ကလေးတွေမှာဖြစ်တတ်တဲ့ဗောက်

Category

ကလေးများနှင့်ကျန်းမာရေး

ကလေးသေးသေးလေးတွေ၊ အထူးသဖြင့် တစ်လ၊နှစ်လအရွယ်ကလေးတွေရဲ့ခေါင်းမှာ အဖတ်တွေကွာနေတာ၊ အဝါရောင်ချွဲချွဲကြီးတွေဖြစ်နေတာ၊ အညိုရောင်အလွှာအလွှာတွေဖြစ်နေတာတွေကို တွေ့ရတတ်ပါတယ်။ ဒီရောဂါဟာ နှင်းခူရောဂါတစ်မျိုးဖြစ်ပေမယ့် ယားယံခြင်း၊ နာကျင်ခြင်းတွေ မရှိတတ်ပါဘူး။ ကလေးကိုခေါင်းလျော်တဲ့အခါ ဗောက်တွေလိုပဲ အဖတ်အဖတ်တွေ ကွာကျလာတတ်ပါတယ်။ ဒါကို infantile seborrheic dermatitis သို့မဟုတ် seorrheic eczemaလို့ခေါ်ပါတယ်။

ဒါ့အပြင် နား၊ မျက်ခုံး၊ မျက်ခွံ၊ ချိုင်းကြားနဲ့ အခြားအဆီထွက်တတ်တဲ့နေရာတွေမှာလညး် အဖတ်ဖတ်တွေကွာနေတာ တွေ့ရတတ်ပါတယ်။ ကြည့်ရဆိုးတတ်ပေမယ့် ဒီနှင်းခူအမျိုးအစားဟာ ကြီးလာလို့အချိန်တန်ရင် သူ့အလိုလိုပျောက်သွားပါလိမ့်မယ်။ အသက်၁၂နှစ်ကျော်တဲ့အခါ စိုးရိမ်စရာမလိုတော့ပါဘူး။ ဒီနှင်းခူအမျိုးအစားဟာ မကူးစက်နိုင်သလို ကလေးမသန့်ရှင်းလို့လည်း မဟုတ်ပါဘူး။ ဓာတ်မတည့်တာကြောင့်လည်း မဟုတ်ပါဘူး။

Ceelin 1

>> ရောဂါလက္ခဏာများ

မွေးကင်းစကလေးတွေမှာ အဓိကဖြစ်တတ်ပြီး တစ်နှစ်ကျော်ချိန်မှာဖြစ်တာ ရှားပါတယ်။ ၈လကနေ၁၂လကျော်အတွင်းမှာတင် ပျောက်သွားတတ်ပါတယ်။

ရောဂါလက္ခဏာတွေကတော့

• ဦးခေါင်း၊ မျက်ခုံး၊ နား၊ မျက်ခွံ၊ နှာခေါင်းနဲ့ ပေါင်ခြံတွေမှာ ကြွပ်ထူလိုက်တွေ၊ အကြေးခွဲလိုအဖတ်ဖတ်တွေဖြစ်နေခြင်း

• ဗောက်ထသလို အချပ်လွှာတွေ ဖြစ်နေခြင်း

• အနည်းငယ်နီရဲနေခြင်း

• အဆီပြန်တတ်တဲ့အရေပြားပေါ်မှာအဝါရောင်သို့မဟုတ်အဖြူရောင်အကြေးခွံလွှာတွေဖြစ်နေခြင်း

ဒီနှင်းခူရောဂါဟာ အဆီပြန်တဲ့ ဦးရေပြား၊ မျက်ခုံးနဲ့မျက်ခွံ၊ နားနောက်၊ နှာခေါင်းကြား၊ ရင်ဘတ်၊ ပေါင်ခြံနဲ့ အခြားနေရာတွေမှာ ဖြစ်လေ့ရှိပါတယ်။

ကလေးဆရာဝန်ဟာ စမ်းသပ်ကြည့်ရုံမျှနဲ့ ဗောက်နှင်းခူရောဂါကို သိနိုင်ပြီး ကုသနည်းအမျိုးမျိုးနဲ့ ကုသနိုင်ပါတယ်။

Ceelin 2

>> ဘာကြောင့်ဖြစ်ရတာလဲ?

