ကလေးများနဲ့ TV၊ ဖုန်း၊ ကွန်ပျူတာဂိမ်း

• TV၊ ဖုန်း အစားထိုးအနေနဲ့ အခြားပျော်စေမယ့်နည်းလမ်းတွေကို ပြုလုပ်ပေးပါ။ ကလေးကို ဒါတွေမကြည့်ဘဲပိတ်စေချင်တယ်ဆိုရင် ကလေးပျော်စေမယ့် ကစားနည်းတွေ၊ အပြင်မှာထွက်ကစားတာမျိုးတွေ လုပ်ပေးပါ။

• ကလေးတွေနဲ့ သေချာစကားပြောပေးဖို့လည်းအရေးကြီးပါတယ်။  ကလေးတွေကြည့်ခဲ့တဲ့အစီအစဉ်တွေအကြောင်း ပြောပြခိုင်းပြီး ကိုယ့်ရဲ့ထင်မြင်ချက်၊ ယုံကြည်ချက်နဲ့ တန်ဖိုးထားမှုတွေကို မျှဝေပေးပါ။

• TV မှာ ကလေးကိုမပြသင့်တာတွေလာရင် ပိတ်လိုက်ပြီး ကလေးနဲ့စကားပြောနေလိုက်ပါ။

• တကယ်လို့ TV အစီအစဉ်ထဲမှာ အချို့သော လူတွေရဲ့ စရိုက်တွေက မကောင်းဘူး (သို့) တရားဥပဒေနဲ့မညီညွတ်ဘူးလို့ဆိုရင် လူအချင်းချင်းတရားမျှတစွာဆက်ဆံဖို့ ဘာကြောင့်အရေးကြီးကြောင်းသေချာပြောပြပေးပါ။

• စိတ်ရှုပ်စရာကောင်းတဲ့အခြေအနေတွေ၊ ပြောဖို့ခက်ခဲတဲ့အကြောင်းအရာတွေ ( လိင်မှုကိစ္စ၊ အချစ်၊ မူးယစ်ဆေး၊ အရက်၊ ဆေးလိပ်သောက်ခြင်း၊ အလုပ်၊ အမူအကျင့်၊ မိသားစုဘဝ) စတာတွေကို အစီအစဉ်တွေ၊ ဂိမ်းတွေကနေ တဆင့်ပြောလို့ရပါတယ်။ ကလေးတွေကို TV၊ ဖုန်းမှာကြည့်ရတာတွေကို မေးခွန်းထုတ်တတ်ဖို့နဲ့သင်ယူတတ်ဖို့ သင်ကြားပေးပါ။

>>> ဖုန်းဂိမ်း၊ ကွန်ပြူတာဂိမ်းတွေနဲ့ပတ်သက်ရင် <<<

• အဆင့်သတ်မှတ်ချက်တွေကိုကြည့်ပါ။ ဂိမ်းတွေမှာ ကြမ်းတမ်းမှု၊ လိင်မှုဆိုင်ရာနဲ့ အခြားကလေးတွေနဲ့မသင့်တော်တဲ့အရာတွေအတွက် သတ်မှတ်ချက်တွေရှိပါတယ်။ အသက် ဘယ်အရွယ်အတွက်သင့်တော်တယ်၊ အရွယ်ရောက်သူများသာ စတဲ့သတ်မှတ်ချက်တွေကို သေချာကြည့်ပြီးမှ ကိုယ့်ကလေးကို ကစားခွင့်ပြုပါ။

• ဂိမ်းကို အရင်လေ့လာကြည့်ပါ။ ကလေးကို ဂိမ်းတစ်ခုကစားခွင့်မပြုခင်မှာ အဆင့်သတ်မှတ်ချက်တွေကို ကြည့်ရုံသာမက ဖြစ်နိုင်ရင် ကိုယ်တိုင်အရင်ကြည့်ဖို့၊ ကစားကြည့်ဖို့အရေးကြီးပါတယ်။ သူများသတ်မှတ်ထားတာနဲ့ ကိုယ့်ရဲ့သတ်မှတ်ချက်က ကွဲပြားနိုင်ပါတယ်။

Dr. Mya Myo Myo Swe (www.drmyanmar.com)