အမျိုးသမီးများမှာ ဖြစ်လေ့ရှိတဲ့ ရင်သားနာကျင်ခြင်း

•  စိတ်ဖိစီးမှု
ဒါကိုလည်း ဟော်မုန်းအပြောင်းအလဲကြောင့်ဖြစ်တာလို့ ယူဆထားပါတယ်။ သူရဲ့ကုသမှုကတော့ ရှင်းပါတယ်။ စိတ်ဖိစီးမှုလျော့နည်းအောင် နေထိုင်ပါ။ စိတ်အပန်းပြေစေမယ့် တရားထိုင်ခြင်း၊ ယောဂကျင့်ခြင်းတွေလုပ်ပါ။

•  ကဖင်းဓာတ်
မနက်စောစော ကော်ဖီတစ်ခွက်သောက်တာကလည်း ရင်သားနာကျင်စေတဲ့တရားခံ ဖြစ်သွားနိုင်ပါတယ်။ အကြောင်းရင်းကိုတော့ သေချာမသိပေမယ့် ရင်သားအရည်အိတ်/အကျိတ်ရောဂါဖြစ်တဲ့ အမျိုးသမီးတွေမှာ ကဖင်းဓာတ်ပါတဲ့ အစားအသောက်တွေ လျော့စားခြင်းက နာကျင်မှုကို သက်သာစေတယ်လို့ လေ့လာတွေ့ရှိရပါတယ်။

•  အရည်အိတ်ဖြစ်ခြင်း
ရင်သားမှာအရည်အိတ်ဖြစ်တာဟာ သိပ်စိတ်ပူစရာတော့ မလိုပါဘူး။ အရည်အိတ်တွေဟာ ရင်သားမှာရှိတဲ့ ပြွန်ငယ်လေးတွေပိတ်ဆို့မှု၊ သွေးကြောသေးသေးလေးတွေပေါက်ပြီး တစ်ရှူးထဲကို သွေးအနည်းငယ် စိမ့်ထွက်လာမှုတို့ကြောင့် ဖြစ်နိုင်ပါတယ်။ ရောဂါပိုးတွေကြောင့်လည်း ဖြစ်နိုင်ပေမယ့် ရှားပါတယ်။ အရည်အိတ်လေးတွေဟာ သေးငယ်ပြီးတော့ သိပ်လည်းမနာဘူးဆိုရင် ဘာမှလုပ်စရာ မလိုပါဘူး။ ကြီးပြီး နေထိုင်ရခက်တယ်ဆိုရင်တော့ ခွဲထုတ်လို့ရပါတယ်။

•  အရိုးနုများ ရောင်ရမ်းခြင်း
နံရိုးနဲ့ရင်ညွန့်ရိုးကို ချိတ်ဆက်ပေးထားတဲ့ အရိုးနုတွေရောင်ပြီး နာကျင်တဲ့အခါ သူ့အပေါ်မှာရှိတဲ့ ရင်သားကိုလည်း နာကျင်စေပါတယ်။ ရင်ဘတ်ကိုထိခိုက်မိခြင်း၊ ပြင်းပြင်းထန်ထန် ချောင်းဆိုးခြင်း၊ ရောဂါပိုးဝင်ခြင်းနဲ့ အကျိတ်တွေက နံရိုးမှာရှိတဲ့အရိုးနုတွေကို ရောင်ရမ်းစေပါတယ်။ ဒီလိုဖြစ်လို့ ရင်သားနာတာ ဆိုရင်တော့ အကောင်းဆုံးကုသမှုက အနားယူတာပါပဲ။ အလေးအပင်မတာ ရှောင်ပါ။ ရေနွေးအိတ်ကပ်ပါ။ ကြွက်သားအကြောလျှော့လေ့ကျင့်ခန်း လုပ်ပါ။ အကိုက်အခဲပျောက်ဆေး သောက်ပါ။
ရင်သားနာကျင်မှုဟာ ကင်ဆာကြောင့်ဖြစ်တာရှားလို့ စိုးရိမ်စရာ သိပ်မလိုပေမယ့် ဒီနာကျင်မှုကြောင့် နေ့စဉ်လုပ်နေကျအလုပ်တွေ မလုပ်နိုင်တော့ဘူးဆိုရင်၊ ဒါမှမဟုတ် မိမိကိုယ်တိုင်က စိုးရိမ်ပူပန်တတ်သူဆိုရင်တော့ ဆရာဝန်နဲ့ ပြသတိုင်ပင်ပါ။

Dr. Aye Hsu Mon (www.drmyanmar.com)