ညိုသကျည်းရိုးနာကျင်ခြင်း

         Shin Splint လို့ခေါ်တဲ့ ညိုသကျည်းရိုးနာကျင်ခြင်းဟာ အားကစားများ၊ အကပညာရှင်များနှင့် စစ်မှုထမ်းနေသူများတွင် အဖြစ်များလေ့ရှိတဲ့ ဝေဒနာတရပ်ဖြစ်ပါတယ်။

         တခါတရံ ရုတ်တရက်လေ့ကျင့်ခန်းပြင်းပြင်းထန်ထန်ပြုလုပ်ချိန်မှာလည်း ခံစားရနိုင်ပြီး လှုပ်ရှားမှုများခြင်းနှင့် အသုံးပြုမှုများခြင်းတို့ကြောင့် ကြွက်သား၊ အရွတ်နှင့် အရိုးတစ်သျှူးများအပေါ်တွင် ဝန်ပိပြီးနာကျင်မှုကို ခံစားရခြင်းဖြစ်ပါတယ်။ သင့်လျော်သော ဖိနပ်စီးခြင်း၊ လေ့ကျင့်ခန်းပြုလုပ်မှုပုံစံပြောင်းလဲခြင်းတို့ဖြင့် ညိုသကျည်းရိုးနာကျင်ခြင်း ထပ်ခါထပ်ခါမဖြစ်ရလေအောင် ကာကွယ်ပေးနိုင်ပါတယ်။

ရောဂါလက္ခဏာများ

        ညိုသကျည်းတလျှောက်နာကျင်ခြင်း၊ ခြေထောက်အောက်ပိုင်း အနည်းငယ်ရောင်ရမ်းခြင်းတို့ကို ခံစားရနိုင်ပါတယ်။

          အစပိုင်း၌ အနားယူချိန်တွင် နာကျင်မှုသက်သာသော်လည်း နောက်ပိုင်းတွင် ဆက်တိုက်နာကျင်လာနိုင်ပါတယ်။

ဖြစ်ပွားရတဲ့အကြောင်းအရင်း

        ညိုသကျည်းရိုးနာကျဉ်မှုခံစားရခြင်းဟာ အသုံးပြုမှုများခြင်းနှင့် ကြွက်သားနှင့်အရိုးကိုတွယ်ဆက်ပေးထားတဲ့ တွယ်ဆက်တစ်သျှူးများနှင့် အရိုးပေါ်တွင်ဒဏ်ဖြစ်စေတဲ့ အကြောင်းအရာတွေကြောင့်ဖြစ်ပါတယ်။

          အပြေးအားကစားသမားများ လေ့ကျင့်ခန်းရုတ်တရတ်ပြင်းပြင်းထန်ထန်လုပ်ခြင်း၊ ကွန်ကရစ်၊ တောင်ကုန်း စသောမာကျောပြီး ညီညာမှုမရှိသောမျက်နှာပြင်ပေါ်တွင် ပြေးခြင်း၊ စစ်ရေးလေ့ကျင့်ခန်းလုပ်ဆောင်ခြင်း၊ မွေးရာပါ ခြေဖဝါးပြားခြင်း (သို့) ခြေဖဝါးအလွန်အမင်းခွက်ခြင်း စတဲ့အချက်တွေက ညိုသကျည်းရိုးနာကျင်မှုကို မြင့်တက်စေနိုင်တဲ့ အကြောင်းရင်းတွေပဲဖြစ်ပါတယ်။

စစ်ဆေးခြင်း

        ရောဂါရာဇဝင်မေးမြန်းခြင်းနှင့် အထွေထွေစစ်ဆေးမှုပြုလုပ်ခြင်းဖြင့် သိနိုင်ပါတယ်။ လိုအပ်ပါက ဓာတ်မှန်အပါအဝင်အခြားသော စစ်ဆေးမှုတွေပြုလုပ်ဖို့ ဆရာဝန်ကညွှန်ကြားပါလိမ့်မယ်။

ကုသခြင်း

        များသောအားဖြင့် ညိုသကျည်းနာကျင်ခြင်းကို အိမ်တွင်းကုထုံးတွေနဲ့ သက်သာအောင်ပြုလုပ်နိုင်ပါတယ်။

1. အနားယူပါ

        နာကျင်မှုကိုဖြစ်စေတဲ့ လှုပ်ရှားမှုတွေပြုလုပ်ခြင်းကို ရှောင်ရှားပါ။ သက်သာလာချိန်တွင် လေ့ကျင့်ခန်းပြုလုပ်လိုပါက ရေကူးခြင်း၊ စက်ဘီးစီးခြင်း စတာတွေပြုလုပ်နိုင်ပါတယ်။

