ဆီးချိုရောဂါ ရှိနေပါက သစ်သီးတွေ စားလို့ရသလား

          မိုးတွင်းမှာ လှိုင်လှိုင်ပေါလှသော သရက်သီး၊ နာနတ်သီးများက လူတိုင်းကို ဆွဲဆောင်လျက် ရှိပါတယ်။ သို့သော် အချိုများသော အသီးများကို စားခြင်းကြောင့် ဆီးချို၊ သွေးချိုပမာဏကို တက်စေတဲ့အတွက် ဆီးချိုသမားများအနေဖြင့် သစ်သီးများကို စိတ်ချစွာ စားသုံးနိုင်လားဆိုတာ မေးခွန်းတစ်ခု ဖြစ်လာပါတယ်။ ဒီအတွက် အဖြေကတော့ အောက်ပါအတိုင်း ဖြစ်ပါတယ်။

>>    သစ်သီးတွေက ကျန်းမာရေးနဲ့ ညီညွတ်ပါတယ်။

          ကျွန်မတို့ရဲ့ ဦးနှောက်ဆဲလ်တွေ ကောင်းစွာ အလုပ်လုပ်နိုင်ဖို့ ကောင်းမွန်တဲ့ ကစီဓာတ်ကိုလည်း လိုအပ်ပါသေးတယ်။ ထိုကောင်းမွန်တဲ့ ကစီဓာတ်ကို သစ်သီးများက ပေးစွမ်းတဲ့အပြင် ဗီတာမင်များ၊ antioxidants များ၊ သတ္တုဓာတ်နဲ့ အမျှင်ဓာတ်များ ပါဝင်တာမို့ ကျန်းမာရေးအတွက် သင့်တော်ပါတယ်။

>>    အမျှင်ဓာတ်က သင့်အတွက် အရေးကြီးပါတယ်။

          သစ်သီးတွေမှာ အချိုဓာတ် ပါဝင်သော်လည်း အမျှင်ဓာတ်များ ကြွယ်ဝစွာလည်း ပါဝင်ပြန်တာမို့ အချိုဓာတ်ကို ပြန်လည်မျှတစေနိုင်ပါတယ်။ သစ်သီးများ စားသောအခါ ဗိုက်ပြည့်စေတဲ့အတွက် နောက်ထပ် အစာမစားမိစေဘဲ အချိုဓာတ်များ မြင့်တက်လာခြင်းကို ကာကွယ်ပေးပါသေးတယ်။

>>    နေ့စဉ်ပမာဏတစ်ခု သတ်မှတ်ပြီး စားပါ။

          တစ်နေ့ကို သစ်သီးနဲ့ ဟင်းရွက် ၅ serving စားဖို့ ညွှန်ကြားထားပါတယ်။ ဆီးချိုသမားများအတွက်လည်း ထိုနည်းတူပါပဲ။ သစ်သီး ၂ serving နဲ့ ဟင်းရွက် ၃ serving ဆိုပြီး ခွဲစားနိုင်ပါတယ်။ ၁ serving ကို အကြမ်းပန်းကန်လုံးတစ်ခွက်ဖြင့် တိုင်းတာနိုင်ပါတယ်။

>>    သဘာဝသစ်သီးကိုသာ စားပါ။

          သကြားရည် စိမ်ထားသောအသီးများ၊ စည်သွပ်ဘူးများတွင် အချိုပါဝင်မှု များတာမို့ သဘာဝသစ်သီးကိုသာ စားသုံးပေးသင့်ပါတယ်။

>>    သစ်သီးဖျော်ရည်အဖြစ် မသောက်သုံးသင့်ပါ။

          သစ်သီးများကို ဖျော်ရည်အဖြစ် ပြောင်းလဲတဲ့အခါ အမျှင်ပါဝင်မှု နည်းသွားပြီး သကြားပါဝင်မှု ပိုများလာပါတယ်။ သစ်သီးဖျော်ရည်ကို အာသီသရှိပါက အကြမ်းပန်းကန်လုံး တစ်ဝက်ခန့်သာ သောက်သုံးသင့်ပါတယ်။

>>    အခြားသော အချိုများကို အစားထိုး စားသုံးနိုင်ပါတယ်။

          အချိုကြိုက်သူများအနေဖြင့် ကိတ်မုန့်နဲ့ သကြားလုံးများကို စားချင်တဲ့အခါတွင် သစ်သီၤးများ စားခြင်းက ကျန်းမာရေးနဲ့ ပိုညီညွတ််စေပါတယ်။ သစ်သီးကပေးသော အချိုဓာတ်က နောက်ထပ်အချိုများကို မတောင့်တစေဖို့ ကူညီပေးနိုင်ပါသေးတယ်။

>>    အရောင်အသွေး စုံလင်အောင် စားပါ။

          သစ်သီးတစ်မျိုးတည်း စားခြင်းထက် အနီရောင်၊ ခရမ်းရောင်၊ အဝါရောင် ရောစပ်စားခြင်းဖြင့် ပိုမိုပြည့်စုံသော ဗီတာမင်နဲ့ antioxidants များကို ရရှိစေပါလိမ့်မယ်။

>>    ဆရာဝန်နဲ့ တိုင်ပင်ပါ။

          ဆီးချိုမကျတဲ့သူများအနေဖြင့်တော့ သစ်သီးများ စားသုံးလိုပါက ဆရာဝန်နဲ့ အရင်ဆုံး တိုင်ပင်ဆွေးနွေးနိုင်ပါတယ်။

လေပြေနုသွေး (ဆေး-၂) (www.drmyanmar.com)