ကိုယ်ဝန်ဆောင်စဉ် စိတ်ဓာတ်ကျရောဂါဖြစ်ရတာ ဘာကြောင့်လဲ

စိတ်ဓာတ်ကျရောဂါဆိုတာ ဘယ်သူမဆိုမှာ ဖြစ်နိုင်တဲ့ စိတ်ကျန်းမာရေးပြဿနာတစ်ခုပါ။ ဘယ်လိုမှ ဖြေဖျောက်လို့မရတဲ့ ဝမ်းနည်းမှုကို ခံစားရလေ့ရှိပြီး မိမိအရင်က ကြိုက်နှစ်သက်ခဲ့တာတွေကိုတောင် စိတ်မဝင်စားတော့တာမျိုး ဖြစ်နိုင်ပါတယ်။ စိတ်ဓာတ်ကျရောဂါဆိုတာ ရိုးရိုးဝမ်းနည်းတာထက် ပိုပါတယ်။ ကိုယ် ဘယ်လောက်ပဲ ကြိုးစားကြိုးစား အလွယ်တကူ ပျောက်မသွားမယ့် စိတ်ခံစားချက်မျိုးပါ။

ကိုယ်ဝန်ဆောင်စဉ် စိတ်ဓာတ်ကျရောဂါဆိုတာ ကိုယ်ဝန်ရှိနေတဲ့အချိန်အတွင်းမှာပဲ အမျိုးသမီးတွေ ခံစားရတဲ့ စိတ်ကျန်းမာရေးရောဂါတစ်မျိုးပါ။ တချို့သော ကျန်းမာရေးပြဿနာတွေလိုပါပဲ။ ကိုယ်ဝန်ဆောင်စဉ် စိတ်ဓာတ်ကျတာဟာ အကြောင်းရင်းမရှိဘဲ ဖြစ်တတ်ပါတယ်။ တချို့အမျိုးသမီးတွေမှာပဲဖြစ်ပြီး တချို့မှာ ဘာကြောင့်မဖြစ်ရတာလဲဆိုတာတော့ သေချာမသိကြသေးပါဘူး။

တချို့သော ကျန်းမာရေးပြဿနာတွေနဲ့ အကြောင်းအရာတချို့ဟာ ကိုယ်ဝန်ဆောင်စဉ် စိတ်ဓာတ်ကျရောဂါ ဖြစ်နိုင်ချေကို ပိုမြင့်တက်စေပါတယ်။
၁။  အပေါင်းအသင်းတွေဆီက အားပေးကူညီမှုမရှိခြင်း
ကိုယ်ဝန်ပြုစုစောင့်ရှောက်နည်းတွေကို မျှဝေပေးတဲ့အဖွဲ့များ၊ ကလေးနို့တိုက်နည်းနဲ့ ဖြည့်စွက်အာဟာရကျွေးနည်းတွေကို မျှဝေပေးတဲ့အဖွဲ့များဟာ ကိုယ်ဝန်နဲ့ကလေး ပြုစုစောင့်ရှောက်မှုကို လေ့လာသင်ယူနိုင်တဲ့ အကောင်းဆုံးနည်းလမ်းတွေပါ။ ဒါ့အပြင် ကိုယ်ဝန်ဆောင်စဉ် စိတ်ဓာတ်ကျရောဂါမဖြစ်အောင် ကာကွယ်ဖို့အတွက်လည်း ကူညီပေးနိုင်ပါလိမ့်မယ်။ လေ့လာချက်တစ်ခုအရ ကိုယ်ဝန်ဆောင်စဉ် မိမိပတ်ဝန်းကျင်မှာ အမျိုးသား၊ မိသားစု၊ ကိုယ်ဝန်ဆောင်မိခင်အချင်းချင်း စတဲ့ အားပေးကူညီမယ့်သူတွေ ရှိနေခြင်းဟာ ကိုယ်ဝန်ဆောင်စဉ် စိတ်ဓာတ်ကျရောဂါဖြစ်နိုင်ချေကို လျော့နည်းစေပါတယ်။ ကိုယ်ဝန်ဆောင်ခြင်းနဲ့ ကလေးမွေးဖွားပြုစုခြင်းဟာ  အမျိုးသမီးတွေရဲ့ဘဝမှာတော့ ကြီးမားတဲ့ပြောင်းလဲမှုတစ်ခုပါ။ ဒါကြောင့် ဒီအချိန်ကို တစ်ယောက်တည်း မဖြတ်သန်းဘဲနဲ့ ရင်းနှီးသူတွေဆီက အားပေးကူညီမှုကို ရယူပြီး ဖြတ်သန်းဖို့က အရေးကြီးပါတယ်။