အသက်အရွယ်ကြီးလာရင် ပရိုတင်းဓာတ်ကို မမေ့ပါနဲ့

ပရိုတင်း၏အကျိုးပြုပုံ

          ကြွက်သားတွေသန်မာစေဖို့အတွက် အသားဓာတ်လို့ခေါ်တဲ့ပရိုတင်းဓာတ်ကိုလိုအပ်ပါ တယ်။ ကြွက်သားတွေသန်မာနေမှ လှေကားအတက်အဆင်းပြုလုပ်ရာမှစပြီး လှုပ်ရှားမှုတိုင်းအတွက် ခန္ဓာကိုယ်ကဟန်ချက်ညီစေနိုင်မှာဖြစ်ပါတယ်။ ဒါ့အပြင် ပရိုတင်းဓာတ်ဟာ နှလုံးအားကောင်းစေပြီး ကိုယ်ခံစွမ်းအားကိုမြှင့်တင်ပေးနိုင်ပါတယ်။

ရယူသင့်သောပရိုတင်းပမာဏ

          တစ်နေ့တာအတွက် ပရိုတင်းဓာတ်ကိုအမျိုးသမီးတွေအနေနဲ့ ၄၆ ဂရမ်ရယူသင့်ပြီး အမျိုးသားတွေအနေနဲ့ ၅၆ ဂရမ်ရယူဖို့လိုအပ်ပါတယ်။ ဒါပေမယ့် ကျောက်ကပ်ရောဂါရှိသူတွေအနေနဲ့ ပရိုတင်းဓာတ်အနည်းငယ်သာ စားသင့်ပါတယ်။ ပရိုတင်းပါတဲ့အစားအသောက်တွေဟာ ဗိုက်ကြာကြာ ပြည့်နေစေတဲ့အတွက် ကိုယ်အလေးချိန်လျော့ချလိုသူ၊ ကိုယ်အလေးချိန်ထိန်းလိုသူတွေဟာ ပရိုတင်းဓာတ်များများ မှီ၀ဲထားသင့်ပါတယ်။

1.       အနီရောင်အသား

          အမဲသား၊ ၀က်သားနဲ့သိုးသားဟာ အသားဓာတ်ရနိုင်တဲ့ အကောင်းဆုံးအရင်းအမြစ်ဖြစ်ပါတယ်။ ဒါပေမယ့်အဆီများအသားတွေဟာ သွေးလွှတ်ကြောမှာအဆီများပိတ်ဆို့စေခြင်း၊ ကိုလက်စထရော များစေခြင်းတို့ ဖြစ်စေနိုင်တဲ့အတွက် အဆီဖယ်ပြီးသား အသားလွှာတွေကိုသာ ချက်ပြုတ်စားသုံး သင့်ပါတယ်။ ယေဘုယျအားဖြင့် အသား ၃ အောင်စမှာ ပရိုတင်းဓာတ် ၂၁ ဂရမ် ပါ၀င်ပါတယ်။

2.       ကြက်သားနှင့် ကြက်ဥ

          ကြက်သားနဲ့ ကြက်ဥတို့မှာလည်း ပရိုတင်းဓာတ်ကြွယ်၀စွာ ပါ၀င်ပါတယ်။ ဒါပေမယ့် ကြက်သားရဲ့အရေခွံက အဆီများစေတဲ့အတွက် ဖယ်စားသင့်ပါတယ်။ ကြက်ရင်အုံ ၃ အောင်စမှာ ပရိုတင်း ၃၁ ဂရမ်ပါ၀င်ပြီး ကြက်ဥ တစ်လုံးမှာ ပရိုတင်း ၆ ဂရမ်ပါ၀င်ပါတယ်။ လေ့လာမှုတွေအရ ကျန်းမာရေးကောင်းတဲ့ သူတွေအနေနဲ့ ကြက်ဥရဲ့ အနှစ်ကောအကာကိုပါ တစ်နေ့တစ်လုံးစားနိုင်ပါတယ်။ နှလုံး၊ သွေးတိုး၊ ဆီးချိုနှင့် သွေးတွင်းအဆီဓာတ်များ သူတွေကတော့ ကြက်ဥအနှစ်ကို အတတ်နိုင်ဆုံးရှောင်သင့်ပါတယ်။ အရမ်းကြိုက်တယ်ဆိုရင်တော့ တစ်ပတ်မှာ ၃ ခါလောက် ကြက်ဥအနှစ်ကိုစားနိုင်ပါတယ်။ ကြက်ဥအကာ စားတာကတော့ ကျန်းမာရေးအတွက် ပြဿနာမရှိပါဘူး။

