ကလေးများတွင် လေပြွန်ရောင်ခြင်း

>>  နောက်ဆက်တွဲဆိုးကျိုးများ
လေပြွန်ရောင်ခြင်းကြောင့် ပြင်းထန်တဲ့အသက်ရှူပြဿနာတွေကိုဖြစ်စေကာ ဆေးရုံတက်ပြီး အောက်ဆီဂျင်နဲ့ အကြောဆေးတွေပေးကာ ကုသမှုခံယူဖို့လိုပါတယ်။
ကလေးက အသက်ရှူဖို့ ကြိုးစားနေရတဲ့အတွက် မစားနိုင်မသောက်နိုင် ဖြစ်နေနိုင်ပါတယ်။ အခြားအဆုတ်ရောဂါတစ်ခုခု (သို့) နှလုံးရောဂါရှိတဲ့ကလေးတွေမှာ လေပြွန်ရောင်ခြင်းက ပိုပြီးဆိုးရွားတဲ့ပြဿနာတွေ ဖြစ်စေနိုင်ပါတယ်။

>>  ကုထုံးများ
အသက်ရှူခက်ခဲနေတဲ့ကလေးတိုင်းကို ဆရာဝန်နဲ့ ပြသသင့်ပါတယ်။ ကလေးငယ်လေးတွေမှာပဲ အဖြစ်များတဲ့အတွက် အသက်ရှူရခက်ခဲတဲ့လက္ခဏာ တွေ့တာနဲ့ ဆရာဝန် ချက်ချင်းပြသရပါမယ်။
ကလေးက နှုတ်ခမ်းနဲ့ လက်ချောင်းတွေပြာပြီး အသက်ရှူရခက်နေပြီဆိုရင် အရေးပေါ်ကုသမှု ခံယူရပါမယ်။
ရောဂါလက္ခဏာ သက်သာစေဖို့အတွက် အောက်ဆီဂျင်နဲ့ အကြောဆေးသွင်းတာကလွဲရင် လေပြွန်ရောင်ခြင်းအတွက် သီးသန့်ကုထုံးမရှိသလို ဗိုင်းရပ်စ်ကြောင့်ဖြစ်တာ ဖြစ်တဲ့အတွက် ပိုးသတ်ဆေးတွေကလည်း အသုံးမဝင်ပါဘူး။ ရောဂါပြင်းထန်လာရင် ဆေးရုံတင်ထားရပါမယ်။
အသက်ရှူရခက်နေတဲ့ကလေးကို မောပန်းခြင် းမဖြစ်စေဖို့အတွက် နို့ကို နည်းနည်းနဲ့ မကြာခဏတိုက်ပေးပါ။

>>  ကာကွယ်ခြင်း
တစ်ကိုယ်ရည်သန့်ရှင်းခြင်းနဲ့ လက်သန့်ရှင်းစွာထားခြင်းတို့က ရောဂါပျံ့နှံ့မှုကို ကာကွယ်နိုင်ပါတယ်။ ချောင်းဆိုး၊ အအေးမိနေတဲ့သူတွေကို ရှောင်ကြဉ်ခြင်းက ရောဂါကူးစက်နိုင်ချေကို နည်းစေပါတယ်။ ကလေးအနီးအနားမှာ ဆေးလိပ်သောက်ခြင်းက ကလေးရဲ့ဘယ်အသက်ရှူလမ်းကြောင်းရောဂါကိုမဆို ပိုဆိုးစေပါတယ်။

Dr. Mya Myo Myo Swe (www.drmyanmar.com)