အခြစ် ဆရာ၀န်

"လာပါပြီ လာပါပြီ ဒေါက်တာ ခြစ်ဖို့ လာပါပြီ" ဆရာမရဲ့ ပြောသံကြောင့် ဆေးရုံရှေ့ကို လှမ်းကြည့်လိုက်ရာ စောင်ပုခက် နှင့် လူနာ တစ်ယောက် ကို ထမ်းဝင်လာသည်ကို တွေ့လိုက်ရသည်
"တခြားလူနာ ဖြစ်မှာပါ ဆရာမရယ် " ဟု မချိပြုံးနှင့် ပြောလိုက်ပေမယ့် ဖြူဖျော့နေသော အမျိုးသမီးလူနာက လာနေကြ ပုံစံ အတိုင်းပင် ။
လူနာကို ကုတင်ပေါ်နေရာချ လိုအပ်တာ စမ်းသပ်ရင်း မေးလိုက်တော့ သွေးဆင်းလို့ ဆရာမတဲ့
"ကဲ ကျွန်မ မပြောလား " ဆိုသည့် ဆရာမ၏ အကြည့်ကို မသိချင်ယောင်ဆောင်ရင်း လိုအပ်တာ လုပ်ပေးကာ သားအိမ်ခြစ်ဖို့ ပြင်ရသည်။ တခုခုတော့ မှားနေပြီ။
ခုတလော သူမ တာဝန်ကျသည့်ရက်တိုင်းမှာ သားပျက်သားလျော လူနာတော်တော်များလာသည်။
အရင်တုန်းက ကြောက်ရသည့် သားအိမ်ခြစ်သည့် အလုပ်ကို ကျွမ်းကျင်အဆင့် နေ့တိုင်းခြစ်နေရတော့ သူမ စိတ်ညစ်လာလေပြီ။ ကံကောင်းလို့ အသေအပျောက် မရှိသေးတာပင် ။

လူနာတွေကို မေးတော့လဲ ချော်လဲလို့ စက်ဘီးစီးလို့ အကြောင်းအမျိုးမျိုးပြသည်။ ဘာ သတင်းမှ မရ။ မှားတော့ မှားနေလေပြီ။

" လာပြန်ပြီ အခြစ် ဆရာဝန်ရေ့" လူနာမှတ်တမ်းရေးနေစဉ် ဆရာမပြောသံကြောင့် လူနာခန်းဘက်ကူးပြီး စမ်းသပ်ရပြန်သည် ။
ဒီတခါ အမျိုးသမီးက ပိုဖြူဖျော့ကာ သွေးဆင်းများသည်။ သားအိမ်ခြစ်ဖို့ ပြင်နေစဉ် သွေးသွင်းဖို့ပါ ပြင်ဆင်ရသည်။ သွေးမပေါ်တာ ဘယ်နှစ်လ ရှိပြီလဲ ဆိုတော့ ခြောက်လတဲ့။ ဘုရားရေ လုပ်ရဲလိုက်တာ 
ဘာနဲ့ ဖျက်တာလဲဆို ဘယ်လိုမှ မေးမရ . . .
ဆူရင်း ပြောရင်းပင် လိုအပ်တာ လုပ်ပေးရသည်။ ရက်စက်လိုက်ကြတာနော် . . .

" ဒေါက်တာရေ တရားခံသိပြီ သိလား " ပြောပြောဆိုဆိုနှင့် ဆရာမလေးက အခန်းထဲဝင်လာသည်
"အဘွားကြီး တစ်ယောက်လေ ဆေးရုံနဲ့ တစ်လမ်းကျော်ကို ပြောင်းလာတာတဲ့ အရင်က လက်သည်ပြောတယ် အခု သူက ဖျက်ချပေးတယ်တဲ့ အောက်ကနေ ဆေးထည့်တာ သွေးဆင်းလာရင် ဆေးရုံသွားခြစ်လိုက်ဆိုပြီး လွှတ်လိုက်တာတဲ့လေ " နယ်ခံဖြစ်သော ဆရာမလေးက သူသိလာသော သတင်းကို ပြောပြသည်။
"အောင်မလေး မသိရင် ဆေးရုံက သူ့အပိုင်ကြနေတာပဲ သားအိမ်ခြစ်တာကိုတော့ ဆေးရုံက လုပ်ပေးလိမ့်မယ်ဆိုပြီး လွှဲနေတာတဲ့လေ
ကိုယ်ဝန်လ အလိုက် ပိုက်ဆံယူတယ်တဲ့ ၃လဆို၃သောင်း ၆လဆို ၆သောင်းပေါ့ အံ့သြဖို့တောင်ကောင်းတယ် အသက်က ၇၀ကျော်နေပြီ ပြောတယ် သူမို့ငရဲမကြောက် . . . "

ကြားရသော သတင်းက မကောင်း ဒီအသက်အရွယ်မှာ ဒီအလုပ်လုပ်နေတာကို ရှုံ့ချရမလား
ဆေးရုံကို ဆိုက်ဆိုက်မြိုက်မြိုက်လွှဲသည့် အတွက်ပဲ ကျေးဇူးတင်ရမလား သူမလဲ မတွေးတတ်တော့ချေ . . .

တစ်နေ့ တစ်နေ့ သားပျက်သားလျော လူနာရောက်လာတိုင်း သူမကို မကျေနပ်စိတ်က ပိုကြီးထွားလာသည် ။
လူနာတွေက စကားတစ်ခွန်းမှ မဟတော့ သိသိကြီးနှင့် အရေးယူမှု ဘာမှလုပ်မရ။

ဆေးရုံကလူတွေကတော့ တဗြစ်တောက်တောက် ပြောရင်းပင် လူနာတွေကို လက်ခံကုသ ပေးနေရသည် ... 

ကိုယ်ကတော့ ကိုယ်နိုင်ရာ လူနာတွေကိုပဲ မဲရသည် ။ ကိုယ်ဝန်ဆိုတာ မလိုချင်ရင်တားလို့ရကြောင်း ကိုယ်ဝန်ဖျက်ချခြင်းဟာ ငရဲကြီးသလို အသက်အန္တရာယ်ရှိကြောင်းကို အမြှုတ်ထွက်မတတ် ရှင်းပြရသည် ။
သားဖွားဆရာမတွေကိုလဲ လူထုကို အသိပညာပေးဖို့ပြောရသည်။

ပြောသူက ပြောနေချိန်မှာ ဖျက်သူက ဖျက်ဆဲဆိုတော့ ဆေးရုံမှာတော့ စည်စည်ကားကားပင် ...
ကဲ . . . ဒီ ကိစ္စကို ဘယ်လိုဖြေရှင်း ကြမလဲ ???

************

အခြစ်ကျွမ်းတဲ့ ဆရာဝန် မွေးခန်းက ထွက်လာချိန်မှာ ညသန်းခေါင်ကျော်ပြီ။ စိမ့်ကနဲ တိုက်လိုက်သော လေအေးတစ်ချက်မှာ သူမ တုန်တုန်ရီရီ ဖြစ်သွားသည်။
အော် ဆောင်းဝင်ပြီပဲ ။