မကြာခဏ လေပွဗိုက်နာတတ်တဲ့ရင်သွေးလေးကို ဘယ်လိုပြုစုမလဲ

>> ဘယ်လိုတတ်နိုင်သလောက် ကာကွယ်ပေးကြမလဲ ???

• ကလေးကို တခုခုကျွေးပြီးတိုင်း၊ နို့တိုက်ပြီးတိုင်း အိပ်ရာထဲလှဲမချလိုက်ပါနဲ့။ သူ့ကိုခဏတော့ မတ်မတ်လေးထားလိုက်တာဟာ လေပွတာကို ကာကွယ်ပေးပါတယ်။

• ကိုယ့်ပခုံးလေးပေါ်၊ ရင်ဘတ်ပေါ် အသာမှောက်တင်ထားပြီး ကျောလေးပုတ်ပေးရုံနဲ့ “ဂေ့”ဆိုပြီး လေထွက်သွားတတ်ပါတယ်။ 

• မုန်ညင်းဆီလေးနဲ့ ဘယ်မှညာကို ညင်ညင်သာသာလေးပွတ်ပြီး အဝိုင်းလိုက်လေးလိမ်းပေးပါ။ မုန်ညင်းဆီက ချောမွေ့အောင် ထည့်တာပါ။ အဓိကက အူလမ်းကြောင်းအတိုင်း အသာပွတ်လိမ်းပေးတာဖြစ်ပါတယ်။ ဗိုက်လေးပေါ်မှာ စောင်ပါးလေးခေါက်ပြီး တင်ထားလို့ရပါတယ်။

• ကလေးကို ခြေဖျားမအေးပါစေနဲ့။ နွေးထွေးစွာထားပါ။ အအေးမိတာနဲ့လေပွတာက ဆက်စပ်နေပါတယ်။ ကလေးက အပူအအေးမမျှတဲ့အခါ စားသမျှအစာမကြေတော့လို့ လေပွလာတတ်တာဖြစ်ပါတယ်။ 

• ဂတ်စ်ပါတဲ့ အချိုရည်တွေ လုံးဝမတိုက်သင့်ပါဘူး။ ဂတ်စ်ပါတဲ့ ရယ်ဒီမိတ်အချိုရည်တွေဟာ ကလေးလေပွဖို့ တရားခံအကြီးကြီးဖြစ်သွားတတ်လို့ပါ။

• အစာကို နည်းနည်းစီကျေညက်အောင် စိတ်ရှည်ရှည်ကျွေးပါ။ ဖြည်းဖြည်းကျွေးပါ။  စားသမျှကို အေးအေးဆေးဆေးစားတာဟာ လူကြီးတွေတင်မက ကလေးတွေမှာပါ လေပွတာ၊ အစာမကြေတာကို ကာကွယ်ပေးတတ်ပါတယ်။ 

• အစာကျွေးပြီး ရေတွေတွန်းမတိုက်ပါနဲ့။ ပျော့တဲ့အစာထဲမှာ ရေဓာတ်ပါပြီးသားမို့ တစ်ဇွန်းချင်း နည်းနည်းစီတိုက်ပါ။ အစာကျွေးပုံကို သတိထားလိုက်ရင်လည်း တော်ရုံလေမပွတော့ပါဘူး။

ဂျီပီငှက် (ဆေး/မန်း) (www.drmyanmar.com)