အမျိုးသမီးတို့ အဖြူဆင်းခြင်းကို ကာကွယ်ဖို့

(Unicode)

    အမျိုးသမီးတစ်ယောက်ဟာ တစ်သက်မှာတစ်ကြိမ်တော့ မိန်းမကိုယ်မှိုစွဲတဲ့ပြဿနာနဲ့ အဖြူဆင်းခြင်းကို ကြုံတွေ့ရတတ်ပါတယ်။ အများစုဟာ မကြာမကြာ ပိုးဝင်တာမျိုးတောင် ရှိတတ်ပါတယ်။

>>    မိန်းမကိုယ်မှိုစွဲတဲ့ လက္ခဏာတွေ
1.    မိန်းမကိုယ် နှုတ်ခမ်းသားနှင့် မိန်းမကိုယ် အတွင်းပိုင်း ယားယံခြင်း
2.    အမျိုးသားနှင့် အတူနေစဉ် (သို့) ဆီးသွားစဉ် မိန်းမကိုယ်အတွင်း အလွန်အမင်းပူနေခြင်း
3.    မိန်းမကိုယ် နှုတ်ခမ်းသားများ နီရဲရောင်ရမ်းခြင်း
4.    မိန်းမကိုယ်အတွင်းပိုင်း နာခြင်း၊ ရောင်ခြင်း၊ ရဲခြင်း
5.    မိန်းမကိုယ်မှ ရေကဲ့သို့ အရည်ကြည်များဆင်းခြင်း
6.    ချိစ်ကဲ့သို့ ထူထူထဲထဲ အဖြူရောင်အနှစ်များ (အနံ့မရှိ) ဆင်းခြင်း
    ဒီလိုအနေရခက်လှတဲ့ မိန်းမကိုယ်မှိုစွဲပြဿနာ မဖြစ်ရလေအောင် ဒီနည်းလမ်းလေးတွေကို ကျင့်သုံးပေးသင့်ပါတယ်။

>>    မိန်းမကိုယ်မှိုစွဲတာကို သက်သာစေဖို့
●    ချည်သားအတွင်းခံကိုသာ ဝတ်ဆင်ပါ။ ဒါမှ မိန်းမကိုယ်လည်း လေဝင်လေထွက် ရှိမှာပေါ့။ နိုင်လွန်လို လေတွေ ပိတ်လှောင်နိုင်တဲ့ အတွင်းခံမျိုးကို မဝတ်ပါနဲ့။
●    အချို့သောချောဆီမျိုးကို မသုံးသင့်ပါ။ အမျိုးသားနဲ့ အတူနေလို့ မိန်းမကိုယ်ခြောက်သွေ့နေရင် ရေပါတဲ့ချောဆီမျိုးကို သုံးပေးပါ။ တခြားအမျိုးအစားတွေက မှိုပိုးပွားတာကို အားပေးတာကြောင့်ပါ။
●    တစ်ကိုယ်ရည် သန့်ရှင်းရေးကို အားပေးပါ။ နေ့စဉ်သုံး အမျိုးသမီးသန့်စင်ဆေးရည်တွေကို သုံးလို့ရပါတယ်။ အိမ်သာတက်ပြီးရင် ရှေ့ကနေနောက်ကို ဆေးပေးခြင်းဖြင့် ဝမ်းမှာပါတဲ့ ပိုးမွှားတွေ မိန်းမကိုယ်ကို မရောက်လာမှာပါ။
●    ဒိန်ချဉ်စားပါ။ တစ်နေ့ကို ဒိန်ချဉ်တစ်ခွက် စားပေးခြင်းက ပိုးသတ်ဆေးတွေ သောက်လိုက်ပြီးနောက် မှိုပိုးဖြစ်ခြင်းကို ကာကွယ်ပေးနိုင်ပါတယ်။ ဒါပေမဲ့ မှိုပိုးကိုတော့ ဒိန်ချဉ်က မသတ်နိုင်ပါဘူးနော်။
●    မိန်းမကိုယ်တစ်ဝိုက်ကို ရေမွှေးပါတဲ့ ရေချိုးအသုံးအဆောင်တွေ၊ ပေါင်ဒါတွေ မလိမ်းပါနဲ့။ ယားယံပြီး မှိုပိုးတွေ ပေါက်လာစေနိုင်ပါတယ်။
●    မိန်းမကိုယ်အတွင်းထဲထိ ဆေးကြောတာမျိုး မလုပ်ပါနဲ့။ အတွင်းထိ ဆေးကြောတာက မိန်းမကိုယ်ရဲ့ သဘာဝအကာရံအလွှာကို ဖယ်ရှားပစ်တဲ့အတွက် မှိုပိုးတွေကို ပိုအားပေးပါတယ်။
    မှိုပိုးဝင်တဲ့လက္ခဏာတွေ တွေ့နေရပြီဆိုရင် ဆရာဝန်နဲ့ပြပြီး ဆေးသောက်ဖို့ လိုပါတယ်။ မှိုပိုးဝင်တာ ဟုတ်၊ မဟုတ်ကို ဆရာဝန်က သေချာစစ်ဆေးပေးပါလိမ့်မယ်။ ဒါ့ကြောင့် ကိုယ့်ဘာသာ အိမ်မှာ ထင်သလို မကုပါနဲ့။ တခြား မိန်းမကိုယ် ပိုးဝင်တာတွေ၊ လိင်မှတစ်ဆင့် ကူးစက်ရောဂါတွေဟာလည်း ဒီလိုလက္ခဏာတွေနဲ့ပဲ လာနိုင်လို့ပါ။

Dr. Mya Phoo Ngon (www.drmyanmar.com)