ဘာကြောင့်ဖြစ်ရတယ်အတိအကျမသိပေမယ့် ယူဆချက်အမြောက်အများရှိပါတယ်။ သေချာတာတစ်ခုကတော့ ဓာတ်မတည့်တာ၊ ညစ်ပတ်တာတွေကြောင့် ဖြစ်ရတာမဟုတ်ဘူးဆိုတာပါပဲ။

အကြောင်းရင်းအများကြီးကြောင့် ဖြစ်နိုင်ပြီး ဒီထဲကတစ်ချက်ကတော့ ကလေးမမွေးမီ သနေ္ဓသားဘဝမှာ မိခင်ဆီကနေရရှိလာတဲ့ ဟော်မုန်းတွေကြောင့် ကလေးအသားမှာအဆီတွေအများကြီးထွက်လာတာလို့ ဆရာဝန်အများစုက ယူဆကြပါတယ်။

နောက်အကြောင်းရပ်တစ်ခုကတော့ အဆီထဲမှာ ဘတ်တီးရီးယားပိုးနဲ့အတူ ကြီးထွားတဲ့ Malasseziaလို့ခေါ်တဲ့မှိုပိုးတစ်မျိုးကြောင့်လို့ ယူဆကြပြီး မိသားစုမျိုးရိုးကြောင့်လည်း ဖြစ်နိုင်ပါတယ်။

ဘာကြောင့်ဖြစ်သလဲအတိအကျမပြောနိုင်ပေမယ့် မကူးစက်နိုင်သလို ကလေးအတွက်လည်း အနှောင့်အယှက်မဖြစ်ပါဘူး။ ပြင်းထန်တဲ့ရောဂါမှာတော့ ယားယံနိုင်ပေမယ့် ရောဂါပျော့ပျော့ကတော့ မယားတတ်ပါဘူး။

>> ဘယ်လိုကုသမလဲ?

သူ့အလိုလိုပျောက်သွားတတ်တာကြောင့် ဘာမှကုသဖို့ မလိုအပ်ပါဘူး။ ဒါပေမယ့် မြင်ရတာစိတ်မချမ်းသာရင် ဒီနည်းလမ်းလေးတွေလုပ်ကြည့်နိုင်ပါတယ်။

• ကလေးဦးရေပြားကို ကလေးသုံးဆီလေးနည်းနည်းနဲ့ နှိပ်နယ်ပေးပါ။ ဆီတွေက ကြွပ်ထူထူအဖတ်တွေကို ပျော့သွားစေဖို့ ၁၀မိနစ်မှ၁၅မိနစ်ခန့်စောင့်ပါ။ လက်နဲ့ သို့မဟုတ် အဝတ်ခြောက်လေးနဲ့ သို့မဟုတ် ဘရပ်ချ်ပါးပါးလေးနဲ့ အဖတ်လေးတွေကို ခွာပေးပါ။ ပြီးနောက် ကလေးကိုခေါင်းလျော်ပေးပါ။

• ကလေးကိုတစ်နေ့တစ်ကြိမ်ခေါင်းလျော်ပေးပြီး ခေါင်းကိုစင်အောင်ဆေးပါ။ ပြီးမှ တဘတ်အခြောက် သို့မဟုတ် ဘရပ်ချ်အပျော့လေးနဲ့ အဖတ်လေးတွေကို ရှင်းပေးပါ။

• ကလေးရဲ့နှင်းခူဗောက်ဖတ်လေးတွေက ထင်ရှားနေပြီး ကလေးအသက်၆လကျော်လာပါက ဒီအခြေအနေကိုကုသဖို့ ထုတ်ထားတဲ့ ခေါင်းလျော်ရည်နဲ့လျော်ပေးနိုင်ပါတယ်။ သတိထားဖု့ိက ဒီခေါင်းလျော်ရည်တွေမှာ salicylic acid, selenium နဲ့ ကတ္တရာတွေပါနိုင်တာကြောင့် ကလေးမျက်လုံးထဲဝင်ရင် စပ်နိုင်ပါတယ်။

အထက်ပါနည်းတွေက မသက်သာစေဘူးဆိုရင် ကလေးဆရာဝန်နဲ့ ပြသသင့်ပါတယ်။ ဆရာဝန်က ပိုပြီးထိရောက်မှုဖြစ်စေမယ့် ခေါင်းလျော်ရည်ပေးပါလိမ့်မယ်။ ဒါမှမဟုတ် ရောဂါနောက်တစ်ခုရှိမရှိ ရှာဖွေပါလိမ့် မယ်။ တစ်ခါတစ်ရံ ဦးရေပြားသန်ကောင်ကလည်း ဒီလိုပုံစံနဲ့ လာနိုင်တဲ့အတွက် မှိုပိုးသတ်ဆေးပါတဲ့ ခေါင်းလျော်ရည်နဲ့ ကုသဖို့လိုနိုင်ပါတယ်။

Dr. Mya Phoo Ngon (www.drmyanmar.com)

BMI တွက်ရန်

ကိုယ်၀န်ပတ်တွက်ရန်

ဆရာဝန်ကြီးများ၏ဆောင်းပါးများ