ကလေးတွေကို မပေးသင့်တဲ့ဆေးများ

Category

ကလေးများနှင့်ကျန်းမာရေး

ကလေးငယ်လေးတွေဟာ နုနယ်လွန်းကြတဲ့အတွက် လူကြီးတွေထက်စာရင် ဆေးမတည့်တာမျိုး ပိုဖြစ်နိုင်တာကြောင့် ဆေးမပေးခင်မှာ ဆရာဝန်နဲ့ တိုင်ပင်ဆွေးနွေးဖို့ အထူးလိုအပ်ပါတယ်။ ကလေးမှာ ဆေးသောက်ပြီးချိန် အန်တာ၊ အနီကွက်တွေအင်ပြင်တွေထတာ ဖြစ်လာခဲ့ရင် ဆရာဝန်ထံပြေးသင့်ပါတယ်။

ကလေးငယ်များသောက်သုံးဖို့ မသင့်တော်တဲ့ ဆေးတွေကတော့

၁။ Aspirin အကိုက်အခဲပျောက်ဆေး

ကလေးလေးတွေ ဖျားနာကိုက်ခဲတဲ့အခါ Aspirin နဲ့ အခြားaspirinပါဝင်တဲ့ အကိုက်အခဲပျောက်ဆေးတွေ မပေးသင့်ပါဘူး။ Aspirinဟာ ကလေးငယ်တွေမှာ Reye’s syndromeလို့ခေါ်တဲ့ ဦးနှောက်နဲ့ အသည်းကို ထိခိုက်စေတတ်တဲ့ ရောဂါစုတစ်မျိုးကို ဖြစ်စေနိုင်ပါတယ်။ ဒီရောဂါစုဟာ ရှားပါးပေမယ့် ဖြစ်လာခဲ့ရင်တော့ သေစေနိုင်လောက်တဲ့အထိ ဆိုးပါတယ်။ ဒါကြောင့် မိဘတွေအနေနဲ့ ကလေးနေမကောင်းဖြစ်ရင် ကိုယ့်သဘောနဲ့ကိုယ် မသောက်ပဲ ဆရာဝန်နဲ့တိုင်ပင်ကာ အခြား acetaminophan သို့မဟုတ် ibuprofen အမျိုးအစား ဖျားနာကိုက်ခဲပျောက်ဆေးတွေကို တိုက်သင့်ပါတယ်။

၂။ ဆေးဆိုင်မှာအလွယ်တကူဝယ်ယူရရှိနိုင်တဲ့ ချောင်းဆိုး၊ အအေးမိပျောက်ဆေးများ

ကလေးတွေကို ဆေးဆိုင်ကနေ ချောင်းဆိုး၊ အအေးမိပျောက်ဆေးတွေ လွယ်လင့်တကူ ဝယ်မတိုက်သင့်ပါဘူး။ ဒီဆေးတွေဟာ ကလေးတွေရဲ့ ချောင်းဆိုးအအေးမိတာတွေကို တကယ်ပျောက်ကင်းသက်သာစေခြင်းမရှိသလို တိုက်သင့်တဲ့ပမာဏထက် ပိုတိုက်မိခဲ့ရင် ဘေးအန္တရာယ် ရှိစေနိုင်ပါတယ်။

အိပ်ချင်ငိုက်မျဉ်းတာ၊ ဗိုက်နာတာ၊ အနီကွက်တွေ၊ အင်ပြင်တွေထတာတွေအပြင် ဒီ့ထက်ပိုဆိုးတဲ့ နှလုံးခုန်မြန်လာတာ၊ တက်တာတွေပါရတတ်ပြီး နောက်ဆုံးအသက်သေဆုံးတဲ့အထိ အန္တရာယ်ရှိပါတယ်။ နှစ်စဉ်နှစ်တိုင်း ဒီဆေးတွေအလွန်အကျွံသောက်သုံးမိတဲ့ ကလေးထောင်ပေါင်းများစွာဟာ အရေးပေါ်ဌာနကို ရောက်လာတတ်ကြပါတယ်။

ဒါကြောင့် ကလေးလေးဟာ အအေးမိပြီး ဖျားနာနေတယ်ဆိုရင် အိမ်မှာ ရေနွေးငွေ့ရှုတာ စတဲ့ အိမ်တွင်းကုသမှုတွေနဲ့ အရင်ဆုံးကုသကြည့်နိုင်ပါတယ်။

၃။ အအန်ပျောက်ဆေး

ကလေးကို ဆရာဝန်မညွှန်ကြားပါပဲ ကိုယ်သဘောနဲ့ကိုယ် အအန်ပျောက်ဆေးတွေ မတိုက်သင့်ပါဘူး။ အအန်ပျောက်ဆေးဟာ ကလေးတွေမှာ ဆိုးကျိုးမြောက်များစွာ ဖြစ်စေနိုင်ပါတယ်။ ကလေးတွေဟာ ခဏတဖြုတ်သာ အန်တတ်ပြီး ဆေးသောက်စရာမလိုပဲ ပျောက်ကင်းသွားတတ်ပါတယ်။ ဒါပေမယ့် ဆက်တိုက်အန်ပြီး ခန္ဓာကိုယ်တွင်း ရေဓာတ်ဆုံးရှုံးမှုတွေ ဖြစ်ပေါ်လာပါက ဆေးရုံဆေးခန်းမှာ ပြသသင့်ပါတယ်။

