သက်ကြီးရွယ်အိုများနှင့် နားမကြားခြင်း

          အသက်အရွယ်ကြီးရင့်လာသည်နှင့်အမျှ ခန္ဓာကိုယ်၏လုပ်ငန်းဆောင်တာများပြောင်းလဲလာသည်မှာ မလွဲဧကန်ပင်ဖြစ်ပါသည်။ သက်ကြီးရွယ်အိုအများစုတွင် နားလေးခြင်းမှာဖြစ်လေ့ဖြစ်ထရှိသော အခြေအနေတစ်ခုဖြစ်ပြီး အသက် 65 နှစ်အထက် လူကြီး 2 ဦးတွင် 1 ဦးမှာနားလေးသူဖြစ်နိုင်သည်။

          အသက်အရွယ်ကြောင့်ဖြစ်သော နားမကြားခြင်း (presbycusis) သည် စိုးရိမ်စရာလိုသော အနေအထားမဟုတ်သော်ငြားလည်း မကုသဘဲထားပါက လူနေမှုဘ၀ကိုအနည်းနှင့်အမျှထိခိုက်နိုင်ပါသည်။

ဖြစ်ပွားရခြင်းအကြောင်းအရင်းများ

        သက်ကြီးရွယ်အိုများ၏ အတွင်းပိုင်းနားတွင် ပြောင်လဲခြင်းများစွာဖြစ်ပေါ်ခြင်းကြောင့် နားလေးခြင်းကိုခံစားရခြင်းဖြစ်သည်။ ၎င်းတို့တွင် -

-   အတွင်းနား၏ တည်ဆောက်မှုပုံသဏ္႑ာန်ပြောင်းလဲလာခြင်း

-   နားသို့သွေးစီးဆင်းမှုပြောင်းလဲခြင်း

-   အကြားအာရုံနှင့်ဆိုင်သော အာရုံကြောများပျက်စီးလာခြင်း

-   အသံနှင့်ပတ်သက်၍ ဦးနှောက်၏လုပ်ငန်းဆောင်တာများ ပြောင်းလဲလာခြင်း

-   အသံလှိုင်းကိုသယ်ဆောင်ပေးသော နားရွက်အတွင်းရှိ မွေးညှင်းနုများပျက်စီခြင်းတို့ ပါ၀င်ပါသည်။

          အခြားအကြောင်းအရင်းများမှာ -

-   ဆီးချိုရောဂါ

-   သွေးလည်ပတ်မှုမကောင်းခြင်း

-   အလွန်ကျယ်လောင်သောအသံများနှင့်ထိတွေ့မှုများခြင်း

-   ဆေးဝါးများ

-   မိသားစုမျိုးရိုးရှိခြင်း

-   ဆေးလိပ်သောက်ခြင်းတို့ဖြစ်ကြသည်။

သက်ကြီးရွယ်အိုများတွင် နားလေးခြင်းကို စတင်သတိပြုမိခြင်း

        ရောဂါလက္ခဏာအစမှာ အသံစူးစူးများကို မကြားနိုင်တော့ခြင်းဖြစ်ပြီး ကလေး(သို့)အမျိုးသမီးသံများကို ကောင်းစွာမကြားနိုင်တော့ကြောင်း သတိပြုမိလာပေလိမ့်မည်။ ထို့ပြင် ဆူညံသံများနှင့် ပြတ်သားစွာပြောနေသောအသံများကိုလည်း ကောင်းစွာမကြားနိုင်တော့ပေ။ အခြားရောဂါလက္ခဏာများမှာ -

