အဆီပြန်တတ်သူများ လှတစ်မျက်နှာဖြစ်စေဖို့

Category

အလှအပနှင့်ကျန်းမာရေး

အဆီပြန်တတ်သူတွေမှာ အဆီထုတ်ဂလငး်တွေဟာ အဆီတွေ အလွန်အကျွံ ထုတ်နေတဲ့အတွက် မျက်နှာမှာ အဆီတစ်ဝင်းဝင်း ဖြစ်ရတဲ့အပြင် ဝက်ခြံ၊ ဆားဝက်ခြံ၊ ချွေးေပေါက်ကျယ်ခြင်းနဲ့ ချွေးပေါက်ပိတ်ခြင်းများ ဖြစ်တတ်ပါတယ်။ အဆီအလွန်ပြန်တတ်သူတွေမှာ လေထုညစ်ညမ်းမှုနဲ့ အမှုန်အမှိုက်တွေက အဆီဖုတွေကို ဖြစ်စေနိုင်ပါတယ်။ ဒီလို အဆီပြန်ခြင်းနဲ့ အရေပြားပြဿနာများကို ကာကွယ်နိုင်ဖို့ အောက်ပါ နည်းလမ်းကောင်းများကို လိုက်နာလုပ်ဆောင်ကြည့်လိုက်ပါ။

အဆီပြန်ခြင်းဟာ အရေပြားပြဿ နာများကို ဖြစ်စေနိုင်တယ်ဆိုပေမယ့် ကောင်းကွက်များ ရှိပါသေးတယ်။ အဆီတွေဟာ အရေပြားအပေါ်ယံအလွှာကို အစိုဓာတ်ထိန်းပေးတဲ့အတွက် အရေးကြောင်းဖြစ်ခြင်းနဲ့ ဇရာလက္ခဏာများကို လျော့နည်းစေနိုင်ပါတယ်။

အဆီပြန်သူများအတွက် နည်းလမ်းကောင်းများ

၁။ မျက်နှာသေချာဆေးကြောပါ။

အဆီပြန်ခြင်းကို လျော့နည်းစေဖို့ နည်းလမ်းကောင်းတစ်ခုကတော့ မျက်နှာကို သေချာဆေးကြောသန့်စင်ပေးတာပဲ ဖြစ်ပါတယ်။ မျက်နှာမှာ စုပုံလာတဲ့ အဆီတွေ၊ အမှုန်အမှိုက်တွေကြောင့် ချွေးပေါက်တွေ မပိတ်ရလေအောင် တစ်နေ့ကို နှစ်ကြိမ်မှ သုံးကြိမ်ခန့် မျက်နှာဆေးကြောသင့်ပါတယ်။ ဂျယ်လ် သို့မဟုတ် အမြှုပ်ထတဲ့ မျက်နှာသစ်ဆေးမျိုးကို အသုံးပြုသင့်ပါတယ်။ ဒါပေမယ့် ကြမ်းကြမ်းတမ်းတမ်း ပွတ်ဆေးတာမျိုးကို ရှောင်ကြဉ်သင့်ပါတယ်။ ဒီလို ဆေးခြင်းက မျက်နှာအစိုဓာတ်ကို ဆုံးရှုံးစေပြီး အဆီတွေကို ပိုမိုထုတ်လုပ်စေနိုင်ပါတယ်။ Salicylic acid, လက်ဖက်ရွက်ဆီ၊ နံနွင်းနဲ့ ပျားရည်ပါဝင်တဲ့ မျက်နှာသစ်ဆေးများကို ရွေးချယ်အသုံးပြုသင့်ပါတယ်။

၂။ မျက်နှာကို ချေးချွတ်သန့်စင် scrub လုပ်ပေးပါ။

နောက်ထပ်အသုံးဝင်အရေးပါတဲ့ နည်းကောင်းတစ်ခုကတော့ တစ်ပတ်မှာ တစ်ကြိမ် အများဆုံး နှစ်ကြိမ် ပုံမှန်ချေးချွတ်ပေးပါ။ ပိုလျံနေတဲ့အဆီတွေဟာ အရေပြားအပေါ်ယံလွှာမှာ ကလာဒ်စည်းဆဲလ်အသေတွေကို စုပုံလာစေနိုင်တဲ့အတွက် ဝက်ခြံ၊ အဆီဖုနဲ့ ဆားဝက်ခြံတွေကို ဖြစ်စေနိုင်ပါတယ်။ ဒီလို စုပုံလာတဲ့ အဆီတွေနဲ့ သေနေတဲ့ဆဲလ်တွေ အမှုန်အမှိုက်တွေကို ဖယ်ရှားပေးပြီး ဆဲလ်အလွှာအသစ်တွေ ဖွဲ့စည်းနိုင်ဖို့အတွက် ပုံမှန်ချေးချွတ်သန့်စင် scrub လုပ်ပေးသင့်ပါတယ်။ ထပ်မှာချင်တာကတော့ ကြမ်းကြမ်းတမ်းတမ်းပွတ်တိုက်စရာမလိုပဲ ညင်ညင်သာသာဖြင့် အပေါ်ယံလွှာကို ဖယ်ရှားပေးသင့်ပါတယ်။

