ကလေး အငိုမတိတ်တဲ့အခါ

(Unicode)

>>    ဘယ်လိုချော့ချော့ ကလေးအငိုမတိတ်တဲ့အခါ ဘာလုပ်သင့်သလဲ?
    ကလေးတွေဟာ အကြောင်းမရှိဘဲ မငိုတတ်ကြပါဘူး။ ဒါပေမဲ့ တစ်ခါတလေ ဘာကြောင့်ငိုနေသလဲ ကြံရာမရ ဖြစ်နေတဲ့အခါ ဒီနည်းလမ်းလေးတွေကို ကြိုးစားကြည့်ပါ။

1.     စုပ်စရာတစ်ခုခု ပေးလိုက်ပါ
    ချိုလိမ်ဖြစ်စေ၊ လက်မဖြစ်စေ စုပ်စေခြင်းဖြင့်ကလေးရဲ့နှလုံးခုန်သံကို မှန်စေကာ လှုပ်ရှားမှုတွေကို ငြိမ်စေပါတယ်။

2.     ပွေ့ဖက်ပြီး လှုပ်ပေးပါ
    ကလေးလေးတွေဟာ အမေ့ဗိုက်ထဲမှာနေတုန်းကလို နွေးထွေးလုံခြုံမှုကို ကြိုက်နှစ်သက်ကြပါတယ်။ ဒါကြောင့် ကလေး အငိုမတိတ်တဲ့အခါ ကလေးကို စောင်နွေးနွေးလေးထဲထည့်ပြီး စလွယ်သိုင်းလွယ်ပေးပါ။ တစ်ခါတလေ ဒီလိုပွေ့ဖက်ထားတာကို အနေကျပ်တဲ့ကလေးတွေလည်း ရှိတတ်ပါတယ်။ ဒီလိုကလေးတွေကိုတော့ နရီမှန်မှန်လှုပ်ပေးပါက အငိုတိတ်နိုင်ပါတယ်။

3.     သီချင်းနဲ့တီးလုံးများ
    သီချင်းဖွင့်တာပဲဖြစ်ဖြစ်၊ သားချော့တေးလေးဆိုတာပဲဖြစ်ဖြစ်၊ ချီပြီးအခန်းထဲပတ်ပြီး ကတာပဲဖြစ်ဖြစ် လုပ်ကြည့်ပါ။ ကလေ းဘယ်လိုသီချင်းမျိုးကို ကြိုက်သလဲ အမျိုးမျိုး စမ်းသပ်ကြည့်ပါ။

4.     ကြိမ်နှုန်းတူတဲ့ ဆူညံသံတွေ ဖွင့်ကြည့်ပါ
    ဖုန်စုပ်စက်သံဟာ တကယ်တော့ စိတ်ငြိမ်စေနိုင်တဲ့အသံမျိုး မဟုတ်ပေမယ့် ကလေးအများစုဟာ ဒီလို ကြိမ်နှုန်းတစ်ညီတည်းထွက်တဲ့ ဒီလိုဆူညံသံတွေနဲ့ ငြိမ်သွားတတ်ကြပါတယ်။ ဒီဆူညံသံတွေဟာ သန္ဓေသားဘဝမှာ အမေ့ဗိုက်ထဲက ကြားရတဲ့အသံမျိုးနဲ့ တူတာကြောင့် ဖြစ်နိုင်ပါတယ်။
    တချို့ကလေးတွေကျတော့ ပန်ကာ တဝီဝီလည်နေတဲ့အသံ၊ ရေတံခွန်က ရေကျသံ (Youtube တွေမှာ ရှာပြီး Download လုပ်ထားလို့ရပါတယ်) ဒီလိုအသံမျိုးတွေကို 10-15 မိနစ်လောက် နားထောင်ပြီး အိပ်သွားတာမျိုးလည်း ရှိပါတယ်။

5.     လေကောင်းလေသန့် ရယူပါ
    တစ်ခါတလေ ပြတင်းပေါက်ဖွင့်၊ တံခါးဖွင့်ပြီး အပြင်ကို ထွက်လိုက်တာက ကလေးကို အငိုတိတ်စေနိုင်ပါတယ်။ ကလေး ငြိမ်သွားရင် ဘေးပတ်ဝန်းကျင်ကိုကြည့်ပြီး ဘေးပတ်ဝန်းကျင်မြင်ကွင်းကို ကလေးကို ဖြည်းဖြည်းချင်း ပြောပြပါ။

