အဖျားကြီးပြီး တက်နေတဲ့ ကလေးတစ်ယောက်အတွက် ရှေးဦးသူနာပြုကုသနည်း

(Unicode)

    ကလေးလေး တက်နေပြီ။ လုပ်ကြပါဦး။
    အမေတစ်ယောက်ရဲ့ အလန့်တကြားအော်သံနဲ့အတူ ဘေးနားကလူကြီးတွေ ပြေးပြီး ကလေးကို ခြေမတွေ ဝိုင်းချိုးကြတော့တာပါပဲ။
    အမေနဲ့ အဖေကတော့ ဘေးမှာ ခြေမကိုင်မိ၊ လက်မကိုင်မိပေါ့။
    ကလေးလေးတက်နေရင် ဘာလုပ်ပေးရမလဲ? ဘယ်ဟာက အမှန်လဲဆိုတာ သိထားသင့်တာပေါ့နော်။
    ကိုယ့်ကလေး တက်နေတာကို မြင်ရတာ အင်မတန် ထိတ်လန့်ဖို့ကောင်းပါတယ်။ ဒီဆောင်းပါးမှာ အဖျားကြီးပြီးတက်တဲ့ လက္ခဏာတွေနဲ့ တက်ခဲ့ရင် ဘာလုပ်ပေးရမလဲဆိုတာကို ပြောပြပေးသွားမှာပါ။
    အဖျားကြီးပြီး တက်တယ်ဆိုတာ ကလေးလေးတွေမှာ ဖြစ်တတ်ပါတယ်။ အထူးသဖြင့် အသက် ၆ လ နဲ့ ၆ နှစ်ကြား ကလေးတွေမှာပေါ့။

>>    ကလေးအဖျားကြီးပြီးတက်ခဲ့ရင် -
၁။    ကလေးကို ထိခိုက်ဒဏ်ရာမရအောင် ကာကွယ်ပါ။ ဒါပေမဲ့ အတင်းကြီး ချုပ်မထားပါနဲ့။
    ကလေးတက်နေချိန်မှာ ဘေးနားက ဘေးဖြစ်စေနိုင်တဲ့ပစ္စည်းတွေ အကုန်ဖယ်ထားပါ။ ကလေးကို စောင်ဖြစ်ဖြစ်၊ အဝတ်တစ်ခုခုနဲ့ဖြစ်ဖြစ် ပတ်ထားပေးပါ။

၂။    အဝတ်အစား အထပ်ထပ် ဝတ်ထားတာတွေ အကုန်ချွတ်ပစ်လိုက်ပါ။
    အခန်းကပူအိုက်နေရင် တံခါးတွေ အကုန်ဖွင့်ပြီး လေကောင်းလေသန့်ရအောင် လုပ်ပါ။

၃။    အတက်ကျသွားတဲ့အခါ ကလေးကို ဘေးစောင်းလှဲစေပြီး ခေါင်းလေးကို မော့မော့လေး ထားပေးပါ။
    အသက် ၁ နှစ်အောက် ကလေးတွေဆိုရင် ချီပွေ့ပေးတဲ့အခါ ခေါင်းကို တင်ပါးထက်စာရင် အောက်နည်းနည်း နှိမ့်ပေးထားသင့်ပါတယ်။

၄။    ဆက်တက်နေတာပဲဖြစ်ဖြစ်၊ ပထမဆုံးအကြိမ် တက်တာပဲဖြစ်ဖြစ် ဆေးရုံ၊ ဆေးခန်း သွားပြသင့်ပါတယ်။

>>    အဖျားကြီး အတက်ရောဂါအတွက် မေးလေ့ရှိတဲ့ မေးခွန်းတွေကတော့ အဖျားကြီးအတက်ရောဂါဟာ ဘယ်လိုပုံစံမျိုးနဲ့လာတတ်သလဲ?
    ကလေးတက်နေတဲ့အချိန်မှာ ခါးကော့၊ တစ်ကိုယ်လုံး တောင့်တင်းပြီးတော့ လက်သီးတင်းတင်း ဆုပ်ထားပါလိမ့်မယ်။ မျက်နှာကြီးနီရဲပြီး ပူခြစ်တောက်၊ ချွေးတွေ ပြန်နေပါလိမ့်မယ်။ မျက်လုံး အပေါ်လန်နေတာ၊ အသက်ရှူ အောင့်ထားတာမျိုးလည်း ရှိတတ်ပါတယ်။ အဖျားကြီးအတက် ရောဂါဟာ ကြည့်ရတာ ကြောက်ဖို့ကောင်းပေမယ့် များသောအားဖြင့်တော့ စိုးရိမ်စရာ သိပ်မရှိပါဘူး။

>>    အဖျားကြီးအတက်ကို ဘယ်လိုကာကွယ်ရမလဲ?
    အဓိကက အဖျားကြီးလို့ တက်တာပါ။ ဒါကြောင့် ကလေးမှာ အဖျားကြီးလာပြီဆိုရင် တတ်နိုင်သလောက် အဖျားချဖို့ ကြိုးစားပါ။ အဝတ်အစား အထပ်ထပ်ကို ချွတ်ပစ်တာ၊ စောင်တွေ ဖယ်ပစ်တာ၊ ပြတင်းပေါက်တွေ ဖွင့်တာ၊ Biogesic for Kids လို ပါရာစီတမောပါတဲ့ အဖျားကျဆေးတွေ တိုက်တာမျိုး ပြုလုပ်သင့်ပါတယ်။

>>    တက်နေတဲ့ကလေးကို အဝတ်အစားတွေ ဘယ်လိုချွတ်ပစ်ရမလဲ?
    တက်နေတဲ့အခါ ကလေး တောင့်တင်းနေတော့ အဝတ်အစားတွေချွတ်ပစ်ဖို့ရာ ခက်ခဲတတ်ပါတယ်။ ဒါပေမဲ့ စိတ်ကို ငြိမ်ငြိမ်ထားပြီး ကလေးကို အတင်းအကျပ်မဟုတ်ဘဲ ဖြည်းဖြည်းချင်း ချွတ်လိုက်ပါ။

>>    တက်နေတုန်း ဆေးတိုက်ဖို့လိုသလား?
    မလိုပါဘူး။ တက်နေတုန်းမှာ ဆေးပဲဖြစ်ဖြစ် ဘာတစ်ခုမှ ကလေးပါးစပ်ထဲကို မထည့်လိုက်ပါနဲ့။ ထိခိုက်ဒဏ်ရာတွေ ပိုဆိုးတတ်ပါတယ်။

>>    တက်တာ ဘယ်လောက်ကြာတတ်သလဲ?
    မိနစ်ပိုင်းလောက် ကြာတတ်ပြီး တစ်ယောက်နဲ့တစ်ယောက် ကွာခြားတတ်ပါတယ်။

>>    ကလေးကို အရေးပေါ်ခေါ်သွားဖို့ လိုသလား?
    ပထမဆုံးအကြိမ် တက်တာဖြစ်ဖြစ်၊ ၅ မိနစ်ထက် ပိုကြာနေရင်ပဲဖြစ်ဖြစ် အနီးဆုံးဆေးရုံကို ခေါ်သွားပါ။

Dr. Mya Phoo Ngon (www.drmyanmar.com)