သွေးဆုံးချိန်မှာ ကြုံတွေ့ရတဲ့ အခက်အခဲတွေကို ဖြေရှင်းနည်းများ

●  စိုးရိမ်ပူပန်မှုကို ဆန်းစစ်ပါ
သက်လတ်ပိုင်းအရွယ်မှာ ဖြစ်ပေါ်တတ်တဲ့ ရုပ်ပိုင်းဆိုင်ရာနဲ့ စိတ်ပိုင်းဆိုင်ရာပြောင်းလဲမှုတို့က စိုးရိမ်ပူပန်မှုကို ထပ်တိုးဖြစ်ပေါ်စေပါတယ်။ ကြိုတင်တွေးတောပူပန်ခြင်းနဲ့ အကြောက်တရားတွေက ဖြစ်လေ့ဖြစ်ထရှိတဲ့အရာများဖြစ်ပြီး အလိုလို ပျောက်ကင်းသွားတတ်ပါတယ်။ သို့သော်လည်း မကြာခဏ ဖြစ်ပေါ်နေမယ်ဆိုရင်တော့ စိတ်ရောဂါအဆင့်ကို ရောက်သွားနိုင်ပြီး အသက်ရှူမဝခြင်း၊ ရင်ဘတ်အောင့်ခြင်း၊ ခေါင်းမကြည်ခြင်း၊ ရင်တုန်ခြင်းနဲ့ စိတ်ကစဉ့်ကလျားဖြစ်ခြင်းတို့ ဖြစ်ပေါ်လာနိုင်ပါတယ်။ ဆေးဝါးသောက်သုံးခြင်း၊ စိတ်အပန်းဖြေခြင်းနဲ့ နှစ်သိမ့်ဆွေးနွေးတိုင်ပင်ခြင်းတို့ဖြင့် ကုသနိုင်ပါတယ်။

●  မှတ်ဉာဏ်ကို ဂရုစိုက်မှတ်သားပါ
သွေးဆုံးခါနီး အမျိုးသမီးတွေမှာ မကြာသေးခင်ကအဖြစ်အပျက်များကို သတိမေ့တဲ့ရောဂါ (short-term memory problem) လည်း ကြုံတွေ့ရတတ်ပါတယ်။ အဲ့ဒီ့ရောဂါကို အယ်ဇိုင်းမားရောဂါလို့ထင်ပြီး ကြောက်လန့်တတ်ကြပါတယ်။ တက်ကြွရွှင်လန်းစွာနေခြင်းက မှတ်ဉာဏ်အားကောင်းစေလို့ ဒီရောဂါကို ကာကွယ်ပေးနိုင်ပါတယ်။

●  အားပေးကုသနိုင်မယ့်သူကို ရှာဖွေပါ
ဒီရောဂါတွေဟာ ရှက်ကြောက်နေစရာရောဂါတွေ မဟုတ်တဲ့အတွက် မိမိတစ်ယောက်တည်း တိတ်တဆိတ် ခံစားနေစရာ မလိုပါဘူး။ ကုသညွှန်ကြားပေးနိုင်မယ့်သူနဲ့ အမြန်ဆုံး ဆွေးနွေးတိုင်ပင်သင့်ပါတယ်။ နောက်တစ်ချက် မှတ်သားစရာကတော့ စိတ်ကျရောဂါကုသဆေးများ သောက်သုံးခြင်းနဲ့ နှစ်သိမ့်ဆွေးနွေးပေးခြင်းကုထုံးတို့ နှစ်မျိုးပေါင်းစပ်လိုက်ပါက ပိုပြီးထိရောက်တယ်ဆိုတဲ့အချက်ပါပဲ။

ဒေါက်တာနေလွင်ထူး (www.drmyanmar.com)