ကစားရာမှရလာတဲ့ထိခိုက်ဒဏ်ရာတွေကို မေမေတို့ ဘယ်လိုကုသကြမလဲ

• နှာခေါင်းသွေးယိုခြင်း

          ကလေးကိုထိုင်ချခိုင်းပြီး ခေါင်းနှင့် ခန္ဓာကိုယ်ကို အရှေ့ကိုအနည်းငယ်ကိုင်းထားစေပါ။ (ဒီအနေအထားက သွေးတွေလည်ချောင်းထဲဆင်းမသွားအောင်ကာကွယ်နိုင်ပါတယ်။ ) တစ်သျှူး (သို့) ရေစိုဝတ်တစ်ခုခုကိုသုံးပြီး လက်မနဲ့လက်ညှိုးကြားမှာ နှာခေါင်းကိုညှပ်ပြီၤးပိတ်ထားပါ။ ၅ မိနစ်လောက်ဖိထားပေးပြီးမှ သွေးထွက်နေတုန်းလားဆိုတာကို စစ်ကြည့်ပါ။ လိုအပ်ပါက နောက်ထပ် ၁၀ မိနစ်ထပ်ပြီးဖိထားပေးပါ။

          ပိုပြီးအရေးပေါ်အခြေအနေဖြစ်ပါက - ၁၅-၂၀ မိနစ်လောက်ကြာတဲ့အထိသွေးမတိတ်သေးပါက (သို့) နှာခေါင်းသွေးယိုတာ ကော်ဖီတစ်ခွက်ထက်ပိုပါက ဆေးရုံ၊ ဆေးခန်းကိုချက်ချင်းသွားပါ။

• မျက်လုံးမည်းခြင်း

          မျက်လုံးကို ရေအေးဝတ် ၁၀-၂၀ မိနစ်ခန့်ကပ်ပေးပါ။ မျက်လုံး၊ မျက်ခွံပေါ်ကို ရေခဲ (သို့) အအေးတိုက်ရိုက်ထိတွေ့ခြင်းမပြုပါနှင့်။ ဓာတုပစ္စည်းပါဝင်တဲ့ကပ်ခွာတွေက ဓာတုပစ္စည်းတွေစိမ့်ထွက်ပြီး မျက်လုံးကိုထပ်ပြီး ထိခိုက်စေနိုင်တဲ့အတွက် ဘယ်တော့မှမကပ်ပါနဲ့။

          ပိုပြီးအရေးပေါ်အခြေအနေဖြစ်ပါက - စိုးရိမ်စရာတစ်ခုခုရှိပါက ကလေးဆရာဝန်နဲ့ပြသပါ။

• ခြေကျင်းဝတ်လည်ခြင်း

          ခြေကျင်းဝတ်ကို တတ်နိုင်သမျှငြိမ်ငြိမ်ထားပါ။ ရေခဲဝတ်ကပ်ခြင်းကို မိနစ် ၂၀ ကပ်၊ မိနစ် ၂၀ နားလုပ်ပေးပါ။ အရေပြားကိုကာကွယ်ဖို့နဲ့ ရောင်ရမ်းခြင်းမဖြစ်စေဖို့အတွက် ခြေကျင်းဝတ်ကို မျှော့ပါတဲ့ ပတ်တီးစည်းပေးထားပါ။ ဒဏ်ရာ၇တဲ့နေရာကို မြှောက်ထားပေးပြီး ငြိမ်ငြိမ်ထားပါ။

          ပိုပြီးအရေးပေါ်အခြေအနေဖြစ်ပါက - ထိခိုက်ဒဏ်ရာရတဲ့နေ့မှာ လမ်းမလျှောက်နိုင်ရင် (သို့) ၆ ပတ်ကျော်တဲ့အထိခြေကျင်းဝတ်နာနေသေးရင် ဆေးရုံဆေးခန်းသွားပြပါ။ ပုံမှန်အားဖြင့် ၂ ပတ်ကျော်ရင် အနာပျောက်လေ့ရှိပါတယ်။