2. ရေခဲကပ်ပါ

        တစ်ကြိမ်စီလျှင် 15 မိနစ်ခန့်နှင့် တစ်နေ့လျှင် 4 ကြိမ်မှ 8 ကြိမ်လောက်ရေခဲကပ်ပေးပါ။ ရက်တော်တော်ကြာတဲ့အထိ ပြုလုပ်ပေးပါ။ အရေပြားကိုထိခိုက်မှုမရှိစေရန် ရေခဲကိုပုဝါဖြင့်အုပ်ပြီးမှကပ်ပါ။

          အနာသက်သာလာစေရန် ပါရာစီတမော (paracetamol)၊ Ibuprofun (အိုင်ဗျူပရိုဗန်) ကဲ့သို့သော ဆေးဝါးတွေမှီဝဲနိုင်ပါတယ်။ နာကျင်မှုအားလုံးလျော့ပါးသွားချိန်တွင် ပုံမှန်လုပ်ငန်းဆောင်တာတွေကို ဖြေးဖြေးချင်း စတင်လုပ်ဆောင်နိုင်ပြီဖြစ်ပါတယ်။

ကာကွယ်ခြင်း

1. မိမိရဲ့လှုပ်ရှားမှုတွေကိုပြန်လည်ဆန်းစစ်ပါ။

          အပြေးသမားအနေဖြင့် မိမိပြေးတဲ့ပုံစံကို ဗီဒီယိုဖြင့်မှတ်တမ်းတင်ထားပြီး ကျွမ်းကျင်ဆရာဝန်နှင့် တိုင်ပင်ပါ။ များသောအားဖြင့် ပြေးတဲ့ပုံစံကိုပြုပြင်ပြောင်းလဲခြင်းက ညိုသကျည်းရောင်ရမ်းမှုခံစားရနိုင်ချေကို လျော့ချပေးပါတယ်။

2. ညိုသကျည်းပေါ်တွင် ဝန်ပိခြင်းမဖြစ်စေရန် လေ့ကျင့်ခန်းအလွန်အကျွံပြုလုပ်ခြင်းကို ရှောင်ရှားပါ။

3. ဖိနပ်ဆိုဒ်အရွယ်အစားမှန်ကန်အောင်ရွေးချယ်ပါ။ အပြေးသမားဖြစ်ပါက မိုင်ပေါင်း 350 မှ 500 အထိပြေးပြီးတိုင်း အားကစားဖိနပ်ကို လဲလှယ်ပါ။

4. ခြေထောက်ပြား (flat foot) ဖြစ်ပါက အထောက်အကူပေးနိုင်တဲ့ Arch Support တွေအသုံးပြုခြင်းဖြင့် ညိုသကျည်းရိုး နာကျင်မှုမဖြစ်အောင်ကာကွယ်နိုင်ပါတယ်။

5. ခြေထောက်ကိုသက်တောင့်သက်သာဖြစ်စေပြီး ကူရှင်သဖွယ်ထောက်ပံ့ပေးနိုင်တဲ့ Shock Absorbing ရှူးဖိနပ်အောက်ခံကို ရွေးချယ်ပါ။

6. လေ့ကျင့်ခန်းပြုလုပ်ရာမှာ ညိုကကျည်းပေါ်တွင် သက်ရောက်မှုနည်းတဲ့ ရေကူးခြင်း၊ စက်ဘီးစီးခြင်း၊ လမ်းလျှောက်ခြင်း စတဲ့လေ့ကျင့်ခန်းနှင့် ပြင်းပြင်းထန်ထန်ပြုလုပ်ရတဲ့လေ့ကျင့်ခန်းတလှည့်စီ ပြုလုပ်ပေးပါ။ လေ့ကျင့်ခန်းအသစ် စတင်ပြုလုပ်မည်ဆိုပါက လောမကြီးဘဲ ဖြေးဖြေးချင်းစတင်ပါ။

7. ပြင်းပြင်းထန်ထန်လုပ်ဆောင်ရတဲ့ လေ့ကျင့်ခန်းများပြုလုပ်ရာတွင် ခံနိုင်ရည်ရှိစေရန် ခြေထောက်၊ ခြေကျင်းဝတ်၊ တင်ပဆုံ အားကောင်းစေတဲ့ လေ့ကျင့်ခန်းများများ ပြုလုပ်ပေးပါ။

Dr. Htet Htet Aung

www.drmyanmar.com