ဆယ်စုနှစ် တစ်ခုပြီးတစ်ခုမှာ အမျိုးသမီးတို့ရဲ့ ဓမ္မတာအပြောင်းအလဲများ

>>  အသက် ၃၀ အပိုင်းအခြားကို ရောက်တဲ့အခါ -
ဒီအချိန် အပိုင်းအခြားတွင်းမှာ ရာသီတော်တော်မှန်နေပါပြီ။ ရုတ်တရက် သွေးဆင်းတာ များလာတာ၊ ပုံမှန်ထက် ပိုအောင့်လာတာမျိုးတွေက အောက်ခံပြဿနာတစ်ခုခု ရှိနေနိုင်ပါတယ်။ ဥပမာအားဖြင့် သွေးအဆင်းများစေတဲ့ သားအိမ်အသားလုံးတွေဟာ အသက် ၃၀ ပိုင်းတွင်းမှာ အဖြစ်များပါတယ်။ ဒါ့အပြင် တစ်လလုံးလုံး ဗိုက်အပြင်းအထန်နာတတ်တဲ့ သားအိမ်အတွင်းလွှာ နေရာမှားနေတဲ့ပြဿနာလည်း ရှိတတ်သေးတယ်။
နောက်ထပ်အပြောင်းအလဲကြီးတစ်ခုကတော့ ကိုယ်ဝန်ဆောင်ချိန်ပါ။ ကိုယ်ဝန်ဆောင်ချိန်မှာ ဓမ္မတာမလာတာတော့ အားလုံးသိကြမှာပါ။ ဒါပေမဲ့ မိခင်နို့မတိုက်တဲ့အမေတွေမှာ ကလေးမွေးပြီး ၆ ပတ်လောက်အထိ ဓမ္မတာမလာဘူးဆိုတာတော့ သိချင်မှသိကြမယ်။ အမေနို့တိုက်တဲ့မိခင်တွေဆိုရင် နို့မဖြတ်မချင်း၊ ဒါမှမဟုတ် နို့တိုက်ချိန်မလျော့မချင်း ရာသီမလာတာမျိုး ဖြစ်တတ်ပါတယ်။
ဒါ့အပြင် ကလေးမွေးလိုက်ခြင်းက ရာသီစက်ဝန်းမှာ ရေရှည်အပြောင်းအလဲတွေ ဖြစ်လာစေတတ်တယ်။ ကိုယ်ဝန်ဆောင်ချိန်ကို ဖြတ်ကျော်ပြီးချိန်မှာ နာတာကိုက်တာ သက်သာသွားတတ်တယ်လို့ အမျိုးသမီးအများစုက ပြောတယ်။ ဖြစ်စေနိုင်တဲ့အကြောင်းရင်းတွေ အများကြီးရှိနိုင်တဲ့ထဲကမှ အဖြစ်နိုင်ဆုံးကတော့ သားအိမ်ခေါင်းအဝ အနည်းငယ် ကျယ်လာတာကြောင့် သားအိမ် ကောင်းကောင်းညှစ်စရာမလိုဘဲ သွေးကောင်းကောင်းဆင်းနိုင်တာပါပဲ။

>>  အသက် ၄၀ အပိုင်းအခြားအတွင်းမှာ -
အသက် ၄၀ အရွယ်ဟာ သွေးမဆုံးခင် ဟော်မုန်းအတက်အကျ စဖြစ်တဲ့အချိန်ပါပဲ။ ၄၀ လောက်ဟာ သွေးမဆုံးခင် ၈ နှစ်ကနေ ၁၀ နှစ်လောက် လိုသေးတဲ့အချိန်ဖြစ်ပေမယ့် သွေးဆုံးဖို့အတွက် စပြင်ဆင်နေပြီပေါ့။
ဟော်မုန်းအပြောင်းအလဲတွေ ဖြစ်တဲ့အခါ သားဥကြွေတာ ပိုကမောက်ကမဖြစ်လာပြီးတော့ ရာသီသွေးပျောက်တာ၊ သွေးဆင်းများတာ၊ ရာသီချိန်မဟုတ် သွေးစဆင်းတာ၊ ရာသီမလာခင် စိတ်အတက်အကျဖြစ်တာ ပိုများတာမျိုးတွေနဲ့ လာတတ်တယ်။ သွေးမဆုံးခင်အချိန်မှာ ဘယ်ဟာမှ မသေချာမရေရာဘူးနော်။ သားဥကြွေတာသာ ကမောက်ကမဖြစ်နေတာ၊ ကိုယ်ဝန်တော့ ရနိုင်သေးတာကို မမေ့နဲ့နော်။ တစ်နှစ်တိတိ လုံးဝရာသီရပ်သွားတာ မဟုတ်မချင်း သွေးဆုံးပြီလို့ ပြောမရဘူးနော်။
ဘယ်အသက်အရွယ်ပဲဖြစ်ဖြစ် ဓမ္မတာဟာ ကျန်းမာရေးအပေါ်မှာ အများကြီး သက်ရောက်မှုရှိနေတယ်ဆိုတာကို သိထားဖို့ လိုတယ်နော်။ ဒါကြောင့် ပုံမမှန်တဲ့လက္ခဏာတစ်ခုခု ရှိနေတယ်ဆိုရင် ဆရာဝန်နဲ့ ပြဖို့လိုအပ်တယ်။

Dr. Mya Phoo Ngon (www.drmyanmar.com)