၃။ တစ်ပတ်တစ်ခါ မျက်နှာပေါင်းတင်ပါ။

ချေးချွတ်သန့်စင်ပြီးတဲ့အခါ မျက်နှာကို ပေါင်းတင်ပေးသင့်ပါတယ်။ ဒီအဆင့်ဟာလည်း အဆီပြန်တတ်သူတွေအတွက် အရေးပါပါတယ်။Bentoniteနဲ့ kaolin သဘာဝရွ့ှံစေး၊ စန္ဒကူးနဲ့ မြေစေးတစ်မျိုး ဟာ အဆီကို စုပ်ယူပေးနိုင်တဲ့အတွက် အဆီပြန်အသားအရည်အတွက် အထူးကောင်းမွန်ပါတယ်။

၄။ အရက်မပါတဲ့ တိုနာကို နေ့စဉ်အသုံးပြုပေးပါ။

နေ့စဉ်ပုံမှန် တိုနာလိမ်းပေးခြင်းက ပိုလျံနေတဲ့အဆီတွေကို နည်းစေနိုင်တဲ့အပြင် မျက်နှာပေါ်မှ အညစ်အကြေးတွေကိုလည်း သန့်စင်ပေးပါတယ်။ နှင်းဆီရည်တိုနာဟာ အရေပြားအတွက် ကောင်းမွန်ပြီး ဈေးသိပ်မကြီးတဲ့ တိုနာအမျိုးအစားတွေကလည်း အဆီကို သိသိသာသာ ထိန်းပေးနိုင်တာကို တွေ့ရပါတယ်။

၅။ အစိုထိန်းခရင်မ်တွေကိုလည်း မမေ့ပါနဲ့။

အဆီပြန်တတ်တဲ့အသားအရည်ဟာလည်း အစိုဓာတ်ရှိဖို့ လိုအပ်ပါတယ်။ မျက်နှာက အစိုဓာတ်တွေကို ကုန်စင်သွားအောင် ဖယ်ရှားခြင်းက အဆီထုတ်ဂလင်းတွေကို အဆီပိုထုတ်စေနိုင်ပြီး အဆီပြန်ခြင်းကို ပိုဆိုးစေနိုင်ပါတယ်။ ရေဓာတ်များပြီး့ အဆီမပါတဲ့ အစိုဓာတ်ထိန်းခရင်မ်မျိုးကို ရွေးချယ်အသုံးပြုသင့်ပါတယ်။

၆။ နေရောင်ကာခရင်မ်တွေအမြဲလိမ်းပေးပါ။

အဆီပြန်မှာဆိုးတဲ့အတွက် အမျိုးသမီးတော်တော်များများဟာ နေရောင်ကာခရင်မ်ကို မလိမ်းပဲ နေတတ်ကြပါတယ်။ ဒီလိုမလိမ်းတဲ့အတွက် နေရောင်နဲ့ ထိတွေ့တဲ့အခါ မျက်နှာမှာ မှဲ့ခြောက်၊ အမည်းစက်တွေ ဖြစ်လာတတ်ပါတယ်။ ဒါကြောင့် အဆီပြန် အသားအရည်အတွက် သင့်တော်မယ့် နေရောင်ကာခရင်မ်ကို ရွေးချယ်အသုံးပြုသင့်ပါတယ်။ အသင့်စားအစားအစာများနဲ့ အချိုများတာတွေကို ရှောင်ပြီး ခန္ဓာကိုယ်အဆိပ်အတောက်တွေကို စွန့်နိုင်ဖို့ ရေများများသောက်သင့်ပါတယ်။ အသီးအရွက် များများစားပေးပါ။ ဒီလိုနည်းလမ်းကောင်းတွေကို ပုံမှန်လိုက်နာဆောင်ရွက်ခြင်းက မျက်နှာပြင်ပေါ်က အဆီတွေကို လျော့နည်းစေနိုင်ပြီး စိုပြေဝင်းပတဲ့ အသားအရည်လေးကို ပိုင်ဆိုင်စေမှာပါ။

Dr. Mya Phoo Ngon (www.drmyanmar.com)

BMI တွက်ရန်

ကိုယ်၀န်ပတ်တွက်ရန်

ဆရာဝန်ကြီးများ၏ဆောင်းပါးများ