ကျွန်မကလေး အသက်ရှူမြန်နေသလား?

အသက်ရှူနှုန်းကို ရေတွက်တဲ့အခါ ကလေးငြိမ်နေတဲ့အချိန်ဖြစ်ဖို့ အရေးကြီးသလို ကလေးရဲ့ ရင်ဘတ်လေး မောက်လာတာကို တစ်မိနစ်အပြည့် ရေတွက်ပေးဖို့လည်း လိုအပ်ပါတယ်။ တစ်မိနစ်ရေတွက်လိုက်လို့ အသက်တစ်နှစ်အောက်ကလေးမှာ အကြိမ်ရေ ၆၀ ထက် ပိုများနေရင်၊ ဒါမှမဟုတ် ၁-၅ နှစ်ကလေးမှာ အကြိမ်ရေ ၄၀ ထက် ပိုများနေရင်တော့ အသက်ရှူမြန်ပြီး အန္တရာယ်ရှိတဲ့လက္ခဏာဖြစ်လို့ နီးစပ်ရာ ဆေးရုံ၊ ဆေးခန်းကို အမြန်ဆုံးပြသပေးသင့်ပါတယ်။

သားသားမီးမီးလေးတွေ အသက်ရှူမြန်တာဟာ ပန်းနာရင်ကြပ်၊ လေပြွန်ရောင်ခြင်း၊ အဆုတ်ရောင်ခြင်း အစရှိတဲ့ ရောဂါတွေကြောင့် ဖြစ်နိုင်ပါတယ်။ ပုံမှန်ကလေးတွေမှာတောင် အသက်ရှူလမ်းကြောင်းပိုးဝင်တာဟာ တစ်နှစ်ကို (၁၂) ကြိမ်လောက် ဖြစ်နိုင်တာမလို့  ရောဂါပြင်းထန်တဲ့အခါ အချိန်မီကုသမှုခံယူနိုင်အောင် မေမေတို့အနေနဲ့ ကလေးတွေရဲ့ ပုံမှန်အသက်ရှူနှုန်းကို သိထားတာဟာ မမှားပါဘူးနော်။

Dr. Aye Hsu Mon (www.drmyanmar.com)