပန်ကာတွေနဲ့ တိုက်ရိုက်မပတ်သက်ဘဲ Air Conditioning Sickness လို့ခေါ်တဲ့ အခြေအနေတစ်ခုကြောင့်ပါ။

>>  Air Conditioning Sickness ဆိုတာ ဘာလဲ?

အဲယားကွန်း (သို့) ပန်ကာကလာတဲ့ လေအေးနဲ့ ပတ်ဝန်းကျင်မှာရှိနေတဲ့ ရောဂါပိုးမွှားတွေ ပေါင်းစပ်မိတဲ့အခါ ဒီရောဂါပိုးမွှားတွေကြောင့် အအေးမိတာကို Air Conditioning Sickness လို့ ခေါ်ပါတယ်။ Air conditioning sickness ကိုဖြစ်စေတဲ့ အဓိကအချက် (၃) ချက်ရှိပါတယ်။

ဒါတွေကတော့ -

●  အိမ်ခန်း၊ ရုံးခန်းတွေကို နေ့စဉ်ပုံမှန် သန့်ရှင်းရေးမလုပ်တဲ့အခါ နံရံနဲ့ကြမ်းပြင်တွေ ချောင်ကျပြီး စိုထိုင်းတဲ့နေရာတွေမှာ ဘက်တီးရီးယားနဲ့ မှိုတွေ ပေါက်ပွားတတ်ပါတယ်။ ဒီလိုအချိန်မှာ အဲယားကွန်း၊ ပန်ကာ ဖွင့်လိုက်တဲ့အခါ ရောဂါပိုးမွှားတွေကို လေထုထဲပျံ့နှံ့စေသလို ဖြစ်သွားတာကြောင့် ရှူရှိုက်မိတဲ့အခါ လည်ချောင်းနာတာ၊ နှာစေးတာတွေ ဖြစ်လာရတာပါ။

Degirol IA 1

●  အဲယားကွန်းနဲ့ ပန်ကာတွေကို သေချာသန့်ရှင်းရေး မလုပ်၊ ကောင်းကောင်း မထိန်းသိမ်းတဲ့အခါ ရောဂါပိုးတွေ ပေါက်ပွားဖို့အတွက် နေရာကောင်းတစ်ခု ဖြစ်လာပါတယ်။ အထူးသဖြင့် အဲယားကွန်းတွေကို ပုံမှန် Maintenance မလုပ်ရင် စိုထိုင်းဆများပြီး ဘက်တီးရီးယားနဲ့မှိုတွေ ပေါက်ပွားနိုင်ပါတယ်။

●  နောက်ဆုံးတစ်ချက်ကတော့ အဲယားကွန်း၊ ပန်ကာကို အအေးဆုံးအခြေအနေမှာထားပြီး ဖွင့်ထားတာပါပဲ။ ပတ်ဝန်းကျင်က အေးပြီးခြောက်သွေ့တဲ့အခါ ဗိုင်းရပ်စ်ပိုးတွေ ကောင်းကောင်းရှင်သန်နိုင်သလို၊ သွေးကြောတွေကျဉ်းပြီး သွေးလှည့်ပတ်မှု မကောင်းတာကြောင့် ဗိုင်းရပ်စ်တွေကိုလည်း ကောင်းကောင်း မတိုက်ထုတ်နိုင်တော့ပါဘူး။ ဒါ့အပြင် လေထုခြောက်သွေ့တဲ့အခါ နှာခေါင်းအတွင်းသားနဲ့ လည်ချောင်းတွေလည်း ခြောက်သွေ့တာကြောင့် ခန္ဓာကိုယ်က အစိုဓာတ်ကို ပိုထုတ်လိုက်တဲ့အခါ ရောဂါပိုးပေါက်ပွားမှုကို အားပေးသလို ဖြစ်စေပါတယ်။

ခြုံပြောရရင် Air Conditioning Sickness ကိုဖြစ်စေတဲ့ ဒီသုံးချက်လုံးဟာ ရောဂါပိုးတွေကြောင့်ပဲဖြစ်ပြီး အဲယားကွန်း၊ ပန်ကာလေခံတာနဲ့ တိုက်ရိုက်ကြီး ပတ်သက်နေတာတော့ မဟုတ်ပါဘူး။

Degirol IA 2

>>  Air Conditioning Sickness မဖြစ်အောင် ဘယ်လိုကာကွယ်ရမလဲ?
●  အိမ်ခန်း၊ ရုံးခန်းကို ပုံမှန်လေး သန့်ရှင်းရေးလုပ်ပေးပါ။
●  အဲယားကွန်းတွေ၊ ပန်ကာတွေကို ပုံမှန် သန့်ရှင်းရေး လုပ်ပေးပါ။ အထူးသဖြင့် အဲယားကွန်းတွေကို လအနည်းကြာတိုင်း တစ်ကြိမ်လောက်တော့ ပုံမှန် maintenance လုပ်ပေးသင့်ပါတယ်။
●  အဲယားကွန်း (သို့) ပန်ကာလေခံနေချိန်မှာ ခေါင်းကိုက်တာ၊ နုံးတာ၊ ကိုယ်လက်ကိုက်ခဲတာတွေ စဖြစ်လာတာနဲ့ အဲယားကွန်း၊ ပန်ကာကိုပိတ်ပြီး အခန်းအပူချိန်မှာပဲ နေပေးပါ။
●  အဲယားကွန်းခန်းထဲမှာ အနေများသူဆိုရင် ရေဓာတ်ပြည့်ဝနေဖို့ ရေများများ သောက်ပေးပါ။

Dr. Aye Hsu Mon (www.drmyanmar.com)