ဓမ္မတာမလာခင်နှင့် လာနေစဉ်အတွင်း နာကျင်ခြင်းလက္ခဏာများ

>>  ရှားရှားပါးပါး ဖြစ်တတ်တဲ့လက္ခဏာတွေကတော့ -
တချို့အမျိုးသမီးတွေမှာ နာကျင်တာ ဆိုးရွားလွန်းလို့ နေ့စဉ်လုပ်နေကျအလုပ်တွေကိုပါ မလုပ်နိုင်လောက်အောင် ဖြစ်တတ်ပါတယ်။ အလုပ်ပျက်တာ၊ ပွဲမတက်ရတာမျိုးတွေ ရှိတတ်ပါတယ်။ ဒီလိုဖြစ်တဲ့အခါ ဆေးပညာအရ ဓမ္မတာ ပြင်းထန်ပုံမမှန်ခြင်းလို့ ခေါ်တွင်ပါတယ်။
ဒီဓမ္မတာပြင်းထန်ပုံမမှန်ခြင်းဟာ နှစ်မျိုးရှိပါတယ်။ သူ့အလိုလိုပုံမမှန်ခြင်းနဲ့ နောက်ခံရောဂါတစ်ခုခုကြောင့် ပုံမမှန်ခြင်းတို့ပါပဲ။
သူ့အလိုလို ပုံမမှန်ခြင်းဟာ ခန္ဓာကိုယ်ထဲ ဓာတ်တွေမညီမျှလို့ ဓမ္မတာအရမ်းများပြီး ပုံမမှန်သားအိမ်ညှစ်နေတာမျိုး ဖြစ်တတ်ပါတယ်။
အောက်ခံရောဂါတစ်ခုခုကြောင့် ပုံမမှန်တာကတော့ သားအိမ်အတွင်းသား နေရာလွဲမှားနေခြင်း၊ သားအိမ်အသားလုံး၊ တင်ပါးဆုံကွင်းတွင်း ပိုးဝင်ခြင်း စတာတွေကြောင့် ဖြစ်တတ်ပါတယ်။ နှစ်မျိုးစလုံးမှာတော့ အပေါ်မှာပြောခဲ့တဲ့ ဓမ္မတာလက္ခဏာအတိုင်းပဲ ဖြစ်ပေမယ့် ပုံမှန်ထက်ကို ပိုဆိုးတတ်ပါတယ်။

>>  နောက်ဆက်တွဲတွေအနေနဲ့ ဖြစ်တတ်တာတွေကတော့ -
ဒီလိုနာကျင်တာတွေက တခြားရောဂါ ကြီးကြီးမားမားပြဿနာ မဖြစ်စေပေမယ့် အရမ်းနာကျင်စေနိုင်တဲ့ နောက်ခံပြဿနာတစ်ခုခုရှိရင်တော့ တခြားနောက်ဆက်တွဲတွေ ဖြစ်တတ်ပါတယ်။ ဥပမာအားဖြင့် သားအိမ်အတွင်းသား နေရာလွဲမှားခြင်းဟာ ကလေး မရနိုင်တာမျိုး ဖြစ်စေတာမျိုးပေါ့။
သူ့အလိုလိုဓမ္မတာပုံမမှန်ခြင်းဟာ ဆေးလိပ်သောက်သူတွေ၊ အရက်အလွန်အကျွံသောက်သူတွေ၊ အဝလွန်သူတွေ၊ အသက် ၁၁ နှစ်မတိုင်ခင် အပျိုဖော်ဝင်သူတွေ၊ ကိုယ်ဝန်တစ်ခါမှမဆောင်ဖူးသူတွေမှာ ဖြစ်တတ်ပြီး ပိုနာတတ်ကြပါတယ်။
တစ်ခါတလေ သားအိမ်ထဲထည့် သန္ဓေတားပစ္စည်းတွေလိုမျိုး သန္ဓေတားနည်းတချို့ကြောင့် ဓမ္မတာနာကျင်တာ ပိုဆိုးတတ်ပါတယ်။ ပစ္စည်းထည့်ပြီးခါစကာလ အစပိုင်းမှာ နာကျင်လေ့ရှိပေမယ့် တောက်လျှောက်ကို ဆိုးဆိုးရွားရွား နာနေတယ်ဆိုရင်တော့ ထည့်ထားတဲ့ပစ္စည်းအမျိုးအစားကြောင့်သော်လည်းကောင်း၊ ထည့်ထားတဲ့ပုံစံကြောင့်သော်လည်းကောင်း ဖြစ်နိုင်ပါတယ်။