မိသားစုလိုက် အပန်းဖြေခရီးထွက်တဲ့အခါမျိုးမှာ ကလေးရဲ့ ကျန်းမာရေးကို ဘယ်လိုဂရုစိုက်ကြမလဲ

(Unicode)

    ကလေးရှိတဲ့ မိသားစုတွေအနေနဲ့ အပန်းဖြေခရီးထွက်တဲ့အချိန်မှာ ကလေး နေထိုင်မကောင်းဖြစ်ရင် အတော်စိတ်ရှုပ်ရပါတယ်။ ဆေးဆိုင်ကောင်းကောင်းမရှိတဲ့ ဒေသတွေကိုရောက်ရှိနေပါက ခေါင်းမီးတောက်ဖွယ်ပါပဲ။ ဒါကြောင့် ကလေးများနဲ့ ခရီးထွက်မယ့် မိဘတွေအတွက် အဆင်ပြေလွယ်ကူစေမယ့် နည်းလမ်းလေးများကို ဖော်ပြပေးလိုက်ပါတယ်။

(၁)     ဆေးသေတ္တာကို သေချာထည့်ပါ။
    ကလေးအတွက် မရှိမဖြစ်အသုံးဝင်မယ့် ဆေးများကို ထည့်သွားပါ။ ခရီးစဉ်တစ်လျှောက်လုံး မဖျားမနာဘဲ လန်းဆန်းတက်ကြွနေစေဖို့ အားဆေးတစ်မျိုးမျိုး (ဥပမာ - Enervon-C Kids) ကိုလည်း မဖြစ်မနေ ဆောင်သွားပြီး နေ့စဉ် မှန်မှန်တိုက်ပေးပါ။ သောက်ဆေးအပြင် အဖျားတိုင်းကိရိယာ (သာမိုမီတာ)၊ ပလာစတာ၊ အရက်ပြန်၊ အနာကျက်လိမ်းဆေးများကိုပါ သယ်ဆောင်သွားဖို့ လိုပါတယ်။

(၂)     လက်သန့်ရှင်းဖို့ အရေးကြီးပါတယ်။
    ရေနဲ့ဆပ်ပြာ အလွယ်တကူ အသုံးမပြုနိုင်တဲ့နေရာတွေအတွက် လက်ကို သေသေချာချာ သုတ်ပြီး လက်သန့်ဆေးရည်ဖြင့် ဆေးကြောပေးနိုင်ပါတယ်။ Wet Tissue တွေလည်း ဆောင်သွားပါ။ လေယာဉ်ထိုင်ခုံနဲ့ စားသောက်ဆိုင်စားပွဲတွေကို အသုံးမပြုခင်မှာလည်း အထက်ပါအတိုင်း သန့်ရှင်းပေးသင့်ပါတယ်။

(၃)     ရာသီဥတုအခြေအနေကို တွက်ဆပါ။
    တုပ်ကွေးအဖြစ်များသောရာသီမျိုးမှာ ခရီးသွားခြင်းကို တတ်နိုင်သမျှ ရှောင်ကြဉ်သင့်ပေမယ့် မဖြစ်မနေ သွားရမယ်ဆိုပါက ကလေးအား တုပ်ကွေးကာကွယ်ဆေး ကြိုတင်ထိုးပါ။ ခရီးတစ်လျှောက်မှာလည်း mask တပ်ပေးခြင်း အစာမစားခင် လက်ကို သန့်ရှင်းပေးခြင်း ပြုလုပ်သင့်ပါတယ်။

(၄)     ကျန်းမာရေးနဲ့ညီညွတ်သော မုန့်ပဲသရေစာများနဲ့ ရေဘူးကို မပါမဖြစ် သယ်သွားပါ။
    လေယာဉ်နဲ့ပဲသွားသွား၊ ကားနဲ့ပဲသွားသွား မုန့်များနဲ့ ရေဘူးကို သယ်ဆောင်သွားဖို့ မမေ့ပါနဲ့။ အလွယ်ဆုံးအနေနဲ့ သစ်သီးများနဲ့ ခရက်ကာများကို သယ်သွားနိုင်ပါတယ်။

(၅)     ခရီးမသွားခင် ဆရာဝန်နဲ့ ပြသပါ။
    မေမေတို့ရဲ့ သားသားမီးမီးလေးတွေမှာ ရောဂါတစ်စုံတစ်ရာရှိပါက ခရီးမထွက်ခင် ကလေးဆရာဝန်နဲ့ ပြသသင့်ပါတယ်။ ဆရာဝန်စစ်ဆေးချက်အရ ခရီးထွက်ဖို့ သင့်တော်မှာသာ သွားသင့်ပါတယ်။

လေပြေနုသွေး (ဆေး-၂) (www.drmyanmar.com)