ကလေး သွားပေါက်တဲ့အခါ စိတ်ပူပန်ရခြင်း မဖြစ်စေဖို့

(Unicode)

>>    ကလေး သွားပေါက်တဲ့ လက္ခဏာများ
●    သွားဖုံးများနီပြီး ရောင်ရမ်းခြင်း
●    သွားရည်များ ပိုကျလာခြင်း
●    သွားဖုံးကို ပွတ်တိုက်နေခြင်း၊ ကိုက်ခြင်း (သို့) စုပ်ခြင်း
●    အစား ကောင်းကောင်းမစားခြင်း
●    ပါးပြင်နီရဲခြင်း
●    သွားထွက်လာတဲ့ တစ်ဖက်တည်းမှာရှိတဲ့ နားကို ပွတ်သပ်ခြင်း
●    ဂဏှာမငြိမ်ခြင်း၊ ညဘက် မအိပ်ခြင်းနှင့် နေ့ဘက်မှာလည်း နိုးနေခြင်း
    သွားဖုံးကို သွားဖောက်ပြီး ထွက်မလာခင်လေးမှာ ကလေးက ကိုယ်ပူတာ (သို့) ဝမ်းလျှောတာတွေလည်း ဖြစ်နိုင်ပါတယ်။ ဒါပေမဲ့ ဒီလက္ခဏာတွေ အကုန်လုံးက သွားပေါက်တဲ့လက္ခဏာလို့ ယူဆလို့မရပါဘူး။ မသေချာဘူးဆိုရင် ဆရာဝန်နဲ့ တိုင်ပင်လို့ရပါတယ်။

>>    သွားရည်တွေကျလို့ ကလေးရဲ့မေးစေ့မှာ အဖုအပိမ့်အကွက်တွေဖြစ်ရင် ဘာလုပ်ပေးနိုင်သလဲ?
    ကလေးရဲ့ မေးစေ့ပေါ်က တံတွေးတွေကို နူးညံ့တဲ့ ချည်ထည်အဝတ်လေးနဲ့ ညင်သာစွာ သုတ်ပေးပါ။ အကြမ်းပတမ်း ပွတ်တိုက်ရင် ကလေး အနာဖြစ်နိုင်တဲ့အတွက် သတိထားပါ။ ကလေး အိပ်ရာဝင်ချိန်၊ အပြင်ထွက်ချိန်နဲ့ အဆင်ပြေတဲ့အချိန်တွေမှာ မေးစေ့ကို ကလေး မျက်နှာလိမ်းခရင်မ် လိမ်းပေးခြင်းဖြင့် ကလေးအရေပြားကို မထိခိုက်အောင် ကာကွယ်ပေးနိုင်ပါတယ်။

>>    ကလေး သွားဖုံးနာခြင်းကို သက်သာစေမည့် အကောင်းဆုံးနည်းလမ်းများ
●    ကလေးရဲ့သွားဖုံးကို လက်သန့်သန့်လေးနဲ့ ပွတ်သပ်ပေးခြင်းအားဖြင့် အနာကို ခဏတာ သက်သာစေနိုင်ပါတယ်။
●    သွားကိုက်ကွင်းတွေ ပေးထားလို့ ရပါတယ်။ အရည်တွေပါတဲ့ ကွင်းတွေထက် ဆီလီကွန် အခြေခံပြီးလုပ်ထားတဲ့ ကွင်းတွေက ပိုကောင်းပါတယ်။ ကလေးကို ပေးမကိုက်ခင် သွားကိုက်ကွင်းကို ရေခဲသေတ္တာထဲ ခဏထည့်ထားပြီးမှ ကိုက်စေပါ။ အခဲခန်းထဲတော့ မထည့်ပါနဲ့။ ကလေးသွားဖုံးကို ထိခိုက်စေနိုင်ပါတယ်။
●    ချိုလိမ် ပေးကိုက်ထားခြင်းကလည်း အနာသက်သာစေနိုင်ပါတယ်။
●    နောက်တစ်မျိုးက နာတာ သက်သာစေဖို့အတွက် ပါရာစီတမော ပါဝင်တဲ့ Biogesic for Kids လို ဆေးရည်မျိုးကိုလည်း တိုက်ပေးလို့ရပါတယ်။
    အသက် ၆ လအထက် ကလေးတွေကို ငှက်ပျောသီး၊ သခွားသီးစတဲ့ အေးပြီးနူးညံ့တဲ့ အစားအစာတွေ ပေးဝါးခိုင်းထားလို့ ရပါတယ်။ မာတဲ့အစားအစာတွေက ကွဲကြေပြီး ကလေးကို နင်စေနိုင်တဲ့အတွက် မာတဲ့အရာတွေ မကျွေးပါနဲ့။

>>    သွားပေါက်ချိန်က ဘယ်လောက်ကြာနိုင်သလဲ?
    ကလေး ပထမဆုံး သွားစပေါက်မယ့်အချိန်ဆိုပြီး တိတိကျကျ သတ်မှတ်ထားတာမရှိပါဘူး။ ကလေးအများစုက အသက် ၆ လမှာ သွားစထွက်လေ့ရှိပေမယ့် ကလေး မမွေးခင်ကနေပြီး အသက် ၁ နှစ်ကျော်တဲ့အထိ အချိန်မရွေး ပေါက်နိုင်ပါတယ်။ ကလေး သွားပေါက်တာက တစ်နှစ်နှင့်အထက် ကြာတတ်ပြီး ကလေးက အသက် ၂ နှစ်ခွဲအရွယ်မှာတော့ ငယ်သွားစုံသင့်ပါပြီ။
    ကလေးသွားလေးက သွားဖုံးကနေ ထိုးထွက်လာဖို့ ဘယ်လောက်ကြာမယ်ဆိုတာ မသိနိုင်ပါဘူး။ သွားထွက်မလာခင် ရက်အနည်းငယ်လောက်တော့ ကလေး ဒုက္ခခံရနိုင်ပါတယ်။ သတင်းကောင်းကတော့ ပထမဆုံး စပေါက်တဲ့သွားက ခံရအခက်ဆုံးဖြစ်ပြီး နောက်သွားတွေ ထွက်တဲ့အချိန်မှာတော့ လွယ်လွယ်ကူကူနဲ့ အေးဆေးပါပဲ။
    နောက်ထပ် ခက်ခဲတဲ့အချိန်ကတော့ အံသွားတွေစပေါက်တဲ့ အသက် တစ်နှစ်အရွယ်လောက်ပဲ ဖြစ်ပါတယ်။ အံသွားတွေက အကြီးဆုံးသွားတွေ ဖြစ်တဲ့အတွက် ဒီသွားပေါက်တဲ့အချိန်က ဒုက္ခအရောက်ဆုံး ဖြစ်နိုင်ပါတယ်။ ဒါပြီးရင်တော့ ဒီခက်ခဲတဲ့အဆင့်တွေကို ပြန်လည်ကောင်းမွန်စေဖို့အတွက် အချိန်တွေပဲ ဖြစ်ပါတယ်။

Dr. Mya Myo Myo Swe (www.drmyanmar.com)