3.       ပင်လယ်စာ

          ပင်လယ်စာတွေကို တစ်ပတ်မှာနှစ်ကြိမ်လောက်စားပေးသင့်ပါတယ်။ ပင်လယ်စာဟာ အသားဓာတ်ရရှိနိုင်တဲ့ အရင်းအမြစ်ဖြစ်တဲ့အပြင် ပြည့်၀ဆီပါ၀င်မှုနည်းပြီး အိုမီဂါ ၃ ဖက်တီးအက်ဆစ် ပါ၀င်တာကြောင့် နှလုံးရောဂါ အန္တရာယ်မှ ကာကွယ်ပေးနိုင်ပါတယ်။ ဒါအပြင် တူနာငါး၊ ဆာဒင်းငါးတို့ကိုလည်း စားပေးနိုင်ပါတယ်။

4.       နို့နှင့် နို့ထွက်ပစ္စည်းများ

          နို့နှင့် နို့ထွက်ပစ္စည်းတွေဟာ ကြွက်သားတည်ဆောက်ရာမှာလိုအပ်တဲ့ အာဟာရဓာတ်တွေဖြစ်ပါ တယ်။ သွေးပေါင်ချိန်ကိုကျစေနိုင်ပြီး ဆီးချိုရောဂါဖြစ်ခြင်းမှ ကာကွယ်ပေးနိုင်ပါတယ်။ အဆီထုတ်ထားတဲ့ နွားနို့ တစ်ခွက်မှာပရိုတင်းဓာတ် ၈ ဂရမ်ပါ၀င်ပါတယ်။ ဒါ့ကြောင့် အဆီပါ၀င်မှုနည်းတဲ့ နို့ထွက်ပစ္စည်းတွေကို နေ့စဉ် စားပေးသင့်ပါတယ်။

5.       ပဲအမျိုးမျိုး၊ အားလူးနှင့် ဟင်းသီးဟင်းရွက်များ

          ပဲအမျိုးမျိုး၊ အားလူးနှင့် ဟင်းသီးဟင်းရွက်တွေမှာ ပဲပုပ်ပဲမှာပရိုတင်းဓာတ်မြင့်မားစွာပါ၀င်ပါ တယ်။ ရွှေပဲသီး၊ ပဲနို့၊ တို့ဟူးစားခြင်းဖြင့်လည်းပရိုတင်းဓာတ်ရရှိစေနိုင်ပြီးပဲနို့မှာသာမန်နွားနို့ထက် ပရိုတင်းဓာတ်ပိုမိုပါ၀င်ပါတယ်။ အလယ်အလတ်ဆိုဒ်ရှိတဲ့ ဖုတ်ပြီးသား အာလူးတစ်လုံးမှာ ပရိုတင်း ၄ ဂရမ်ပါ၀င်ပါတယ်။

6.       ပရိုတင်းဓာတ်ပါ၀င်သောဖျော်ရည်

          ပရိုတင်းဓာတ်ပါ၀င်တဲ့ အစားအစာတွေကို သိပ်မစားချင်ရင် ပရိုတင်းဓာတ်ဖြည့်ထားတဲ့ ဖြည့်စွက်စာတွေ၊ ဖျော်ရည်တွေ၊ မုန့်တွေနဲ့ ဆေးဝါးတွေကို မှီ၀ဲနိုင်ပါတယ်။

7.       အခွံမာသီးနှင့် အစေ့အဆန်များ

          ဖရုံစေ့၊ နေကြာစေ့၊ ဗာဒံစေံ စတဲ့ အခွံမာသီးနဲ့ အစေ့အဆန်တွေဟာ ပရိုတင်းဓာတ်ကြွယ်၀တဲ့ အပြင် နှလုံးကြွက်သားပျက်စီးနိုင်ခြေကိုလည်း လျော့ချပေးပါတယ်။ ဒါပေမယ့် ၎င်းတို့မှာ ကယ်လိုရီပမာဏ ပါ၀င်မှုမြင့်မားတာကြောင့် တစ်နေ့မှာ 0.5 အောင်စ (ထမင်းစားဇွန်း တစ်ဇွန်းစာ) ထက်ပိုမစားသင့်ပါဘူး။

CMS(www.drmyanmar.com)