ပခုံးအဆစ်လွဲတဲ့အခါ

>>  အိမ်တွင်းနည်းလမ်းလေးတွေအနေနဲ့
သေချာကုသမှုခံယူပြီးနောက် နာကျင်မှုသက်သာစေဖို့နဲ့ ကောင်းကောင်း အနာကျက်မြန်နာလန်ထနိုင်ဖို့ ဒီအိမ်တွင်းနည်းလမ်းလေးတွေကို လိုက်လုပ်ကြည့်နိုင်ပါတယ်နော်။
●  ပခုံးကို အနားပေးပါ။ ပခုံးအဆစ်လွဲစေတဲ့ လှုပ်ရှားမှုမျိုး၊ နာကျင်မှုကို ဖြစ်စေနိုင်မယ့် လှုပ်ရှားမှုမျိုးကို ထပ်မလုပ်မိပါစေနဲ့။ ပခုံး ကောင်းကောင်းသက်သာတဲ့အထိ အလေးအပင်မတာ၊ လက်ကို ပခုံးအပေါ်ထိ မြှောက်တာမျိုး မလုပ်ပါနဲ့။
●  ရေခဲ အရင်ကပ်ပြီးနောက် အပူကပ်ပါ။ ရေခဲကပ်ခြင်းဖြင့် ရောင်ရမ်းမှုနဲ့ နာကျင်မှုတွေကို သက်သာစေနိုင်ပါတယ်။ ပထမ တစ်ရက်၊ နှစ်ရက်မှာ တစ်နာရီခြားတစ်ခါ ရေခဲကပ်ပါ။ ၂ ရက်၊ ၃ ရက်အကြာ နာကျင်ရောင်ရမ်းမှုတွေ သက်သာပြီးနောက် အပူကပ်ပေးခြင်းဖြင့် ကြွက်သားတွေကို ပြေလျော့စေနိုင်ပါတယ်။ အပူကိုတော့ တစ်ခါကပ်ရင် မိနစ် ၂၀ ထက် မပိုပါစေနဲ့။
●  အကိုက်အခဲပျောက်ဆေး သောက်ပါ။ အဆစ်အမြစ် နာကျင်တာတွေ သက်သာစေဖို့ အကိုက်အခဲပျောက်ဆေး သောက်ပြီး လိမ်းဆေးလေးတွေ လိမ်းပေးနိုင်ပါတယ်။
●  ၁ ရက်၊ ၂ ရက်အကြာမှာ ဆရာဝန် ညွှန်ကြားထားတဲ့အတိုင်း လေ့ကျင့်ခန်းအပျော့စားလေးတွေကို စလုပ်ပေးပါ။ မလှုပ်ရှားခြင်းက အဆစ်တွေကို တောင့်တင်းစေနိုင်ပါတယ်။ ဒီကနေ ပိုဆိုးလာရင် အဆစ်ကပ်ပြီး လှုပ်ရှားမရတော့တဲ့အခြေအနေအထိတောင် ဖြစ်သွားနိုင်ပါတယ်။
အနာ လုံးဝကျက်သွားပြီး ပခုံး ကောင်းကောင်းလှုပ်ရှားနိုင်သွားပြီးတဲ့အထိကို လေ့ကျင့်ခန်း ဆက်လုပ်ပေးပါ။ နေ့စဉ် ပခုံးအကြောလျော့ခြင်း၊ ပခုံးအဆစ် တောင့်တင်းသန်မာအောင်လေ့ကျင့်ခန်းပြုလုပ်ခြင်း စတာတွေက နောက်တစ်ကြိမ် ပခုံးအဆစ်လွဲခြင်းကို ကာကွယ်ပေးနိုင်မှာပါ။

Dr. Aye Hsu Mon (www.drmyanmar.com)