ဝက်ခြံ

ဝက်ခြံဟာ များသောအားဖြင့် အဆီရှိရာနေရာများဖြစ်တဲ့ မျက်နှာ၊ လည်ပင်း၊ ရင်ဘတ်၊ ပခုံးနဲ့ ကျောဘက်တွေမှာ အဖြစ်များလေ့ရှိပါတယ်။ ခန္ဓာကိုယ်မှ အဆီများကို ပိုမိုထုတ်လုပ်သောအခါ ၎င်းအဆီများနှင့် အရေပြားဆဲလ်သေတွေဟာ အမွှေးအိတ်များတွင် စုပုံလာသဖြင့် ဘက်တီးရီးယားပိုးမွှားများပေါက်ဖွားမှုကို အားပေးသောကြောင့် ဝက်ခြံဖြစ်လာရခြင်း ဖြစ်ပါတယ်။

>>  ဝက်ခြံကို ဖြစ်ပွားစေ (သို့) ပိုမိုဆိုးဝါးစေသော အကြောင်းများ
ဝက်ခြံကိုဖြစ်ပွားစေ (သို့) ပိုမိုဆိုးဝါးစေတဲ့ အကြောင်းရင်းများကတော့ -
(1)  အန်ဒရိုဂျင် (Androgen) ဟော်မုန်းပြောင်းလဲခြင်း -    အပျိုဖော်ဝင်ချိန်နှင့် လူပျိုဖော်ဝင်ချိန်တို့တွင် Androgen ဟော်မုန်းပြောင်းလဲမှုကြောင့် အဆီများ ပိုမိုထွက်လာကာ ဝက်ခြံပေါက်စေပါတယ်။ ဒါ့အပြင် ကိုယ်ဝန်ဆောင်ခြင်းနှင့် သန္ဓေတားဆေး သုံးစွဲခြင်းတို့ကြောင့်လည်း ဟော်မုန်းအပြောင်းအလဲဖြစ်ကာ ဝက်ခြံပေါက်စေပါတယ်။
(2)  စတီးရွိုက် (သို့) အန်ဒရိုဂျင်ဟော်မုန်း (သို့) စိတ်ရောဂါဆေး Lithium    ပါဝင်သော ဆေးဝါးများ သုံးစွဲခြင်း
(3)  နို့နှင့် နို့ထွက်ပစ္စည်းများ၊ ကာဗိုဟိုက်ဒရိတ် ပါဝင်မှုမြင့်မားသော အစားအစာများ (ဥပမာ - ပေါင်မုန့်၊ အာလူးကြော် အလွန်အကျွံ စားသုံးခြင်း)
(4)  ချောကလက် အစားများခြင်း
(5)  စိတ်ဖိစီးမှုများခြင်း - စိတ်ဖိစီးမှုများခြင်းကြောင့် ဝက်ခြံ မပေါက်စေပေမယ့် နဂိုဝက်ခြံရှိတဲ့သူတွေ စိတ်ဖိစီးမှုရှိရင် ဝက်ခြံ ပိုဆိုးစေပါတယ်။
(6)  မျိုးရိုးလိုက်ခြင်း
(7)  မသန့်ရှင်းသောပစ္စည်းများနှင့် မကြာခဏ ထိတွေ့မိခြင်း (ဥပမာ - မိမိမျက်နှာနှင့် ဆဲလ်ဖုန်း၊ ဆိုင်ကယ်ဦးထုပ် စတာတွေဖြင့် ပွတ်တိုက်မိခြင်းကြောင့်လည်း ဝက်ခြံပေါက်နိုင်ပါတယ်။)
(8)  အဆီပါဝင်သော lotions နှင့် ခရင်မ်များ အလိမ်းများခြင်း