ရာသီသွေးဆင်းများတာ လနဲ့ချီကြာလာရင် သွေးအားနည်းရောဂါ ဖြစ်နိုင်ပါတယ်

အမျိုးသမီးတွေအတွက် ကိုယ့်ရဲ့ ရာသီစက်ဝန်း အခြေအနေကို သေချာသိနိုင်အောင် ရာသီးသွေးဆင်းတဲ့ပမာဏ၊ ကြာတဲ့ရက်၊ နာကျင်မှု ရှိ/မရှိ စတာတွေကို သေချာမှတ်သားထားသင့်ပါတယ်။ သွေးခဲဆင်းတာ ရှိ/မရှိ၊ ရှိရင်ရော ဘယ်လောက်များလဲ၊ နာကျင်တာ၊ သွေးဆင်းများတာတွေကြောင့် အလုပ်၊ ကျောင်း နားရတာမျိုးရောရှိလား စသဖြင့် တတ်နိုင်သလောက် မှတ်ထားသင့်ပါတယ်။ ဒါမှသာ နောက်ပိုင်း ဆရာဝန်နဲ့ ပြသခဲ့ရင်လည်း သေချာ ပြောပြနိုင်မှာ ဖြစ်ပါတယ်။ ဆရာဝန်နဲ့ ပြသရင် USG ရိုက်တာ၊ သားအိမ်ခေါင်းအချွဲယူပြီး စစ်ဆေးတာမျိုးတွေ လုပ်ပါလိမ့်မယ်။

>>  သံဓာတ်ချို့တဲ့ သွေးအားနည်းရောဂါဆိုတာ
ခန္ဓာကိုယ်ထဲက သွေးတွေ ဆုံရှုံးတာကြာလာရင် သံဓာတ်တွေ ဆုံးရှုံးတာ များလာပါတယ်။ သံဓာတ်က ခန္ဓာကိုယ်ထဲမှာ အောက်ဆီဂျင်ကို သယ်ပေးတဲ့ သွေးနီဥ ထုတ်လုပ်တဲ့နေရာမှာ အရေးပါ,ပါတယ်။ ဒီအခါ သွေးနီတွေ နည်းလာတာကို သံဓာတ်ချို့တဲ့ သွေးအားနည်းရောဂါလို့ ခေါ်ပါတယ်။
အမျိုးသမီးတွေရဲ့ ၂၅% လောက်က menorrhagia ကို ခံစားနေရပေမဲ့ ဒီလို သွေးဆင်းများတာ ၆ လကျော်လာရင် သွေးအားနည်းရောဂါ ဖြစ်လာနိုင်တာကို မသိကြပါဘူး။ သူ့ရဲ့ ရောဂါလက္ခဏာတွေက တိတိကျကျ မရှိပါဘူး။
●  ပင်ပန်းနွမ်းနယ်တာ
●  ခေါင်းကိုက်တာ
●  အသားအရေ ဖျော့တော့နေတာ
●  ခြေတွေ လက်တွေ အေးစက်နေတာ
●  မောတာ စတာတွေ ခံစားရတတ်ပါတယ်။
တချို့ဆို ဘာလက္ခဏာမှ မခံစားရတတ်ပါဘူး။ ဒါကြောင့်မို့ ကိုယ်က menorrhagia ဖြစ်နေတယ်ဆိုရင် သွေးအားနည်းတဲ့ လက္ခဏာ ဘာမှမခံစားရရင်တောင် ဆရာဝန်နဲ့ ပြသသင့်ပါတယ်။