ပန်းနာရင်ကြပ်ရှိမှန်း မသိခဲ့လို့

(Unicode)

    ပန်းနာရင်ကြပ်ရောဂါ ခံစားနေရတဲ့ သားရော၊ သမီးရောကြောင့် ဂျနီဖာတို့မိသားစု တော်တော် စိတ်ညစ်စရာတွေ များခဲ့ရတာပါ။  လွန်ခဲ့တဲ့နှစ်နှစ်လောက်ထိကနေစပြီး မိခင်ရော၊ ဖခင်ရော သိလိုက်ရတာက မွေးထားတဲ့ ကလေးနှစ်ယောက်လုံးမှာ ရင်ကြပ်ရောဂါ ရှိနေတာပါပဲ။
    သမီးကြီးက မကြာခဏ ချောင်းတဟွတ်ဟွတ် ဆိုးနေတတ်ပြီး အမြဲနေမကောင်းနေတတ်သူပါ။  ငယ်ငယ်ကတည်းက ဆရာဝန်ဆီ သွားပေမယ့် ခဏသက်သာပြီး သိပ်မကြာခင် ပြန်ဖြစ်တာပါပဲ။ အိပ်ရာဝင်ခါနီးတိုင်းလည်း ချောင်းလေးတဟပ်ဟပ် ချောင်းဆိုးသံ ညတိုင်းကြားနေရတဲ့ သမီးကြီးအတွက်ကြောင့်  မိဘနှစ်ပါးမှာ တစက်လေးမှ စိတ်မချမ်းသာခဲ့ရပါဘူး။ စိတ်မချမ်းသာပေမယ့် ဒီတိုင်းပဲ ကြည့်နေရပါတယ်။ ရာသီဥတုလေး ပြောင်းလာတိုင်း ချောင်းဆိုးနေတတ်ပြီး ပိုလည်း ဆိုးမလာတော့ ဒီတိုင်းထားမိလျက်သားပါပဲ။
    အသက် ၆ နှစ်လောက်ကျတော့ ဓာတ်မတည့်တာကို အထူးပြုလေ့လာတဲ့ပညာရှင် တစ်ယောက်နဲ့ဆုံမိပြီးမှ သမီးကြီးမှာ ဖုန်အမှုန်နဲ့ ဓာတ်မတည့်တာကြုံတိုင်း မကြာခဏ ကြပ်နေ၊ ချောင်းဆိုးနေမှာဖြစ်ကြောင်း၊ ပန်းနာရင်ကြပ်ရောဂါရှိနေတာဖြစ်ကြောင်း သိလိုက်ရပါတယ်။
    သိပ်မကြာပါဘူး။ သားငယ်မှာပါ ထပ်ဇာတ်လမ်းစလာပြန်ပါတယ်။ သမီးကြီးရဲ့ရင်ကြပ်ပန်းနာကနေ သင်ခန်းစာရခဲ့တဲ့ ဇနီးမောင်နှံဟာ အခုတဖန် သားငယ်လေးအတွက်ကို လျင်လျင်မြန်မြန်ပဲ ရောဂါရှာတွေ့ခဲ့ပါတယ်။ ဓာတ်ခွဲစစ်ဆေးချက်အရ သားငယ်ဟာ မြေပဲနဲ့ နို့နဲ့နို့ထွက်ပစ္စည်းတွေကို ဓာတ်မတည့်ကြောင်း တွေ့ရှိရပါတယ်။ အဲဒါတွေကို ရှောင်လိုက်ပြန်တော့ အတော်လေး နေပြန်ကောင်းလာပါတယ်။ ဒါပေမဲ့ အအေးပိုတဲ့နေ့တွေ လေပြင်းမိတဲ့အချိန်တွေ ဖုန်တွေ၊ သဲတွေနဲ့ ဆော့မိတဲ့ရက်တွေမှာ သားငယ်ဟာ အမြဲကြပ်နေတတ်တုန်းပါပဲ။
    သားငယ်အတွက်ကိုလည်း ဆရာဝန် ညွှန်ကြားတဲ့ ရှူဆေးလေးနဲ့ အထူးကုဆရာဝန်ဆီ သွားလိုက်ပြန်လိုက်နဲ့ လင်မယားနှစ်ယောက်လုံး ဗျာများကြရရှာပါတယ်။ အတော်စိတ်ရှုပ် စိတ်ပျက်စရာကောင်းတဲ့ ပန်းနာရင်ကြပ်ရောဂါလို့ ဆိုရမှာပါ။
    ဒါနဲ့ပဲ သိပ်အေးတဲ့ဒေသကို စွန့်ခွာပြီး ရာသီဥတုမျှတတဲ့ အပူပိုင်းမြို့တစ်ခုကို ပြောင်းခဲ့ကြပါတယ်။ အိမ်တွင်းအိမ်ပြင်ကိုလည်း ဖုန်မထစေဖို့ သဘာဝပြတင်းပေါက်တွေ ဖွင့်ထားပြီး လေဝင်လေထွက် ကောင်းစေတဲ့အပြင်  သမံသလင်း အပြည့်ခင်းလိုက်ပါတယ်။ အိမ်မှာ ပန်းကအစ မစိုက်၊ အိမ်မွေး တိရစ္ဆာန်လည်း မမွေးခဲ့ကြပါဘူး။ ဟိုသိပ်အေးတဲ့ဒေသမှာတုန်းက မကြာခဏ ချွဲထရင်ကြပ်ခဲ့ကြတဲ့ မောင်နှမနှစ်ယောက် အရင်လို မကြပ်တတ်တော့တာ တွေ့ရပါတယ်။ မောင်နှမနှစ်ယောက် အခုတော့ အတော်လေး ကျန်းမာရေး ကောင်းမွန်လာပြီး တစ်ရက်ကို တကြိမ်ခန့်သာ ဆေးရှူရပြီး မတည့်တဲ့ အစားအစာတွေကိုလည်း သတိရှိရှိဝေးဝေးထားတဲ့ မိခင်ဖခင်ကြောင့် သူတို့ လေးတွေ လက်ရှိကျန်းမာနေကြပါတယ်။
    တလောကတော့ သူများအိမ်သွားလည်ရင်း ခွေးလေးကို ပွေ့မိလို့ သားငယ် ရင်ပြန်ကြပ်သလို သူငယ်ချင်းတွေနဲ့ တိရစ္ဆာန်ရုံလိုက်သွားတဲ့ သမီးကြီးကိုလည်း ရင်ကြပ်လာလို့ ဆရာဝန်နဲ့ ပြန်ပြခဲ့ရတာတစ်ခုပါပဲ။
    ဒီအဖြစ်လေးကို ကြည့်ခြင်းအားဖြင့် နေရာဒေသ ပြောင်းလဲနေထိုင်ခြင်း၊ ကလေးတွေကို မတည့်တဲ့ အရာတွေကနေ ဝေးဝေးထားခြင်း ... ဥပမာ - ပန်း၊ မွေးပွအရုပ်၊  နွေးနွေးထွေးထွေးထားခြင်း၊ လေစိမ်းတိုက်မခံစေခြင်း၊ အိမ်မွေးတိရစ္ဆာန်များနှင့် မထိတွေ့စေခြင်း၊ အစားအစာ ဆင်ခြင်ကျွေးမွေးခြင်းတို့ဖြင့် အဆင်ပြေပြေနဲ့ ပန်းနာရင်ကြပ် မကြာခဏထတာကို အလွယ်တကူ ကာကွယ်နိုင်ပါတယ်နော်။

www.drmyanmar.com