ကိုယ်၀န်ဆောင်ချိန် ၀ိတ်ဘယ်လောက်တက်သင့်သလဲ

          ကိုယ်၀န်ဆောင်မိခင်တစ်ယောက်ဟာ မိခင်ရောကလေးပါ ကျန်းမာဖို့အတွက် သင့်တင့်မျှတတဲ့ အစာအာဟာရကို စားသုံးပေးဖို့လိုအပ်ပါတယ်။ အစာအာဟာရပြည့်၀အောင် စားသုံရာမှာလည်း ပမာဏများများ စားရတာမျိုးမဟုတ်ဘဲ တနေ့တာအတွက်လိုအပ်တဲ့ ကယ်လိုရီပြည့်မီအောင် စားသုံးရမှာဖြစ်ပါတယ်။ ပျမ်းမျှအားဖြင့် ကိုယ်၀န်ဆောင်အမျိုးသမီးတစ်ယောက်ဟာ ကိုယ်၀န်မဆောင်မီအချိန်ကထက် တနေ့မှာကယ်လိုရီ 300 ပိုပြီးလိုအပ်ပါတယ်။

          ကိုယ်၀န်ဆောင်ချိန်မှာရှိသင့် ရှိထိုက်တဲ့ကိုယ်အလေးချိန်ဟာ တယောက်နဲ့တစ်ယောက် မတူညီနိုင်ပါဘူး။ ပုံမှန်ကိုယ်အလေးချိန်ရှိတဲ့အမျိုးသမီးဟာ ကိုယ်၀န်ဆောင်ချိန်မှာပေါင်ချိန် 25 ပေါင်မှ 35 ပေါင်၊ သာမန်ရှိသင့်ရှိထိုက်တဲ့ အလေးချိန်ထက်လျှော့ကျနေတဲ့ အမျိုးသမီးတွေဟာ 28 ပေါင်မှ ပေါင် 40၊ အ၀လွန်တဲ့အမျိုးသမီးတွေဟာ 15 ပေါင်မှ 25 ပေါင် စသည်ဖြင့် ကိုယ်၀န်မဆောင်မီ အချိန်ကထက် ပေါင်ချိန်တိုးလာဖို့လိုအပ်ပါတယ်။

          ယေဘုယျအားဖြင့် ကိုယ်၀န်ဆောင်ပထမ 3 လအတွင်းမှာ 2 ပေါင်မှ 4 ပေါင်အတွင်းတက်ရန် လိုအပ်ပြီး ကျန်တဲ့ကိုယ်၀န်ဆောင်ကာလတွေမှာ တစ်ပတ်ကို တစ်ပေါင်နှုန်းဖြင့် အလေးချိန် တက်လာဖို့လိုအပ်ပါတယ်။ အထူးသဖြင့် အမွှာကိုယ်၀န်ဆောင်ထားတဲ့မိခင်တွေအနေဖြင့် ကိုယ်အလေးချိန်မှန်မှန်တက်ဖို့လိုအပ်ပါတယ်။

          ကိုယ်၀န်ဆောင်ချိန်မှာတက်လာတဲ့ ကိုယ်အလေးချိန်တွေဟာ မည်သည့်နေရာကိုရောက်ကုန်ပါသလဲ။

-   သန္ဓေသား 8 ပေါင်

-   အချင်း 2 ပေါင်မှ 3 ပေါင်

-   ရေမြွှာရေ 2 ပေါင်မှ 3 ပေါင်

-   ရင်သားတစ်သျှူး 2 ပေါင်မှ 3 ပေါင်

-   သွေးပမာဏ 4 ပေါင်

-   ကလေးမွေးဖွားရန်နှင့် နို့ချိုတိုက်ကျေွးရန် စုဆောင်းထားတဲ့အဆီပမာဏ 5 ပေါင်မှ 9 ပေါင်

-   သားအိမ် 2 ပေါင်မှ 5 ပေါင်

-   စုစုပေါင်း 25 ပေါင်မှ 35 ပေါင်

ကိုယ်၀န်ဆောင်ချိန်မှာ ကိုယ်အလေးချိန်လျော့ချသင့်သလား။

        ယေဘုယျအားဖြင့် ကိုယ်၀န်ဆောင်ချိန်မှာ ၀ိတ်လျှော့တာမျိုး၊ Diet လုပ်တာမျိုးလုံး၀မလုပ်ပါဘူး။ အ၀လွန်နေတယ်ဆိုရင်တော့ ဆရာ၀န်နှင့်တိုင်ပင်ပြီးမှ ကိုယ်အလေးချိန်ချသင့်ပါတယ်။

ကိုယ်၀န်ဆောင်ချိန်မှာ သင်တင့်မျှတတဲ့ ကိုယ်အလေးချိန်ရရှိအောင် ဘယ်လိုနေထိုင် စားသောက်သင့်သလဲ။

        ပမာဏနည်းနည်းဖြင့် တစ်နေ့ကို ငါးကြိမ်မှခြောက်ကြိမ်အစာစားပါ။ အခွံမာသီး၊ စပျစ်သီးခြောက်၊ ခရက်ကာမုန့်၊ ဒိန်ချဉ် စတဲ့အဆာပြေစာတွေကို မိမိနှင့်လက်လှမ်းမီးတဲ့နေရာမှာထားပါ။

          သကြားကိုရန်သူသဖွယ်ရှောင်ကြဉ်ပါ။ အာဟာရတန်ဖိုးနည်းပြီး ကယ်လိုရီပါ၀င်မှုများပြားတဲ့ ကွတ်ကီး၊ သကြားလုံး၊ ဒိုးနတ်၊ အားလူကြော် စတာတွေကို အမြဲလိုလိုစားသုံးဖြစ်နေတယ်ဆိုပါက အ၀လွန်နိုင်ချေတော်တော်များနေပါပြီ။ အချိုပွဲအနေနဲ့ သုံးဆောင်လိုပါက သဘာ၀သစ်သီး၊ အဆီပါ၀င်မှုနည်းတဲ့ ဒိန်ချဉ် စတာတွေကိုရွေးချယ်ပါ။

          ဆားမှာ ရေကိုစုဆောင်းထားတဲ့ဂုဏ်သတ္တိရှိပြီး အငန်ဓာတ်များတဲ့အစားအစာတွေက ကိုယ်အလေးချိန်တက်စေတာကြောင့် ဆားလျော့စားပါ။

          အစားအစာများကို ချက်ပြုတ်ပြင်ဆင်ရာမှာ ကျန်းမာရေးနဲ့ညီညွတ်တဲ့နည်းလမ်းကိုသာ အသုံးပြုပါ။ ဆီ၊ ထောပတ် စတာတွေနဲ့ကြော်မယ့်အစား အသားကင်၊ အသားပြုတ်စတာတွေကိုဦးစားပေးစားသုံးပါ။

          လေ့ကျင့်ခန်းလုပ်ပါ။ လေ့ကျင့်ခန်းအသင့်အတင့်ပြုလုပ်ခြင်းက ကယ်လိုရီအပိုတွေလောင်ကျွမ်းစေပါတယ်။ လမ်းလျှောက်ခြင်း၊ ရေကူးခြင်း စတဲ့လေ့ကျင့်ခန်းတွေဟာ ကိုယ်၀န်ဆောင်အမျိုးသမီးတွေအတွက် သင့်တော်တဲ့လေ့ကျင့်ခန်းတွေဖြစ်ပါတယ်။

Dr. Htet Htet Aung (www.drmyanmar.com)