ကလေးတွေမှာ ချောင်းဆိုးရခြင်း အကြောင်းအရင်းများ
ဘာကြောင့် ချောင်းဆိုးရတယ်ဆိုတာပြောရရင် ပြောမကုန်နိုင်တာမို့ ကလေးတွေမှာ အဖြစ်များတဲ့အကြောင်းရင်းတွေကိုပဲ အဓိက ဖော်ပြသွားပါမယ်။
အအေးမိခြင်း : အအေးမိတယ်ဆိုတာဟာ ဗိုင်းရပ်စ်ကြောင့်ဖြစ်ပြီး အသက်ရှူလမ်းကြောင်းအပေါ်ပိုင်းမှာ ချွဲသလိပ်တွေ ထွက်လာတတ်ပါတယ်။ ဒီကနေ ချွဲတွေဟာ အောက်ပိုင်းကိုကျလာတဲ့အခါ ချောင်းဆိုးတော့တာပေါ့။ အအေးမိတာဟာ ၁၀ ရက်လောက်နဲ့ ပျောက်နိုင်ပေမယ့် ချောင်းဆိုးတာကတော့ ဒီထက်ပိုကြာရှည်နိုင်ပါတယ်။
ဗိုင်းရပ်စ်ချောင်းဆိုးခြင်း : အအေးမိတာနဲ့တူပေမယ့် အသက်ရှူလမ်းကြောင်းအောက်ပိုင်းကို ဝင်တာမို့ နှာစေး၊ နှာပိတ်တာမျိုးမရှိဘဲ ချောင်းဆိုးတာကလည်း ရက်သတ္တပတ်မျှ ကြာနိုင်ပါတယ်။
Atussin Kids 1
ရာသီတုပ်ကွေး : ရာသီတုပ်ကွေးဟာ ဖျားခြင်း၊ ကိုယ်လက်ကိုက်ခြင်း၊ နုံးခြင်း၊ ခေါင်းကိုက်ခြင်း၊ လည်ချောင်းနာခြင်းနဲ့ ချောင်းဆိုးခြင်းတို့ကို ဖြစ်စေနိုင်တဲ့ ဗိုင်းရပ်စ်အပြင်းစားတစ်မျိုး ဖြစ်ပါတယ်။ အအေးမိတာနဲ့စာရင် ရာသီတုပ်ကွေးက ချွဲသလိပ်ထွက်တာနည်းပြီးတော့ အဖျားပိုကြီးတတ်ပါတယ်။
နမိုးနီးယားအဆုတ်ရောင်ခြင်း : မိဘတွေ အစိုးရိမ်ဆုံးရောဂါတစ်ခုပါ။ များသောအားဖြင့် အအေးမိရာကနေတစ်ဆင့် ရောဂါပိုးဝင်ပြီးတော့ အဆုတ်ရောင်တာ အဖြစ်များပါတယ်။ ကလေးအသက်ရှူကြပ်လာပြီဆို ဆရာဝန်နဲ့ အမြန်ပြပါ။ နမိုးနီးယားဟာ ဗိုင်းရပ်စ်ကြောင့်လည်း ဖြစ်နိုင်တာကြောင့် ပိုးသတ်ဆေး လိုချင်မှလိုပါလိမ့်မယ်။ ကလေးကြီးတွေမှာ Mycoplasma ဘတ်တီးရီးယားကြောင့်ဖြစ်တဲ့ နမိုးနီးယားမျိုးလည်း အဖြစ်များတာမို့ ဆရာဝန်နဲ့ပြပြီး ဓာတ်မှန်ရိုက်ဖို့ လိုကောင်းလိုနိုင်ပါတယ်။
အဆုတ်ပြွန်ငယ်များ ရောင်ရမ်းခြင်း : RSV လို့ခေါ်တဲ့ ဗိုင်းရပ်စ်ကြောင့်ဖြစ်ပြီး အဆုတ်ပြွန်ငယ်လေးတွေမှာ ချွဲတွေပိတ်တာမို့ ချောင်းတအားဆိုးတာ၊ အသက်ရှူခက်တာ၊ တရွှီရွှီမြည်တာတွေ ဖြစ်နိုင်ပါတယ်။ ကလေးငယ်လေးတွေမှာ အဖြစ်များပါတယ်။
အသံအိုးရောင်ခြင်း : ဗိုင်းရပ်စ်ပိုးကြောင့်ဖြစ်ပြီး အသက်ရှူလမ်းကြောင်းအပေါ်ပိုင်း ရောင်ရမ်းတာဖြစ်ပါတယ်။ ချောင်းဆိုးသံကြီး ဩနေပြီးတော့ အသက်ရှူတိုင်း ဝီစီမှုတ်သလို အသံထွက်နေတတ်ပါတယ်။ ရေနွေးငွေ့ရှူပေးခြင်းဖြင့် ချောင်းဆိုးတာကို သက်သာစေနိုင်ပါတယ်။