6.     ရေနွေးနွေးနဲ့ ချိုးပါ
    တစ်ခါတလေ ရိုးရိုးရေချိုးတာမျိုးမဟုတ်ဘဲ ရေပန်း ဖြည်းဖြည်းဖွင့်ပြီး ချိုးကြည့်ပါ။ ကလေး မကြိုက်ရင်တော့ အတင်းမလုပ်ပါနဲ့။ တချို့ကလေးတွေကတော့ ကြိုက်တတ်ကြပါတယ်။

7.     လှုပ်ရှားပေးပါ
    လက်နဲ့ပွေ့ချီတာ၊ ကလေးသိုင်းလွယ်အိတ်နဲ့ ချီတာလောက်ဆို လုံလောက်ပါတယ်။ ဒါ့အပြင် လှုပ်ကုလားထိုင်၊ ပုခက်၊ ဆိုဖာပျော့ပျော့မှာလည်း လှုပ်ပေးနိုင်ပါတယ်။ ကားတစ်ပတ် လျှောက်မောင်းတာ၊ ကလေးတွန်းလှည်းနဲ့ တွန်းတာမျိုးတွေလည်း လုပ်ပေးနိုင်ပါတယ်။

8.     နှိပ်နယ်ပေးပါ
    ကလေးအများစုဟာ ပွတ်သပ်ခံရတာကို ကြိုက်တတ်ကြပါတယ်။ ဖွဖွသာသာလေး နှိပ်နယ်ပေးခြင်းက ကလေးကို သက်သောင့်သက်သာ ရှိစေပါတယ်။

    ဖေဖေ၊ မေမေတို့အတွက်လည်း တစ်ဆက်တည်း ပြောပြချင်ပါတယ်။ ငိုနေတဲ့ကလေးကို တော်ရုံနဲ့ ချော့မရတဲ့အခါ မိဘတွေ အလွန်စိတ်ညစ်တတ်ကြပါတယ်။ ကလေး ကြီးလာတဲ့အခါမှာတော့ ကလေးဟာ သူ့အလိုလို အငိုတိတ်အောင် နေတတ်လာပါလိမ့်မယ်။ ဒီအတောအတွင်းမှာတော့ ကလေးကို ဂရုစိုက်သလို ကိုယ့်ကိုယ်ကိုလည်း ဂရုစိုက်ဖို့လိုပါတယ်။ ဒါမှသာ ကလေးကို ပိုစိတ်ရှည်ရှည်နဲ့ ဂရုစိုက်နိုင်မှာ ဖြစ်ပါတယ်။ ဒါကြောင့် အရမ်းစိတ်ညစ်လာခဲ့ရင် ...
1.     ကလေးကို လုံခြုံတဲ့နေရာမှာ ခဏချပြီး ခဏငိုပါစေ။
2.     သူငယ်ချင်း၊ မိတ်ဆွေ၊ ဆွေမျိုးတွေကို ဖုန်းဆက်ပြီး အကြံဉာဏ်တောင်းပါ။
3.     ယုံကြည်ရတဲ့ တစ်ယောက်ယောက်ကို ခဏထိန်းခိုင်းပါ။
4.     သီချင်းအေးအေးလေးနဲ့ စိတ်ငြိမ်အောင် ကြိုးစားပါ။
5.     အသက်ဝဝရှူပါ။
    ကလေးငိုတာကို အရမ်းကြီး စိတ်မညစ်ပါနဲ့။ တစ်ခါတလေ ငိုလိုက်ခြင်းဖြင့် ကလေး စိတ်ပြေသွားတတ်ပါတယ်။ ကလေးဟာ ဒီအဆင့်ကို မကြာမီ ကျော်သွားမှာကို အမြဲကိုယ့်ကိုယ် သတိပေးနေပါ။ စိတ်တိုပြီး ကလေးကို လှုပ်ရမ်းခါတာမျိုး၊ ဆူပူကြိမ်းမောင်းတာမျိုး မလုပ်မိဖို့ လိုပါတယ်နော်။

www.drmyanmar.com