• တစ်ခုခုနဲ့ပွတ်ိုက်မိပြီး အရေပြားပွန်းပဲ့ခြင်း (သို့) အရေပြားလောင်ခြင်း

          အရေပြားကို ဆပ်ပြာ၊ ရေတို့ဖြင့် ဆေးကြောသန့်စင်ပါ။ ရေခဲ (သို့) ရေခဲရေမသုံးပါနဲ့။ ပိုးသတ်ထားသောဇာဂနာဖြင့် အညစ်အကြေးတွေကို သေချာထုတ်ပါ။ ပိုးသတ်ဆေးရည်သုတ်လိမ်ပြီး ပိုးသတ်ထားသောပတ်တီးဖြင့် ဖုံးအုပ်ထားပါ။ ပွန်းပဲ့နေတဲ့နေရာပေါ်မှာ ကပ်တဲ့အရာတွေမအုပ်မိဖို့ သတိပြုပါ။ Ibuprofen/ acetaminophen ဆေးကို ကလေးအသက်အရွယ်အလိုက် တိုက်သင့်တဲ့ပမာဏတိုက်ခြင်းဖြင့် အနာသက်သာစေနိုင်ပါတယ်။ အနာကျက်ခြင်းရှိမရှိ နေ့စဉ်စစ်ဆေးပါ။

          ပိုပြီးအရေးပေါ်အခြေအနေဖြစ်ပါက - အနာနေရာတွင် ရောင်ခြင်း၊ ပူခြင်း၊ နီခြင်း၊ ပြည်တည်ခြင်း စတဲ့ရောဂါပိုးဝင်တဲ့လက္ခဏာတွေတွေ့ပါက ဆရာဝန်နဲ့ပြသပါ။

• သွားကျွတ်ထွက်သွားခြင်း

          သွားကိုအပေါ်က ကောက်ကိုင်ပြီး သွားအမြစ်မှာညစ်ပတ်နေပါက ဆေးကြောသန့်စင်ပါ။ တစ်သျှူးတွေကိုပွတ်တိုက်ပြီး ဖယ်ရှားပစ်ခြင်းမပြုပါနဲ့။ သွားကို အမြစ်ကနေပြီး သူ့နေရာမှာသူသေချာပြန်ထည့်ထားပါ။

          ပိုပြီးအရေးပေါ်အခြေအနေဖြစ်ပါက - နို့ထည့်ထားသောခွက် (သို့) ဆားရေထဲတွင်သွားကိုထည့်ပြီး မြန်ၤနိုင်သမျှမြန်မြန် သွားဆရာဝန်ဆီ သွားပြပါ။ သွားကို ၁ နာရီအတွင်းပြန်ထည့်နိုင်ပါက အမြစ်ပြန်တွယ်နိုင်ပါတယ်။

• ဦးခေါင်းထိခိုက်ဒဏ်ရာရခြင်း

          ကစားရာကနေပြီး ဖြစ်တဲ့ဒဏ်ရာတော်တော်များများက သာမာန်ပဲဖြစ်ပေမယ့်လည်း ဦးခေါင်းဒဏ်ရာရရင်တော့ ပြင်းထန်နိုင်ပါတယ်။

          ကလေးက ခေါင်းကိုက်ခြင်း၊ စကားပြောတာဝါးခြင်း၊ အမြင်အာရုံဝါးခြင်း၊ ဟန်ချက်မထိန်းနိုင်ခြင်း၊ သူငယ်အိမ်မညီခြင်း စတဲ့လက္ခဏာတွေဖြစ်ပါက အရေးပေါ်ကုသမှုချက်ချင်းခံယူပါ။ ဒါတွေကနေပြီး နာတာရှည်ဦးနှောက်ပျက်စီးမှုဖြစ်စေပြီး မသန်စွမ်းတောင်ဖြစ်သွားစေနိုင်ပါတယ်။

Dr. Mya Myo Myo Swe (www.drmyanmar.com)