Atussin Kids 2
ထိပ်ကပ်နာ : နှာစေး၊ နှာပိတ်တာ ၂ ပတ်ကြာအောင် မပျောက်၊ ပိုဆိုးလာတယ်၊ ခေါင်းကိုက်တယ်၊ မျက်နှာတွေနာတယ်၊ အဖျားတက်လာတယ်ဆိုရင် ထိပ်ကပ်နာလို့ စခေါ်နိုင်ပါပြီ။ ပိုးသတ်ဆေးမလိုဘဲ သူ့အလိုလို ပျောက်နိုင်တာမို့ အရမ်းစိုးရိမ်စရာမလိုပေမယ့် ဆရာဝန်နဲ့ တိုင်ပင်ကြည့်ရင်တော့ ပိုကောင်းပါတယ်။
ကြက်ညှာချောင်းဆိုး : ရိုးရိုးဖျားရာကနေ တဖြည်းဖြည်း ချောင်းစဆိုးလာတတ်ပါတယ်။ ကလေးငယ်လေးတွေမှာတော့ အသက်ရှူသွင်းလိုက်တဲ့အခါ ဆက်တိုက်ချောင်းဆိုးလာပြီး အသက်ရှူရပ်သွားတဲ့အထိ ဖြစ်နိုင်ပါတယ်။ ကလေးကြီးတွေမှာတော့ ချောင်းအဆက်မပြတ်ဆိုးပြီးနောက် အန်ထွက်တတ်ကြပါတယ်။ အသက်အန္တရာယ်လည်းရှိနိုင်ပြီး ရက်တစ်ရာချောင်းလို့ခေါ်သလို ၃ လလောက်အထိ ချောင်းဆိုးနိုင်တာမို့ ကာကွယ်ဆေးကို မဖြစ်မနေ ထိုးဖို့လိုပါတယ်။
လေပြွန်ရောင်ခြင်း : လေပြွန်ရောင်တာဟာ ဆေးလိပ်သောက်သူ လူကြီးတွေမှာပိုဖြစ်ပြီး ကလေးတွေမှာ အဖြစ်နည်းပါတယ်။ ဗိုင်းရပ်စ်ပိုးကြောင့်ဖြစ်တာမို့ ပိုးသတ်ဆေး မလိုတတ်ပါဘူး။
ပန်းနာရင်ကြပ် : ပန်းနာရင်ကြပ်ဆိုတာ ရောဂါပိုးကြောင့် ဖြစ်တာမဟုတ်ပေမယ့် အအေးမိခြင်းဟာ ပန်းနာထစေနိုင်တဲ့အကြောင်းရင်းတစ်ချက်ပါ။ ဒါကြောင့်ဖျားနေရာကနေ တရွှီရွှီကြပ်လာတယ်ဆိုရင် ဆရာဝန်နဲ့ပြပါ။ ကလေးချောင်းဆိုးတာ ၄ ပတ်ကျော်လာပြီဆိုရငိ တရွှီရွှီမမြည်ရင်တောင် ချောင်းဆိုးပန်းနာရင်ကြပ်တစ်မျိုး ဖြစ်နိုင်တာမို့ ဆရာဝန်နဲ့ပြပါ။
Dr. Mya Phoo Ngon (www.drmyanmar.com)
Related News And Articles
ကလေးတစ်ယောက်ဟာ Growth spurt လို့ခေါ်တဲ့ လျင်မြန်စွာကြီးထွားချိန်ကို သူ့သက်တမ်းတစ်လျှောက်မှာ ဘေဘီလေးအရွယ်၊ မူကြိုအရွယ်နဲ့ ကလေးမှလူကြီးသို့ ကူးပြောင်းသောအရွယ်ဆိုပြီး အရွယ်သုံးပါးမှာ တွေ့ကြုံနိုင်ပါတယ်။ လျင်မြန်စွာကြီးထွားချိန်ရောက်ရင် ကလေးတွေမှာ အရပ်နဲ့ ကိုယ်အလေးချိန် မြင့်တက်လာခြင်း၊ အစာစားချင...
ရာသီဥတုကလည်း တဖြည်းဖြည်း အေးစပြုလာပြီဆိုတော့ မေမေတို့ရဲ့ အသားအရေကို ဂရုစိုက်ပေးသလို ဘေဘီလေးတွေရဲ့ အသားအရေကိုလည်း ဂရုစိုက်ပေးဖို့ မမေ့ကြပါနဲ့နော်။ ဘေဘီလေးတွေရဲ့ အရေပြားဟာ အလွန်နူးညံ့တာကြောင့် ဆောင်လေအေးနဲ့ထိတွေ့တဲ့အခါ ခြောက်သွေ့ကြမ်းတမ်းလွယ်တတ်ပါတယ်။ ဒါကြောင့် ဆောင်းရာသီမှာ ဘေဘီလေးတို့အတွက် အသားအ...