၄။ လူကြီးဆေးများ

လူကြီးတွေအတွက် ထုတ်ထားတဲ့ဆေးတွေကို ကိုယ်အလေးချိန်နဲ့ အသက်အလိုက်သောက်သင့်တဲ့ ဆေးညွှန်းမပါပါက ကလေးတွေကို လုံးဝမတိုက်သင့်ပါဘူး။

၅။ အခြားကလေး၊ အခြားရောဂါအတွက် ပေးထားတဲ့ဆေးများ

အခြားကလေးကိုတိုက်တဲ့ဆေး၊ အခြားရောဂါအခြေအနေတစ်ခုအတွက် ပေးထားတဲ့ဆေး တွေကို တိုက်ခြင်းက ကလေးမှာ အကျိုးမရှိသလို အခန့်မသင့်ရင် ဘေးတောင်ဖြစ်စေနိုင်ပါတယ်။ ဒါကြောင့် ကလေးမှာ ဖြစ်တဲ့ရောဂါပေါ်မူတည်ပြီး ကလေးအတွက် သီးသန့်ပေးတဲ့ဆေးကိုသာ တိုက်ရပါမယ်။

၆။ ဒိတ်လွန်ဆေးများ

ဒိတ်လွန်နေတဲ့ဆေးတွေ၊ စဝယ်ခါစနဲ့မတူပဲ အရောင်ပြောင်း၊ ပုံစံပြောင်းနေတဲ့ဆေးတွေကို လွှင့်ပစ်လိုက်ပါ။ ဒီဆေးတွေကို တိုက်ခဲ့ရင် ဘေးဥပါဒ်တစ်စုံတစ်ရာ ဖြစ်စေနိုင်ပါတယ်။

၇။ ပါရာစီတမောလွန်ခြင်း

တစ်ချို့ဆေးတွေမှာ အဖျားကျ၊ အနာသက်သာစေဖို့အတွက် ပါရာစီတမော တစ်ပါတည်းထည့်ထားတတ်ကြပါတယ်။ ဒါကိုမသိပဲ ပါရာစီတမောထပ်တိုက်မယ်ဆိုရင် ဆေးပမာဏလွန်ကဲပြီး ဒုက္ခရောက်တတ်ပါတယ်။ ဒါကြောင့် ဆရာဝန်ကို မေးမြန်းကြည့်ပြီးမှသာ ပါရာစီတမောကို ထပ်တိုက်ပါ။

၈။ ဝါးစားလို့ရတဲ့ဆေးများ

ဝါးစားလို့ရတဲ့ဆေးတွေဟာ ကလေးငယ်လေးတွေမှာ နင်စေတတ်ပါတယ်။ ဒါကြောင့် ကလေးကို ဆေးလုံးတွေတိုက်မယ်ဆိုရင် ဆေးကိုကြိတ်တိုက်လို့ရမရ ဆရာဝန်ကို ကြိုတင်မေးမြန်းပြီး ဒိန်ချဉ်၊ ယိုစတဲ့ အစာပျော့ပျော့တစ်ဇွန်းနဲ့ ရောကျွေးနိုင်ပါတယ်။ ဒါပေမယ့် ဆေးပမာဏအပြည့်ဝင်အောင် တစ်ဇွန်းလုံးစားခိုင်းဖို့တော့ လိုပါလိမ့်မယ်။

၉။ Ipecac အရည်အန်ဆေး

Ipecac အန်ဆေးကို အဆိပ်သင့်ခြင်းအတွက် အရင်ကအသုံးပြုခဲ့ပါတယ်။ ဒါပေမယ့် နောက်ပိုင်းမှာတော့ ဘာအကျိုးမှမထူးဘူးလို့ ယူဆတဲ့အတွက် ဆရာဝန်များ အသုံးမပြုတော့ပါဘူး။ တကယ်တမ်းတော့ တစ်ချို့အဆိပ်သင့်ခြင်းများဟာ ပြန်အန်ခဲ့ရင် ပိုအန္တရာယ်ရှိတတ်ပါတယ်။ ဒါ့အပြင် ကလေးအတွက်အကျိုးရှိမယ့် ဆေးတိုက်ပြီးချိန်အထိ အန်နေခဲ့မယ်ဆိုရင် ကောင်းကျိုးထက်ဆိုးကျိုး ပိုများစေနိုင်ပါတယ်။

ဒါကြောင့် အိမ်မှာIpecacအန်ဆေးရှိနေရင် လွှင့်ပစ်လိုက်ပါ။ အဆိပ်မသင့်စေဖို့ အကောင်းဆုံးနည်းက ဆေးတွေ၊ အဆိပ်သင့်စေနိုငိတဲ့အရာတွေကို ကလေးတွေလက်လှမ်းမမီနိုင်တဲ့နေရာတွေမှာ ထားခြင်းပဲဖြစ်ပါတယ်။ အကယ်၍ ကလေး အန္တရာယ်ရှိတာတစ်ခုခု စားမိတယ်ဆိုရင် အရေးပေါ်ဌာနကို ချက်ချင်းပြေးသင့်ပါတယ်။

Dr. Mya Phoo Ngon (www.drmyanmar.com)

BMI တွက်ရန်

ကိုယ်၀န်ပတ်တွက်ရန်

ဆရာဝန်ကြီးများ၏ဆောင်းပါးများ