မေမေတို့ရဲ့သားသားမီးမီးလေးတွေမှာ ချောင်းဆိုးခြင်းနှင့်အတူ အသက်ရှူတိုင်း တရွီရွီ မြည်နေတာမျိုးရှိလား

(Unicode)

    ချောင်းဆိုးခြင်းဟာ ကလေးငယ်များတွင် အဖြစ်များသောဝေဒနာတစ်မျိုး ဖြစ်ပါတယ်။ တစ်ခါတလေမှာ ချောင်းဆိုးခြင်းဟာ လည်ချောင်းထဲက လေပေါက်တွေကို သန့်ရှင်းပေးနေခြင်း ဖြစ်ပါတယ်။ ဒါပေမဲ့ သားသားမီးမီးတို့မှာ ချောင်းဆိုးခြင်းနဲ့အတူ အသက်ရှူတိုင်း အသံမြည်နေတာမျိုးရှိပါက မေမေတို့အနေဖြင့် အချိန်ပြည့် စောင့်ကြည့်ပေးဖို့ လိုပါတယ်။ ချောင်းဆိုးခြင်းနဲ့အတူ အသက်ရှူတိုင်း အသံမြည်ခြင်းကို ဖြစ်စေတဲ့ အကြောင်းရင်းများစွာ ရှိပါတယ်။
●    အအေးမိခြင်း၊ ဗိုင်းရပ်စ်ပိုးဝင်ခြင်း
●    လည်ချောင်းတွင် တစ်ခုခုနင်ခြင်း
●    လေပြွန်ယောင်ခြင်း
●    ကလေးအနား ဆေးလိပ်သောက်ခြင်း
●    ပန်းနာရင်ကြပ်ရောဂါ
●    နမိုးနီးယားရောဂါ စသည်တို့ကြောင့် ဖြစ်ပေါ်နိုင်ပါတယ်။

>>    ဘယ်လိုအချိန်မျိုးမှာ ဆေးခန်း မဖြစ်မနေပြဖို့ လိုမလဲ?
●    တကယ်လို့ သားသားမီးမီးလေးဟာ အသက်ရှူကြပ်ခြင်း၊ အသက်ရှူမဝဖြစ်ခြင်း ရှိပါက
●    အသက်ရှူသံ မြန်လာပါက
●    အသက်ရှူသံများ ဆူညံနေပါက
●    ကလေးရဲ့ အရေပြားနဲ့ နှုတ်ခမ်းများ ပြာလာပါက
●    ကလေးဟာ မောပန်းနုံးချိနေပါက
●    အဖျား 37° ထက် ကျော်ပါက
●    နို့မစို့ခြင်း၊ အစာမဝင်ခြင်း ရှိပါက
●    လည်ပင်းနင်နေသောလက္ခဏာများ ဖြစ်ပေါ်ပါက ချက်ချင်း ဆေးရုံ၊ ဆေးခန်းသို့ ခေါ်ဆောင်ပါ။

    အထက်ပါလက္ခဏာများမရှိဘဲ သာမန်ချောင်းဆိုးခြင်းနဲ့ အသက်ရှူသံမြည်ခြင်းအတွက် အိမ်မှာပဲ ဖေဖေ မေမေတို့ ဂရုစိုက်ပေးနိုင်ပါတယ်။
●    ကလေးကို သက်သောင့်သက်သာရှိအောင် ထားပေးပါ။
●    ရေ၊ ဓာတ်ဆားရည်၊ ကြက်စွပ်ပြုတ်၊ နွားနို့ စသောအရည်များကို မကြာခဏ တိုက်ပေးပါ။
● ကလေးအနီးတဝိုက်တွင် ဆေးလိပ်သောက်ခြင်း၊ ခြင်ဆေး ထွန်းခြင်း၊ ခွေးကြောင်များ ထားခြင်း၊ ဟင်းချက်ခြင်းတို့ကို ရှောင်ကြဉ်ပါ။
●    ချောင်းဆိုးပျောက်ဆေးနဲ့ ပိုးသတ်ဆေးတို့ကို ဆရာဝန် ညွှန်ကြားချက်အတိုင်း တိုက်ကျွေးပါ။

လေပြေနုသွေး (ဆေး-၂) (www.drmyanmar.com)