ဆောင်းရာသီမှာ အသားအရေကို ဘယ်လိုထိန်းသိမ်းကြမလဲ

ဆောင်းရာသီမှာ အေးပြီး နေလို့ကောင်းပေမယ့် အသားအရေကတော့ ပျက်စီးလွယ်ပါတယ်။ ဆောင်းလေအေးက အရေပြားအစိုဓာတ်ကို လျော့နည်းစေလို့ အသားအရေ ခြောက်သွေ့ပြီး ယားယံတာတွေ ဖြစ်စေပါတယ်။ အရမ်းဆိုးရင် အသားအရမ်းအက်ကွဲခြင်း၊ နှင်းခူရောဂါနဲ့ Psoriasis လို့ခေါ်တဲ့ အသားထူရောဂါတွေအထိ ဖြစ်တတ်ပါတယ်။ ဒါ့ကြောင့် ဆောင်းရာသီရောက်ရင် အသားအရေထိန်းသိမ်းဖို့က အင်မတန်အရေးကြီးပါတယ်။
ဆောင်းတွင်းမှာ ကြည်လင်တဲ့အသားအရေလေးကို ပိုင်ဆိုင်နိုင်ကြစေဖို့ အောက်ဖော်ပြပါအချက်တွေကို ဂရုတစိုက်နဲ့ ဆောင်ရွက်ပေးသင့်ပါတယ်။
၁။  မျက်နှာသစ်တဲ့အခါ၊ ရေချိုးတဲ့အခါ ရေကြက်သီးနွေးလေး သုံးပါ။
အရမ်းအေးတဲ့အခါ ရေနွေးပူနဲ့ပဲ ရေချိုးချင်ကြပါလိမ့်မယ်။ ဒါပေမဲ့ ရေနွေးပူဟာ အသားအရေကို မြန်မြန် ခြောက်သွေ့စေလို့ Moisturizer (သို့) အသားအရေ ထိန်းသိမ်းမှု အဆီတစ်မျိုးမျိုးကိုသာ အချိန်မီမလိမ်းပေးရင် အသားအက်ကွဲတာတွေ၊ နှင်းခူတွေ ဖြစ်လာနိုင်ပါတယ်။ ဒါ့ကြောင့် ရေကြက်သီးနွေးကိုပဲ အသုံးပြုပါ။ မျက်နှာသစ်ပြီး၊ ရေချိုးပြီးရင်လည်း Moisturizer (သို့) အသားအရေ ထိန်းသိမ်းမှု အဆီတစ်မျိုးမျိုးကို အမြဲလိမ်းပေးပါ။

၂။  လေထုစိုထိုင်းမှုကို ထိန်းပေးပါ။
ဆောင်းတွင်းလေဟာ စိုထိုင်းမှုနည်းပြီး ခြောက်သွေ့လို့ အရေပြားရှိရေဓာတ်ကို မြန်မြန်အငွေ့ပြန်စေပြီး အသားခြောက်စေပါတယ်။ ဒါ့ကြောင့် အိမ်မှာ လေထုစိုထိုင်းမှုကို ထိန်းပေးတဲ့စက် (Humidifier) သုံးပေးပါ။

၃။  Skin Care ပစ္စည်းတွေကို စနစ်တကျ ရွေးချယ်သုံးစွဲပါ။
ဆောင်းတွင်းမှာ အသားအရေကြည်လင်ဖို့ဆိုရင် ဓာတုပစ္စည်းပါဝင်မှုနည်းတဲ့ အပျော့စားပစ္စည်းတွေကိုသာ အသုံးပြုပေးပါ။ Moisturizer ပါဝင်တဲ့ မျက်နှာသစ်၊ ရေချိုးဆပ်ပြာတို့ကို သုံးပါ။ ဝက်ခြံတွေရှိခဲ့မယ်ဆိုရင် Ceramides, Hyaluronic acid, Glycerin ပါဝင်တဲ့ ပစ္စည်းတွေကို သုံးပါ။ အရက်ပြန် (alcohol) ပါဝင်တဲ့ ဘယ်ပစ္စည်းကိုမဆို မသုံးပါနဲ့။

၄။  အရေပြားကို ကာကွယ်ပါ။
ဆောင်းရာသီမှာ အပြင်ထွက်ရင် အေးစက်တဲ့လေနဲ့နှင်းတွေ အရေပြားနဲ့ မထိတွေ့စေဖို့ လက်အိတ်ဝတ်ပေးပါ။ ဦးထုပ်ဆောင်းပေးပါ။ ဆောင်းတွင်းမှာ နေရောင်ခြည်နဲ့ ထိတွေ့တာဟာ နွေးထွေးပြီး နေလို့ကောင်းပေမယ့် ခရမ်းလွန်ရောင်ခြည်ကြောင့် အသားအရေ ပျက်စီးနိုင်ပါတယ်။ ဒါ့ကြောင့် နေဒဏ်ကာကွယ်တဲ့လိုးရှင်းကို သုံးပေးပါ။