-   အချို့အသံများကို ပိုမိုကျယ်လောင်သည်ဟုခံစားရခြင်း

-   ဆူညံသံများကို ကောင်းစွာမကြားရခြင်း

-   နားအူခြင်း

-   တီဗွီ(သို့) ရေဒီယိုကိုပုံမှန်ထက်ပိုမိုကျယ်လောင်စွာဖွင့်ခြင်း

-   အခြားသူများကို စကားထပ်တလဲလဲပြန်ပြောစေခြင်း

-   ဖုန်းမှတဆင့်ပြောကြားသောစကားများကို နားမလည်ခြင်း

          အခြားရောဂါများကြောင့်လည်း အထက်ပါရောဂါလက္ခဏာများ ခံစားရနိုင်ခြင်းကြောင့် ဆရာ၀န်နှင့်သေချာဆွေးနွေးသင့်ပါသည်။

ရောဂါရှာဖွေခြင်း

         သင်၏ဆရာ၀န်သည် တစ်ကိုယ်လုံးကို စမ်းသပ်စစ်ဆေး၍အခြားအကြောင်းအရင်းများကြောင့် နားလေးခြင်း ဟုတ်/မဟုတ်ကို ရှာဖွေရုံမျှမက နားစစ်ဆေးကိရိယာဖြင့်လည်း နားအတွင်းသို့ကြည့်ရှုပေးလိမ့်မည်။

          အခြားအကြောင်းအရင်းများကို ရှာဖွေမတွေ့ရှိပါက အသက်အရွယ်ကြောင့် နားလေးခြင်းဟုခေါင်းစဉ်တပ်နိုင်ပြီး နားအထူးကုဆရာ၀န်နှင့် ပြသနိုင်ရန်လမ်းညွှန်ပေးပေလိမ့်မည်။

ကုသခြင်း

        ကုသရန်နည်းလမ်းမရှိသော်ငြားလည်း အကြားအာရုံနှင့် လူနေမှုဘ၀ကိုမြင့်တင်နိုင်ရန်ကိုမူ ဆရာ၀န်မှလမ်းညွှန်ပေးပါလိမ့်မည်။

-   နားကြားကိရိယာတပ်ဆင်ခြင်း

-   အခြားအထောက်အကူပစ္စည်းများအသုံးပြုခြင်း (ဥပမာ - တယ်လီဖုန်း၊ အသံချဲ့စက်များ)

-   အလွန်ဆိုးရွားသောအခြေအနေတွင် ကိုယ်အမူအရာဖြင့်စကားပြောခြင်း သင်ခန်းစာများကိုသင်ကြားပေးခြင်း

          အချို့သူများတွင်မူ နားကိုခွဲစိတ်၍ သေးငယ်သောစက်ပစ္စည်းတစ်ခုထည့်ပေးခြင်းဖြင့် အသံကိုပိုမိုကျယ်လောင်စွာ ကြားရစေရန်ကူညီပေးနိုင်ပါသည်။ ဤကဲ့သို့ခွဲစိတ်ခြင်းများကို အလွန်ဆိုးရွားသောနားမကြားခြင်းများ၌သာ အသုံးပြုလေ့ရှိသည်။

ကာကွယ်ခြင်း

         အသက်အရွယ်ကြောင့်ဖြစ်သော နာမကြားခြင်းကို ကာကွယ်ရန်နည်းလမ်းမရှိသော်လည်း အခြေအနေပိုမိုမဆိုးရွားစေရန်မှု လုပ်ဆောင်နိုင်ပါသည်။

-   ကျယ်လောင်သော အသံများနှင့်ထိတွေ့ခြင်းမှ ရှောင်ကြဉ်ပါ။

-   ဆူညံသံများရှိသောနေရာတွင် နားအကာအကွယ်များကို တပ်ဆင်ပါ။

-   ဆီးချိုရောဂါရှိပါက သွေးတွင်းသကြားဓာတ်ကိုပုံမှန်ဖြစ်စေရန် ထိန်းသိမ်းပါ။

          ရောဂါလက္ခဏာများစတင်ခံစားရသည်နှင့် တပြိုင်နက်ဆရာ၀န်ထံမှ အကူအညီကိုရယူခြင်းဖြင့် နားမကြားခြင်းပိုမိုမဆိုးရွားစေရန် ကာကွယ်နိုင်ပါသည်။

Dr. Thinzar Wynn (www.drmyanmar.com)