ပန်းလှိုင်စီလုံဆေးရုံကြီးအား ၂၀၁၇ခုနှစ်၌ JCI အသိအမှတ်ပြုလက်မှတ်ရ နိုင်ငံတကာအဆင့်မီ ဆေးရုံကြီးအဖြစ် ပြောင်းလဲမည်

          ပန်းလှိုင်ဆေးရုံကြီးသည် JCI ကျန်းမာရေးစောင့်ရှောက်မှုစံနှုန်းများနှင့် နည်းလမ်းများကို အသုံးပြု၍ ၂၀၁၇ ခုနှစ်၊ နှစ်လည်ပိုင်းတွင်   JCI အသိအမှတ်ပြုလက်မှတ်ကို ရယူရန်ပြင်ဆင်နေပြီဖြစ်ကြောင်း ၁၅ရက် ၊ မတ်လ၊ ၂၀၁၆ ခုနှစ်တွင် ပြုလုပ်သော သတင်းစာရှင်းလင်းပွဲ၌ ပြောကြားခဲ့သည်။

          Joint Commission International (JCI) သည် အမေရိကန်နိုင်ငံတွင်အခြေစိုက်သော အကျိုးအမြတ်မယူသည့် အဖွဲ့အစည်းတစ်ခုဖြစ်ပြီး လူနာများ၏ဘေးကင်းလုံခြုံဖို့အတွက် ကျန်းမာရေးစောင့်ရှောက်မှုစံနှုန်းများ နှင့်နည်းလမ်းများအား ကူညီပ့ံပိုးပေးလျက်ရှိပြီး နိုင်ငံပေါင်း ၁၀၀ကျော်တွင် JCI ၏ လုပ်ငန်းများ အကောင်အထည်ဖော်လျက်ရှိသည်။ ဆေးရုံများ၊ ဆေးခန်းများ နှင့်ဆေးပညာရပ်ဆိုင်ရာစင်တာများ၊  အစိုးရဌာနများ၊ အေဂျင်စီများနှင့် မိတ်ဖက်ပြုထားပြီး ကျန်းမာရေးစောင့်ရှောက်မှုစံနှုန်းများ၊  နည်းလမ်းများကို ပ့ံပိုးပေးခြင်းဖြင့် အကောင်းဆုံး ကျန်းမာရေးစောင့်ရှောက်မှုစွမ်းဆောင်ရည်ရအောင် လက်တွဲလုပ်ဆောင်လျက်ရှိသည်။

        "အခုလိုမိမိနိုင်ငံအတွက်ပြန်လာပြီးကျန်းမာရေးအဆင်မြှင့်တင်မှုမှာ ပါဝင်ရလို့ အလွန်ကျေနပ်ပျော်ရွှင်မိ ပါတယ်။ ကျွန်တော်တို့အနေနဲ့မြန်မာနိုင်ငံမှာနိုင်ငံတကာအဆင့်မှီဝန်ဆောင်မှုတွေပေးနိုင်မှာဖြစ်လို့လည်း ဂုဏ်ယူပါတယ်။ ပန်းလှိုင်စီလုံဆေးရုံကြီးဟာ၂၀၁၇ခုနှစ်၊ နှစ်လည်ပိုင်းမှာ အမေရိကန် ကျန်းမာရေးစောင့်ရှောက်မှုစံနှုန်းတွေကို လိုက်နာကျင့်သုံးတဲ့ JCI အသိအမှတ်ပြုလက်မှတ်ရရှိတဲ့ ပထမဆုံးမြန်မာဆေးရုံဖြစ်တယ်လို့ကြေညာနိုင်မယ်လို့ ယုံကြည်ပါတယ်" ဟု ပန်းလှိုင်စီလုံဆေးရုံကြီး၏ အထွေထွေမန်နေဂျာ ဒေါက်တာ ဦးကျော်ကိုသက်မှပြောသည်။

        ပန်းလှိုင်စီလုံဆေးရုံ၏ မန်နေဂျင်းဒါရိုက်တာ ဒေါက်တာ ဒေါ်သက်သက်ခိုင်မှလည်း "လူနာများရဲ့လုံခြုံစိတ်ချရမှုနှင့်အရည်အသွေးမြင့်ကျန်းမာရေးဝန်ဆောင်မှုအတွက် နိုင်ငံတကာအသိအမှတ်ပြု    JCIရွှေတံဆိပ်ဟာဆေးရုံရဲ့နိုင်ငံတကာအဆင့်မီ၀န်ဆောင်မှုဖြစ်ကြောင်းသက်သေပြမယ့်သငေ်္ကတဖြစ်ပါတယ်။ JCI ဆေးရုံတစ်ရုံရဲ့သတ်မှတ်ချက်တွေဟာလုံခြုံစိတ်ချရတဲ့ဆေးရုံပတ်ဝန်းကျင်၊ ဆရာဝန်၊ သူနာပြု၊ လူနာ၊ လူနာမိသားစု၊ ဆေးရုံဝန်ထမ်းများအတွက် အန္တရာယ်ကင်းရှင်းမှု၊ လုံခြုံစိတ်ချမှု စတာတွေကို မြင့်မားတဲ့စံသတ်မှတ်ချက်တွေနဲဲ့ ထိန်းချုပ်ထားပါတယ်"ဟု ပြောကြားခဲ့သည်။

        ပန်းလှိုင်စီလုံဆေးရုံအား JCI မှ အသိအမှတ်ပြုလိုက်သည်နှင့် ဆေးရုံ၏ကျန်းမာရေးဝန်ဆောင်မှုများ သည် လူနာများအတွက်ယုံကြည်စိတ်ချရပြီး လုံခြုံမှုပေးနိုင်သည့် နိုင်ငံတကာအဆင့်မီ ဆေးရုံကြီး အဖြစ် ပြည်သုလူထုလက်ခံလာနိုင်တော့မည်ဖြစ်ကြောင်း၊  ယခုနိုင်ငံခြားသို့ဆေးကုသရန် သွားရောက်နေရသည့် လူနာများ နိုင်ငံခြားသို့သွားရောက်ရန်မလိုအပ်တော့ဘဲ မိမိနိုင်ငံမှာတင် နိုင်ငံတကာစံနှုန်းနှင့်အညီ ဆေးကုသနိုင်တော့မည်ဖြစ်ကြောင်းလည်း သိရသည်။

Chit Chit Khaing

www.drmyanmar.com